Zawngkhaal-lua kisa ka hih man-in

Zawngkhaal-lua kisa ka hih man-in

Zawngkhaal-lua kisa ka hih man-in, hong it ding muhhak kasa hi.

Zawngkhaal-lua kisa ka hih man-in, hong maitai khatpeuhzong hong it kasa pahpah thei hi.

Zawngkhaal-lua kisa ka hih man-in, hong kideihsakna khat zong ka sangkhial pahpah thei hi.

Zawngkhaal-lua kisa ka hih man-in, a kilawm kituak in, itna kalakzo kei hi. A hizong mi-it ding leh hehpih ding ka lunggulh laizang hi.

Zawngkhaal-lua kisa ka hih man-in, hong kihehpih ding deihna pi’ing, mi-hehpihna lungsim neihhak kasa hi. Migam- milei ah, ki hehpihhuaisak in, kagam ka lei vuah biakna vai, nuntaak khuasakna vai suahtaakna omlo ci-in ka thumthum nate hong kidawng mah leh ka kibat pih kamipihngiat te nangawn ka khualzo kei hi. Ka kipatkhiatna ka mangngilh kha pahpah aa, sumkuang tuilii sungkhiat bang in, a dang bangmah phawklo in ka om kha pahpah hi.

Zawngkhaal-lua kisa ka hih man-in, ka it sunsun nangawn in hong taisan kasa pahpah hi.

Zawngkhaal-lua kisa ka hih man-in, thukhat peuhpeuh a hoihlam in kamuzo pak kei hi.

Zawngkhaal-lua kisa ka hih man-in, a thu omlopi zong hong kisim mawh kasa thei hi.

Zawngkhaal-lua kisa ka hih man-in, mi khempeuh in hong enneu pah ding kasa pahpah hi.

Zawngkhaal-lua kisa ka hih man-in, ka hihna khatpeuh pan ka kiseelseel kha hi. Hi mah leh, miselpho ka-uuk citciat kha hi.

Zawngkhaal-lua kisa ka hih man-in, milak ah kamaingal-ngam kei hi.

Zawngkhaal-lua kisa ka hih man-in, ka tha a neem den hi. Tha neem ka hih man-in, midangte ngaihsutna ka telsak zo kei aa, kei aa tawh a kibat keileh hong langpang kaci kha pah hi. Tua seel na ding in, kipawlkhop kithuahkhop nawnloh nading, lampi tampi kazongzong aa, pawl tuam ka phutkhiat kei leh zong, a kibanglo theithei pawltuam ah ka kihel pha mahmah hi.

Zawngkhaal-lua kisa ka hih man-in, deihbang in kamaa a liauzo kei hi.

Zawngkhaal-lua kisa ka hih man-in, naakhempeuh ka iiplah kha hi.

Zawngkhaal-lua kisa ka hih man-in, tagah nawimu bang in ka huaiham thei hi. Angsung kakhual-lua pahpah thei hi.

Zawngkhaal-lua kisa ka hih man-in, kasep theih sunsun nangawn hong kisutpah ding sa-in, ka im-nuam hi.

Zawngkhaal-lua kisa ka hih man-in, manngen lo-a, a mawkna a hong kipia nangawn zong’ piakkhiatkik ding ka kihta hi. Kei aa ding bek kaci kha pahpah hi.

Zawngkhaal-lua kisa ka hih man-in, mihing khempeuh hong it man-in a Tapa khat neihsun manla lo-in, hong piakna nangawn kei aipengbang bek in ka ngaihsun thei aa, a mawkna in hawmkhiat ding’ ka phalngam kei hi.

Zawngkhaal-lua kisa ka hih man-in, a beitheilo Pasian itna nangawn, pungsak, khangsak leh hawmkhialo in, a kiamtheithei ding in vaihawm in, ka gamta kha thei zen hi.

Ei leh ei kineusek ding a hoih kei hi. Lungsim kiniamkhiatna leh kineihna omlo gamtatna in a pi’cing khantohna, thalawpna leh lam-etna taktak hongpia ding in ka um hi.

More: Thupha maw? Hamsiat na, et kik huai. Nang e? (Blessing or Curse?)

Mikhempeuh pilkim haukim tuanlo napi’ a kizawngkhaalsak deuh, kisamgailo pi mi-huhding, mihehpih ding lunggulh phadiak minam kihi kha thei hi.

Laisim mimal leh Zomi khat ciat in lungkihual nang’ zawhna,thahatna thak tangciat ta hen. Nantal’suan