Tedim khuasung khantoh nading nasep pawlkhat pulakna

Tedim khuasung khantoh nading nasep pawlkhat pulakna

Lungdam kipak
EPC zumnuai mualpang lam, Lasiam Cingsan te inn geipan Zato lamka dong Eldorado company ten suangphuah lampi (ကျောက်ချော ခင်းလမ်း) bawl hong kipanta uh aa, veng leh pam mipi te’n lungdam kipak mahmah uh hi. Hihmun pen tuukhun sung teng buanciim tawh a kidimden lampi mun khat ahi hi

Tedimkhuapi pen khantoh gimnam mahmah ta hi.Thunei ten zong a pilna/a siamna uh leh a tha leh ngal sitlo in, Tuunnu Zogam paakbang etlawm in, a mangthangsa “Zophualva” te Tuunnu Zogam nuam ah vaibang hong ciahkik aa, nunnop nga bang lenkhop thei nading a hih theihna muntek pan hanciam uh hi.

Tuinaak Sit-telna Vanei

Dec 12 2017 (Tue) Hakha pan hongpai SAE te,Tedim sipin zum pan SAE, telcing committee ten Tedim khuanu, khuapate tuineek Sialtang tuinaak leh Pawnpi tuinaak sit-telna vanei uh hi. Mailam ah Tedim khuamite tuieek, tuizat a lemzawk theih nading in thunei ten tha leh ngal san in hanciam uh hi.

Nasepnate Sit-telna

Dec 11, 2017 (Mon) zingtung a kipan nitak khuamui dong Pyinee Engineer te, Tedim sipin zumpan SAE, mipiteelcing committee te leh sipin nasem ten tender ngah company te nasepnate sit-telna va nei uh hi. Tender ngah company te nasepna a sittel ding in, Zogam khuapi Hakha pan Pyinee Engineer SAE mi (2) hongpai ngiat uh aa, pikhau kai-in kiteh ciatciat hi.

Lawibual, Leilum, Myoma leh Sakollam vengsung aa Tedim khantoh nading, Tedim khuanu, khuapate nun-nop damtui bang luan nading aa kilam hawktui luanna, suangsi tawh kiciang phung, tuipaikhiatna etc.. a tuamtuamte ahi hi. Lungkimna om estimate tawh a kituaklohna munte a sem company te thukizasak kikding aa, sempha kik ding uh hi.

Meikhuam Thak

Tedim EPC nasem ten Myoma, khuapi veng Galkaptualpi kimteng-ah meikhuam thak liklek hong phot ziahziah ta uh aa, mipite ki lungdam mahmah hi. Ref: Tedim Municipal Page