Gamdang mite alutsimsak KLIA ah nasem Immigration Officer honkhat kiman

Gamdang mite thumanlo in alutsimsak KLIA ah nasem Immigration Officer honkhat kiman

Malaysia, Kuala Lumpur Internationa Airport sungah kumpi nasem ahi Immigration Officers honkhat Smuggling vaitawh kiman cih theStar pan kiza hi. Bangladesh gammi honkhat Malaysia gamsung ah thumanlo in aguklutna vaite aki kankhiat ciangin, KLIA sungah kumpi nasem Immigration Officers tetawh kizom cih kimukhia ahih manin akiman ahihi.

Malaysia gamsung ah Immigration lamsang alianpenpa ahi Immigration director-general Datuk Seri Mustafar Ali in agenkhiatna ah adang Officers tezong hihvai tawh kizopna aomkhahiam, illegal activities tawh aki sawhkha kuateng omhiam cih hoihtak ki kancianding, Investigation kibawlding hi ci’n genkhia hi.

Malaysia Immigration Department ii “code of ethics” tawh kituaklo in agamta, akisawhkha khempeuh nasiatak in Action kilading hi ci’n genbeh hi. Immigration Department panin ulian te’n KLIA sungah asem Officers te a etcik gige uh cihi.

Tuaban ah hihvai tawh akizom Bangladesh gamsung aom tezong akankhia dingin Dhaka City ah thukan pawlkhat kipaisak cihi.

Tua Dhaka City sungah thukante’n Visa bangci bangin kipia cih SOP (standard operating procedure) te hoihtak kankhiading uh a, hih thumanlo in mihing gamsung guklutsakna “smuggling activities” te akhawlnading ki vaihawmding hi ci’n genbeh hi.

Malaysia gamsung ah Bangladesh gammi te thumanlo, illegal tawh aluttheih nadingin avaihawmpi puaisa Syndicate 4 om ci a, tuate tungtawn in KLIA sungah kumpi nasem Immigration Officers tezong aki theikhia ahihi.

Hihbangin thukhun zuilo, thumanlo, illegal in Bangladesh gammikhat Malaysia gamsung ah aluttheih nading in RM15,000 panin RM20,000 bang puaisa te’n ngen cihi. Kumkhat in tua puaisa Syndicate te’n Rm5.2 Million bang sumlut ngah uh a, summet bawlna nasia mahmah hi.

Tuabang ah KLIA sungah kumpi nasem Immigration Officers tezong golhguk pia in, oltak in lutsim sakthei uhhi. Tuabek thamlo Bangladesh gamsung, Dhaka City aom Malaysia te ii Embassy “Malaysian High Commission” sungah nasem te nangawnzong golhguk piasim in, hihvai tawh akizomgawp cimawk hi.

Tuahang in Malaysia, KLIA Airport leh Bangladesh, Dhaka City kikal pen nisim in vanleng 38 vei bang kilehden in, Bangladesh gammi te Malaysia gamsung ah lutsak ziahziah uh cihi.

More: UN Card tawi khatin palik te RM10,000 golhguk piaksawm ahih manin kiman

Malaysia Deputy Prime Minister Datuk Seri Dr Ahmad Zahid Hamidi inzong hihvai peuhmah aomnawnloh nadingin Immigration Department te’n hoihtak kankhia mengmeng unla, encik gige un ci’n thupia cihzong kiza hi. Myanmar pan puaisa tetawh honglut tebel bangmah genkhiatna kizakha nailo hi. Sawltak #zomidaily