Christmas letsong Barbie milim ~ Peter Suumpi
“Ih mai-ngatna akhialh leh lamkal ah dinkhawl in athak ngimna lam mai-ngat in mainawt ding ahihlam aman telta hi…” Micrel kum 13 aphak lai in saihuan siam mahmah khat suak nuam hi.
Tua kum Christmas ni in Micrel in alupna lukhung ah mawza kop khat khai in mihing guhlom angah zawh nading in thungen hi.
Aki bulh limliam mihing guh te apa in hong puak hi. Ahihang in apa in tua guh te pen Micrel ii lukhung aa mawza sung koihsak lo in inn sung ah milim tuamtuam koihna khan sung ah sensak hi.
Tua guh te pen haak tawh akipeh tawm mihing guh te ahi hi. Kal nih hun sung bekbek in Micrel in tua guh te amah le amah in hoihtak in phel thei in bulh thei khinta hi.
Micrel in tua guh te atawntung in tawi ngiungeu le alungkim khin himai hi. Tua hang in lawmlegual zong hong neilo semsem hi.
Naupang te lak ah hibang aa alipkhap huai guh akhoihkhoih mi pen lawm ding aa adeih tam hetlo hi. Hih bangin alamdang agamtatna te hang in alawm te in ataisan ahi hi.
The Johns Hopkins saivuan sinna sang ah khah theihna angah khit teh cina vel ngei nai hetloh ahihhangin natna tawh kisai atheihna pen kum 4 asin khin sangnaupang te theihzah thei ta hi.
Hih bang aa alamdang ama kivakna hang in The Johns Hopkins sang aa professor te tawh akibang in lai asin khawm thei sangnaupang hong suak hi. Amau sang tawh akizom zato neu te ah cina vel dan practice sinding in phalna zong angah hi.
Tua sang ii professor pa in “bang hang hi theilo mawk ding… ‘Rome’ atun nading aman hihzah taka a hanciam khinta hi. Ama ii amanlang akhantohna thapia in ih pahttah toh suak ding hi” ci in gen hi.
Zato aa ki-atna khan khat ah mi at siavuan ahuh ding in Micrel hong kihel hi. Ahizong in sisan amuh teh luvai in atuk theih lam amah le amah kithei hi. Mi-at siavuan pan in cina a at ciang hong pusuak sisan te amuh teh akhut akhe vot in luvai in puk zel hi. Siavuan pa’ hilhna te zong za man lo in sual tung ah amah na puk khin zel hi.
Hih bang peuhmah tawh hih siavuan nasep khawl ding pen hi theilo hi ci in Micrel amah guak in akte, uiphukte khei in amah guak kisin hi. Sisan amuh loh nading mitlimlang vom te bulh in ahanciam hang in gualzawhna ngah zolo hi. Sisan hing gimnam azak phet in aluvaih kipan pah lian hi.
Sisan muh loh nading, ki-atna a om loh nading in pumsung lam natna tawh kisai asin ding in sang aa asia te in hanthawn uh hi. Ahizong in pumsung lam natna ah zong ki-at akul hun aom lam amau phawk kha lo uh hi.
Ki-atna khan sung ah luvai aa puk Micrel pen hibang tawh ama anawt ding ahi thei nawnlo hong hita hi. Hih bang in sangkhawl in inn hong ciah hi. A lupna khan sung ah tu in thanem lungkia in aom hi. Amah le amah gui-awk, kentuak ding zah dong angaihsun hi.
Micrel a it phadeuh api ahileh hih bang thu huhau in alungnuam hetlo hi. Micrel tawh kimu in hoihtak hopih in thapiak ding api in hong ngaihsun hi.
Tua ni nitak in api in “Leitung lim” tuamtuam pawlkhat hong tawi in Micrel ii khan sung ah hong lut hi. Tua pan tua lim te khat khit khat Micrel hong lak hi.
Api ii nasep sep pen Micrel in tello hi. Anunung pen lim alah khitteh api in Micrel ii sam te hong zutkawm in “ka tu nu aw hih leitung ah ‘Rome’ khuapi bek aom hilo hi. Ka tunu lunglut ding hilecin Rome khuapi bang aa hoih, Rome khuapi sang zong ahoihzaw, anopci zaw mun te zong na tung zo ding hi.”
Api ii hehpihna mittang te amuh ciang Micrel thakhat thu in khasia in hong kap hi.
Khitui te in Micrel ii nidang aa alunggulh ngimna te hong taaikhia hi. Thu khat peuhpeuh hang in ih ngimna tawh kipelh hun ahihkeileh ih ngimna ih tangtut zawh loh hun ciang in ki lungtang khauhsak in ih phut tantan na pen ei-le-ei kibawlsiatna nam khat ahilam aman hong thei ta hi. Ih mai-ngatna akhialh leh lamkal ah dinkhawl in athak ngimna lam mai-ngat in mainawt ding ahihlam aman telta hi.
Micrel pi’ ii limte tung ah ih lungdam ding ahi hi. Tua ni nitak khuamui kawmkal kantan in kham amel apua nitang le khalhuih te tawh akidim ni, nitak khat ahi hi.
Micrel sang dang khat hong kah hi. Lukhu neelkai angah khitteh thuthang kizakna laihawm sung khat ah Leitung hong linglawng sak zo Barbie milim te ii thu tawh kisai kikupna cih lai hong sim kha hi. Barbie adeih phadeuh mite in Barbie ii pumpi pen khauh lua. Hi gega lua. Atat theih nading in kizopna nei kei lua. Amit vang neu lua. Mihing te lim le mel tawh hong kibang semsem leh lunggulh huai cih kikupna te hong simkha hi.
Mihing pumpi tawh akibat nading guh le tang tawh akibang aguh lomte Micrel’ mitkha ah hong kilang hi. Nidang aa asin ngei atheih ngei pilna te Micrel in hong phawk kik hi. Tua khit teh Mixko company ah nasep hong lutin leitung aa mi tampi te deih uh ahi Barbie lim te mihing tawh akisun zaw ding le mihing te bang in akhut akhe tang thei ding in guhleh tang bawltawm in hong bulhsak hi. Barbie te ii taltang azai zaw in bawl in amittang te zong agolzaw in hong bawl hi.
Nidang in sisan mu leh luvai in apuksak thei tua siavuan pilna pen ki lungtang khauhsak in sinsuak leh tuni in Micrel bang suak ding cih kigen theilo hi. Bang mah asuak loh ding ban ah agamla munkhat pan alunggulh mahmah Rome zong tung kha lo ding hi.
Ataktak in piteknu gen pen aman ahi hi. Leitung ah Rome khuapi bek khuapi om hilo hi. Rome khuapi bek ngimna in akikoih thei hilo hi. Rome khuapi sang ahoihzaw, Rome khuapi zah mah aa ahoih khuapi tampi om lai hi. Lailet: Peter Suumpi/ Meiwenzhan
Comment piaknop aomleh...