A khangto nuam mi na ut hiam?
Laigelh siam Oswald Sanders in a gelh Spirual Leadership laibu sungah
“Khalam leh cilesa khuak pilna lam a khangto nuam mi (numei/pasal)
khempeuh in laibu tawh kikop den hi.”ci’n na gelh hi.
John Wesley in a paina peuhpeuh ah Laibu pua in sim tangtang hi kici
hi. Sakol tung tuang na lengin laisim hi. A pil nuamten laisim uhhi. A
khangto nuamten laisim uh hi.
Victoria kumpinu in a neu lai-in sangah lai kin vet lo hihtuak hi. A
siate in a hanthot niloh hangun a kilamdan’ luatna om tuan lo hi.
Nikhat a Siamahte khat in, “Ka tanu aw, nang pen nikhat ni teh England
gam a uk kumpinu ding hi teh,” ci in a gen teh Victoria zong amah leh
amah a dinmun hong kitel a, tua akipan lai hong hanciam hi. A tawpna
ah ni a tum ngei lo England gam a uk kumpinu hong suak takpi hi. Lai
hamciamna laisim thanopna panin Kumpi dong tung hi.
Abraham Lincoln in Kha tang nuai na lengah laisim simin, mite laibu
kawmin laisim hahkat ngiat hi. Laibu a neihlo khat hi sawnsawn hi. Inn
hoihlo panin a khang khia a nu in sihsan baihlai, a mah leh amah in
hanciamna a neih pasal hi. Laibu a simsim manin kumpi inn dong tun hi.
Greek mipil tuni dongin a ki genden Socrates zong laitan sangpi a neih
hilo hi. Laitan sang neihlo hi icihteh Laitan ki samlo hi cilo kahi
maw. Laitan ki samlua mahmah hi. Laitan pilna sang neihlo khat in
laitan sangpi a neih huaizia ki tellua hi. Socrates pen Lai simsim in
thuman kantel mi khat hi. Pilna ka neih keileh si zaw tham ning aci pa
hi. Tangno no khat in Socrates kiangah hihzah in na pilna deihlua ing
bang cih ngah theih ding ka hiam ci-in dong hi. Pilna na deihleh hong
pai o ci-in tuipi ngei ah paipih hi. Tuipi kawngtan ciangah paipih hi.
Greek mipil Socrates in a luzang sampan mani tui sungah phum suk aa,
tangval pa zong ki tomgawp in dingto hi. Socrates in bang ki sam na
neih ci-in adot teh Huih ki sam ing cihi. A thum veina dongah Huih ki
sam ing cih tangvalpa in gen hi. Socrates in huih na cih tua huih om
keileh bang ci ding na hiam cihi. Tangval pa in Huih om keileh ka si
ding hi ci hi. Socrates in tangvalpa kiangah Huih o keileh si ning na
cih bang mah in, pilna ka neih keileh si zaw thamning na cih mateng na
pil ngei kei ding hi cihi. Pilna zon huai hi. Tu-a mimal kimin ih uk
thute ngaihsun leng a pil huai hia? A khangtoh vai hia?
Paul in thonginn sungah a om laitak in Timothy kiang alaikhak na
laigual tawpna ah hi bangin a at hi. “Na hong pai ciangin Troas
khua-ah Karpas kianga ka nusiat ka puantualpi hong pua inla, LAIBUTE
zong, a diakdiak in savun laidalte tawh zong hong pua in.” (2Timothy
4:13). Paul in laisim hahkat ngiat hi ding hi.
Makaite pen laisimte ahi uhi. Makai khat ahih nak leh laisim hi.
Ahizong in laisim mi khempeuh pen makai hilo uhi. Mitampi takin laisim
ciat uhi. Ahizongin avek un makai hikhin lo uhi. Mi makaih ding
nahihleh na makaih ding mite sangin a sau zaw, a zaizaw a picing zaw
ding na deihleh Laisim in. Makai suak ngei kei ning ee…cih tawh ki
lungneu sak ken. Na innkuan sungah zong makai khat hiteh. Na inn sung
panin mipil milian a khan khiatna inn ahih ding na deihleh Laisim in.
Amasa pen ah Pasian a zahtak innkuan ihih phot kul hi. Sang kahlai
khangno ten Laisim hanciam takpi unla na sanglai lo laibu dang zong
tampi simzawh sawm un. A khangto minam leh innkuan mimal kim ih utleh
Lai simsim ding hi mai hi. Thadah ei cihte ki ngahlo laisim in.
Pilna siamna a neih veve Laisim a hanciam mite picing zaw aa, makai
panmun neih veve Laisimsim mikhat makaihna in ki lemna leh khantohna
pia hi. Lai a sim veve lak-ah Pasian a zahtak te mite’ phattuamna pia
aa, nuntakna tuikhuk tawh ki bang hi. Lungdam.
Thawn Tuang
May 12, 2015
www.zomi-angvaan.blogspot.com
Comment piaknop aomleh...