Guahtui tamluatna hangin Nepal leh India gamsung ah mi 90 val sikhin

Guahtui tamluatna hangin Nepal leh India gamsung ah mi 90 val sikhin

Nepal leh India gamsung ah tusungteng guahtui tamlua mahmah ahih manin tui khanggawp a, mi 90 val sikhin cih AFP News pan kiza hi. Huihpi leh guahpi kithuah in khuahun siagawp a, tuaban ah mencim Landslide zong omkawikawi ahih manin khuasung mite cimawhthei mahmah uhhi. Tuitamluatna hangin inn ah omthei nawnlo in, inn anusia ataikek zong mi Million nihbang phading ciliang hi.

Tutung khuahun siatna hangin Nepal gamsung pen huaisiadiak a, inn leh khuasung lei tuamtuam te kisiacip gawp cihi. Monday ni akipan hih buaina hangin asi pen mi 73 aphakhin hi a, Tuesday ni ciangin asi ki behlap toto leuleu hi ci’n Home Minister Deputy Spokesman khatin genkhia hi.

Cimawh dongtuak te Search & Rescue Team te’n huhpah ngeingai uh a, omnading aneilo te ompaktheih nading in belhbuk kibawlsak hi. Online ah aki khahkhia pawlkhat photo te ah tui tamlua mahmah ahih manin, pawlkhat a innsung ah omthei nawnlo uh a, inndawn sikkang tungah aki hotkhiatding a ngak in om uhhi.

Kathmandu pan nitumna lam aom ahi Pyuthan khuapen naksiat mahmahdiak a, inn sawmvalbang tui in taikhiagawp hi.

Kumsim Monsoon Rains ci’n khuapi guah hongzuk ciangin Nepal gam leh India gamsung ah tuiciim tungin mencim omden a, mi tampipi in sihlawh den uhhi.

Tukum pen kumdang sangin huaisia zawdiak hi. Banghanghiam cihleh Nepal gamsung ah 2015 kumsungin zinling nasialua ahih manin mi 9000 bangin sihlawh hi. Adamlai te innsia losia lakah belhtawmding akibawl belhbuk vive tawh omlai uh ahih manin, tuate tusung guahtui hongkhangawp ciangin taihkhiatnop samahmah mawk ahih manin, mi tampi cimawh in aom uh cih genkhia hi. ZD Sawltak #zomidaily