Vondeih Kep Ding – 143 (Dimno’ Pa)

Vondeih Kep Ding – 143 (Dimno’ Pa)

Dear Tawngno, Tawngno aw, tunung kong laikhak ah mihaute a hauh semsem na thu hong gelh ing. Tua in ngaihsut khat teitei hong neisak dingin lam en ing. Ahang in nang pen naupang meelmawl hi nawn lo-in, sia le pha a khenthei khin a picing khin khat na hih man hi.

Leitung ah 90% te lawhcing in, a cianlai 10% te pen lawhcing zo lo uh hi, ci hi. Ahang in,

1. 90% te-in a nungtakna uh ahi bangbang in lungkim uh a, 10% te-in ahih leh khantoh nadingin mah le mah hanciam kul ding hi, ci-in lungsim puak nei uh hi.

2. 90% te-in thu tawmtawm bek ngaihsun uh a, 10% te-in ahih leh thu ngaihsunsun in thu tampi ngaihsun kak uh hi.

3. 90% te-in a sum bawlna ah sumzaw kei peuh leng, cih lungsim puak nei uh a, 10% te-in ahih leh ka meet kul ding, ka meet loh phamawh, cih lungsim puak nei uh hi.

4. 90% te-in haksatna khat peuh a tuah ciangin paulap tamsak in tua haksatna nawl khin uh a, 10% te-in ahih leh a khialhna uh sang in, tua bang ci phisian ding cih ngaihsun uh hi.

5. 90% te-in midangte cihcih in gamta in kalsuan uh a, 10% te-in ahih leh mi in bangbang a gen zongin amau hoih sak bangin kalsuan in gamta uh hi, ci hi.

Ei leh ei i kingaihsut dan, i kimuhdan in a kipiang sa ing. Tua manin lungsim puak sang sak in, ngimna sangpi nei ding hi hang.

Tua lo adang konggen nop khat bel lawm ngaih neita na hih manin ‘Sorry’ cih theih ding kisin le cin hong deih ing. Nang khialhna ahih sese loh hangin thu tuamtuam hang tawh no nih kikal ah khat vei teitei ciangin kitel khialhna hong om thei ding ahih manin tua hun ciangin ‘Sorry’ na cih masak theih ding hong deih ing. Lungsim khauh bekbak in om ken la, ‘Sorry’ ci in. Tua in hong kilemsak kik ding hi.

Lawm ngaihte tung bek hi lo-in naute tungah zong khialhna khat peuhpeuh na neih khak ciangin ‘Sorry’ ci tangtang in. Tua in picingna hi zaw hi. Hong it, Na Pa March 9, 2018