Korea gamsung ah mawtaw 100 val ki phukhagawp, mi 2 si

Korea gamsung ah mawtaw 100 val ki phukhagawp

Wednesday ni in South Korea gamsung Incheon International Airport tawh aki gamlalualo aom tuipi tung mawtaw painading in lei akidawh tungkhat ah mawtaw 100 val ki phukhagawp cih Korea Herald in genkhia hi.

Hih mawtaw 100 val ki phutkhakna hangin mi 2 in sihlawh a, adang mi 60 val liamlawh cih Police te’n genkhia uhhi. Wednesday ni zingsang 9:34am panin hih buaina akipan hi a, Yeongjong Bridge akici lei saupi tungah thupiang ahihi.

Police te genna ah hih mawtaw ki phutkhakna akipatna pen vanleng tual azuandingin Passenger apua ahi Airport Limousine Bus khatin adang Passenger Vehicle khat anungpan phukha ahih manin mawtaw kiphutna apiang ahihi. Meizun kaizihziah ahih manin, amai gamlapi kimukhollo ahih manin anung aom mawtaw te aban aban in ki phukha ziahziah uhhi.

Accident apian laitak in maizun kai zihziah ahih manin mawtaw hawlte’n amailam 15 – 20 Meters ciangciangbek galmuhthei uhhi. Tuahang in mawtaw ki phuto ngekngek a, mawtaw akiphukha, akithuap phei bekbek pen Kilometer khatbang sauphei ciliang hi.

Hih Accident hangin asi te pen kum 46 aphakhin Lim aki khat leh adang kum 51 aphakhin Kim cih minneite ahi uhhi. Kim ii luanghawm pen Myongji Hospital ah ki puakpah a, Lim ii luanghawm pen Na-Eun Hospital ah kipuaksuak pahhi. Korea gammi ahilo gamdangmi Foreigner zong mi 19 kihel cih kiza hi.

Yeongjong Bridge kici hih lei saupi pen 2000 kum in akilam hi a, Incheon International Airport Expressway ii ahiangpi khat ahihi. A sauna Meter 4420 hi a, leitung ah aminthang mawhlo, anasia mahmah lei thupikhat inzong akigen khat ahihi. ZD Sawltak