Kuahawm sunga tang mi 13 te suakta ta

Kuahawm sunga tang mi 13 te suakta ta

Ni 18 sung Leitung sin kisai detdet a ki- en aki lunghimawh Thailand gam Tham Luang Nang Non kuahawm sunga tang Wild Boars Footballer mi 13 te avek un kihon khiata hi, July 10 nitak Thailand nai 7:00 pm hun in Coach Ekapol leh naupang 12 te kuahawm sungpan kilakhia zo in Chiangrai Prachanukroh Hospital ah a vek un kikem phot hi.

Wild Boars Football Club (Zokam in Ngalh Hang Football Club) te khuahawm suang a awkcip dan, akimuh khiat dan, akilak khiat dan ding leh a kihot khiat dan thute in Leitung bup zel zo mahmah hi. Hih naupangte a suahtakna thu akitangko phet in Iceland Prime Minister KatrinJacobsdottir in Lungdampihna gen masapen a, British PM Theresa May leh German Chancellor Angela Merkel, Facebook founder Mark Zuckerberg ten zong lungdampihna gen ciatciat uh a, Gam tuamtuam kumpi te lunghimawh zia kimu semsem in Pu Do Nang in zong nasemte kipiak khiatna etlawm ‘very beautiful’ ci zezen hi.

Thai Navy SEALs Facebook sungah, “Wild Boars mi leh sa 13 te kihon khiai ta. Wild Boars Reunited! Hooyah!” ci-in na gelh uh hi. A hih hangin “Frogs” a cih uh Kuahawm sunga Naupangte akem Navy Seal Doctor 1 leh members 3 te pen geelna omsa bangin ong pusuak nailo uh hi.

Ngalh Hang Football Club mi 13 te honkhia dingin US Air Force Pacific Command pan in Navy Seals mi 39, Australia in zong Diver Experts mi 19 sawlin, British Diver experts 2, Japan leh Thai Navy Seals divers mi 50 leh Kawlgam divers kihel in gam tuamtuam pan misiam 40 te-in hih naupangte khot khiatna ding limtak sem uh a, Thai Military leh Police mi 1,000 in a kisam bangin nasep huh uh hi.

Hih hun sungin Kipiak khiatna tawh nasemte nek leh dawn a pia nuam mimal leh kipawlna panin van lut den ahih manin hih Gammang sunga om kuahawm pen khuano khat bang liang zo hi.

Space X Exploring firm Boring Company nei American mihau Pu Elon Musk zong a engineers pawl khat tawh amahmah pai in hih mun va en uh a, Naupang a ta ding (kidsize) mini -submarine (tuisung mawto !) bawl a naupangte lak khiat ding ageel a tangtun manloh hangin a company bawl Rocket part ah ‘Wild Boars’ cih min apuaksak nop thugen hi.

Ngalh Hang Football Club mi 13 te kuahawm sungah ni 18 tang (trapped) te hon khia dingin Leitung mipil misiamte nasia takin kisa’n uh a, Thai kumpi leh mipite kipiak khiatna manghilh theih ding hilo. Thai Navy SEALs sung a talent nei hoih, hangsan leh siamna nei, mi kipiakhia zo mi, ex-Thai Navy Seals Petty officer, 1st class Sanam Gunam (38) in kamsiatna tuak in, Kuahawm sung a “Pattaya Beach” pan meters 500 khawng a gamla naupangte om na ah Oxygen va puak a kileh kik lam tuisungah ama zat oxygen bei in, Monk Junction (T-Junction) ah khuaphawklo in om a, asawtlo in a leitung nuntakna bei lawh hi. Thai Royal family in akisam teng vaihawm sak in Sanam Gunam luanghawm pen Sattahip Naval Base, Chon Buri province ah nasiatakin khakna bawl in kivui hi.

Sanam Gunam pen Bangkok airport pan Chiang Rai zuan ding a van teng zong vanleng tung guang khin hinapi naupangte thu a zak ciangin amah akipia khia (volunteer) ngiat hi-in a lawmte kiangah Chiang Rai ah kimu kik ni ci-in lungdam nuihmai takin luangkham in a phamna ding Tham Luang Nang Non kuahawm lam a zuan na himawk hi. Bangkok pan in Chiang Rai province pen Myanmar-Laos gamgit na, Khamthei zakang (Opium) tamna “Golden Triangle” kicihna mun, Tu ma Opium Kumpipa Khun Sa leh a nungzuite Ngalkhaat banga a tatna mun hi.

Tutung Thai Rescue Mission ah thukhensatna poimawh bawl pen Thai thuneite hilo in, Amau sang a theizaw te khutah koih in naupangte suahtakna ding nasep ah phat huai mahmah hi. Hih mission nasepa mapangpi khat ahi South Australian mi diving experience kum 30 val a nei, diving expert kum 58 mi Dr. Richard Harris hi a, Diving expert siamna leh a Doctor siamnate leh khuahun om dante gawmkhawm in limtak ngaihsutna leh geelna kiciantak abawl khit ciangin Manglang theithei a naupangte lak khiat dingin Thai thuneiten zong thukimpih pah uh hi.

Sunday 8/7/2018 ni in Thai Rescue Mission kipan pah in naupang 4, Monday 9/7/2018 adang naupang 4 mah, haksatluat na omlo in kilakhia thei hi. Hih bang a naupangte lak khiat dan ding ah amasa leh nunung ding zong Dr. Richard Harris in amau cidamna tawh kisai in akhen hi a, Geelna omsa bang hileh a cidam zaw deuhte lak khiat masak ding, a thanem zaw deuh ten tuikiam ngak bawl ding cih hinapi Dr Richard in a cidam ten ngak thei zaw ding ci-in last hour a kilaih kik vat hi. July 10 ni-in naupang 4 leh a makaipa kihon khia theiin a vek un suakta uh hi.

Tubangin kuahawm lutna pan km 4 bang a gamla kuahawm sungah ni 9 sung khuamialpi sungah a om lai un World Cup 2018 Russia gam kimawl cih manghilh hetlo uh hiding hiven, July 2 ni British Diving expert 2 in ava muh masak hun in ” Ngalh hang football club te hi ung, mi 13 pha ung, no kuate na hi uh hiam? Koi pan ong pain a hi uh hiam? Ka cycle te uh leh ka vante uh na a om lai hiam? World cup kimawl bang ciang tungta? Ka ciah loh uh ni bangzah pha ta? Cih dotna te a zading a kilawm tengin kitheih mawh bawl hetlo uh hi.

Manchester United football club in Ngalh Hang Football Club teamte pen Man United fan cih a theih bek un football season ciang Old Trafford hawh (visit) dingin official in sam uh hi.

More: Thai kuahawm sungah ni 9 sung amangcip naupang 12 leh asiapa, akigawm in mi 13 te kimuta

Moscow khawpi a FIFA makaite in zong hih thu na za uh a, FIFA President Giannin Infantino in Football Association of Thailand (FAT) President Gen. Somyat Poonpanmaung laikhak in, Wild Boars footballers 13 te cidam a ong suahtak uh leh World Cup Final July 15 zan nai 6pm (Moscow Time), Bangkok Time ah zan 10pm) a Luzhniki Stadium, Moscow a kimawl en (FIFA guests) dingin na sam a, aihang in tu dinmun ah naupangte cidamna tawh kituak nailo ai man pai theilo ding ki-um mawh hi.

“British Divers ten ka naupangte uh hong muh khiatsak na hih man un Thai mipi in World cup ah ENGLAND kong panpih ding uh hi” – MELBOURNE THUTHANG