Brazil gamah Military Helicopter khat kia, mi 4 si

Brazil gamah Military Helicopter khat kia, mi 4 si

Brazil gamsung Rio de Janeiro ah Police Operation te akisap vanpuakin aleng Military Helicopter khat Saturday nitaklam in kia ahih manin, atungah atuang Officer mi 4 si cih AP News pan kiza hi. Military police spokeswoman khat ahi Ivette Silva in Associated Press te kiangah agenna ah hih Helicopter pen God City gei ah akiasuk cihi. Ahi zongin akiatna ahangpen ki theicianlian nailo a, aki kancian laitak cihi.

Brazil gamsung ah guihtheih khamtheih te phiatsiangtheih nading in Anti-drug Operation abawlna ah hih Helicopter zong akisam vante apuakding in apai cihi. Adang ilitary Police Spokesman khat ahi Maj. Ivan Blaz in agenkhiatna ah hih Helicopter pen aki kiasuksak tawh kibang ci’n genkhia hi. Ahi zongin adang gencian behna neilo ci uhhi.

Hih Helicopter akiatna hangin asungah atuang Officer 4 teng asih hangin, anuai akiatna ah kuamah sukkhak neilo, midang liamsakna cihte omlo cihi.

News Media te ageinai ah ki paisaklo himahleh Photo akizaih khatsungah Helicopter pen zanzihziah hi.

Hih Helicopter akiatna gei ah aomte’n agenna ah akiatma in Police Operation om a, thau kikapna zong kiza cihi. Thiago Duarte kici ii genna ah Helicopter kagal etet laitak un hongkiasuk ci a, thautawh aki kapkhia dingin a upmawhlam genkhia hi.

Brazil gamsung pen guihtheih khamtheih tamin, migilo zong tammahmah a, palik te leh migilo te kikap pahpah thei uhhi.

Brazil gamsung ah migilo te’n Military Helicopter taktak kapkhia cihpen ompakpaklo hi. Ahi zongin 2009 kumin migilo tawh palik te akikap laitak un, migilo te’n Military Helicopter khat kapkhiatsak uh a, Officer mi 2 in sihlawh cihi. ZD Sawltak #zomidaily