Kuate’n Laisiangtho simding ~ Pau Tun Thang

Kuate’n Laisiangtho simding ~ Pau Tun Thang

Nidang lai-in England kumpinu Queen Victoria kiangah African gam kumpi khat va hawh hi. Kithuah in limtak holim khawm thei uh hi. A ciah ding kuan ciangin,”Kumpinu aw, England gam thupina thusim bang hi peuh mah hiam?” ci-in dong hi. Kumpi nu in manlang takin,”Lai Siangtho hi” ci-in dawng hi. Lai Siangtho pen laibu dang khempeuh sangin manpha zaw a, Kha ading in ann leh tui hong paina naak ahi hi. Tamvei a sim ten simkik ding lunggulh semsem uh hi.

A kibatpih laibu dang a omlohzia thei tek tek uh hi. Lai Siangtho in van inn lampi hong hilh hi. Tawntung nuntakna lampi theihlawh hi hang. Hih laibu in mawhna bawlna ding pan hong keem thei hi. Tua ahihmanin Lai siangtho sim inla, lai siangtho ki-uk sak in.

Laibu dangte pen a sim dinga kilawm deuh a tuamin om hi. Naupangte sim dinga kilawm om in, nungak/tangval te sim dinga hoih om hi. Tua te nupi/papi leh pitek/puteek te sim dingin hoih khollo hi. Tuamah bangin picing te sim dinga hoih khempeuh naupang te adingin hoih khin khollo thei hi. Lai Siangtho pen a lamdan mah mahna khat om hi. Tua pen bang hiam cih leh mikim adingin hoih hi. Mikim huapzo ahihmanin namkim bu kici thei hi. Mi khempeuh adingin hoih hi. Mi khempeuh in Lai Siangtho sim ding kitangsam hi, bang hangin kitangsam hiam?

Khangnote- Hinna leh Nuntakna Dingin: Khangno laite adingin ‘kei khangno lai ka hihmanin kei adingin kitangsam nai kei’ cih theih om tuan lo hi. Khangno ten mailam hun saupi tak nei lai uh ahihmanin lai siangtho ki makaih sak ding hoih hi. Tawntung nuntakna leh khamuanna na ngah theih nangin Lai Siangtho sim in.

Upa- Sih khamuanna Dingin: Kum upa ten zong ‘ka kum upa ta ahihmanin leitungah hun sawtpi zang nawn kei ning’ cia lai siangtho sim noploh ding hi tuan lo hi. A piang masa a si masa dingin ngaihsun leeng kum upate mah a si baih zaw ding hi mawk hi. Tua ahihmanin kum upate adingin sih khamuanna neih meng meng ding hoih hi. Lai siangtho simna tungtawn in sih khamuanna ki nei thei ding hi.

Mihai- Pilna Dingin: Pilna a nei lo te adingin Lai siangtho sim ding hoih hi. Lai siangtho simna tungtawn in pilna ki ngah thei hi. Tua ahihmanin ‘kei miten hong hai bawl lua’ ciin lungkia ken. Hahkat in lai siangtho sim lecin tua hong haibawl mite sangin na pil zaw ding hi. Pilna na ngah nangin lai siangtho sim in.

Misiam- Kiniamkhiatna Dingin: Mi siam ten zong lai siangtho a sim veve ding uh hoih hi. Bang hang hiam cih leh lai siang tho a sim loten amau a siamsak Pasian phawk lo in kiphasak thei uh hi. Ahizongin ki niamkhiat ding pen Pasian deihdan hi zaw hi. Tua ahihmanin kiniamkhiat theih nangin Lai siangtho sim kuul hi.

Mihau-Midang Hehpihtheihna Dingin: Mi haute, hau khin lel uh ahihmanin Lai siang tho sim kuul lo cih bang om thei lo hi. Paunak khat in ‘suang neu ten suang lian te nang’ a cih dan in mihing pen khat le khat aki huh ding ihi hi. Mihau te zong mi zawngte hanga hau thei ahi uh hi. Mihau ten midangte heh pih in a huh ding uh hoih hi. Tuabang thu a theih nangun Lai siangtho sim kuul hi.

Genthei- Kinepna Dingin: Na nuntakna ah genthei liangvai kisa in hong nem ding om lo thei hi. Tuabang hun ciang na kinep nangin Lai Siangtho sim in. Hehnem siampa Jesu’n hong neem ding hi. Mihingte’ tungah na ki ngak leh bel khasiat nang tam lel hi. Tua ahihmanin Lai Siangtho sim zaw in na kisik kei ding hi.

Lametna neite-Lungnopna Dingin: Lam-etna khat peuh na neih ciang tua na lam-etna tangtung ding hi cia na lungnop nangin Lai siangtho sim in. Lai Siangtho in lungnopna hong pia thei mawk hi. Jesu muanga Lai siangtho a sim tawntung zote a lungnuam hi.

Naseemte – Hilhna Ngahna Dingin: Naseem mi na hih leh zong Lai Siangtho sim lel in hilhna (advice) na ngah theih nangin. Lai Siangtho sungah na phattuampih theih ding thukihilhna tampi om hi. Lai siangtho sim inla, zuih dinga kilawmte zui siam in, na phattuam pih ding hi.

Thaneemte – Hatna Dingin: Thaneem mi khat in a thahat theih nangin Lai Siangtho sim leh hoih hi. Lai siangtho sungah thaneem te a thahat sak thei ding hanthotna tuam tuam tampi om hi. Lai Siangtho simna tungtawn in a thanem mi khat Pasian in tha khauh sak thei hi.

Thahatte – Makaih siamna Dingin: Thahat te adingin zong Lai Siangtho sim veve ding hoih hi. Tua Lai Siangtho simna tungtawn in makaih siamna ngah thei ding uh hi. Makaih siam lo a mawk hatna pen a phattuamna tam lo hi. Tua ahihmanin Lai Siangtho sim in.

Kiphasakte – Taina Dingin: Mi kiphasak ten Lai Siangtho sim le uh kiniamkhiatna lungsim nei thei ding uh hi. Bang hang hiam cih leh Lai Siangtho pan in taina tampi ngah thei ding uh hi. Tua pan in amau leh amau kipuahpha thei ding uh hi.

Buaina tuakte – Khamuanna Dingin: Buaina a tuak ten a lungmuan theih nangin Lai Siangtho simta hen. Lai siangtho tungtawn in Pasian kha siangtho in khamuanna pia ding hi. Vangik pua –a gim mite lungnuam tawldam theih nangin lai siangtho sim ding hoih hi.

Tua ahih manin, Lai siangtho pen Pasian khasiangtho huhna tawh akigelh ahihmanin thu tampi kicing hi. Ei khristian te adingin Dan bu zong hi mai hi. Zuih ding leh zuih loh ding te hilhcianna om hi. Tua ahihmanin thu khat peuh Lai Siangtho tawh etkak tawntung in. Tua hileh a dik hiam cih tel takin na thei ding hi. Mi khenkhat ki khami sak in Lai siangtho sim ding thudon nawn lo uh hi. Tua bang ding hi lo in i khristian nuntakna ah i picin sem nangin Lai Siangtho sim ding kitangsam hi. N. Pau Tun Thang