Phone limetlua ahih manin numeikhat Escalator ah tuksuk in khuaphawklo
Singapore meileng Station aom setkahlei Escalator khatpanin numei khat tuksuk in, anuai sualtung ah lumsuak in khuaphawklo hi. Queenstown MRT Station ah Saturday nitaklam 5:10pm hunin thupiang ahihi.
Shin Min Daily News te genkhiatna ah hih numeinu pen Train Platfrom panin meileng tuangding in Escalator zangin akumsuk ci a, tuapan in anuai ah atuksuk kici hi.
Tuaphual ah nasem Cleaner khatin agenkhiatna ah hih numeinu pen Escalator atuankawm in, a Mobile Phone limetlua ahih manin, anuai atun ciangin akhe palkha in atuksuk hiding cihi.
Tua Queenstown MRT Station aom nasemte’n aphotphot hangin khuaphawklo a, tuaciangin Ambulance khat amanlang in sapsak uhhi.
Ambulance tawh nasem Paramedics te atun ciangin tua numeinu pen alu tuamsak uhhi.
Singapore Civil Defence Force (SCDF) te genkhiatna ah tua numeinu pen National University Hospital (NUH) kipuaksuak ci’n genkhia uhhi.
Media te genkhiatna ah tuahun laitak in tua Escalator pen siatna bangmah omlo, akizangzang hi ci uhhi. Ahi zongin Public Safety ngaihsutna tawh tua Escalator pen tawmveisung ki khakcipsak hi.
Related: Hong Kong Shopping Mall sung aom Escalator khat lehtaigawp in mi 18 liam
Escalator tungtawn in tuahsiatna pen gamtuamtuam ah piangkawikawi in, kidop huai mahmah hi. Adiakdiak in naupang, naunen tawh akithuah te kidop huai phadiak hi. Khuasung lamzikpi te kantankawm, Escalator tuankawm, mawtaw tamna ah lampaikawm cihte ah Mobile Phone zatloh hoihpen, Safe pen hi. Vai thupi phone hopihloh phamawh aomleh, lamkiau ah khawlphot zawtham in, lungkimtak in naki hokhitciang na phone khakin, lampai, lamkan lecin, hoihzaw in na umhiam? Sawltak #zomidaily
Comment piaknop aomleh...