KHENSAT LEH KHENTAT
(kei’, ngaihsutna le muhna) Khauzangneu tampi aki heekkhawm khauhual khatpen, satsat lecin, akhau zangneu te hong tattat ding hi.
Khauzangneute akitat bei/gaih masiah tua khauhual ki satsat theilai ding hi.
Khauzangneuteng khempeuh hong tatsiang khitciangin, tua khauhual kisatthei nawnlo hi.
Kisatthei nawnlo cihpen kitatkhin cihna hi.
A ngawng heeka igawh akpen, anuntakna akitah(kitat) mateng, akha le akeng te kisatsat hi.
Electric khauzangneuno khat atah(tat) masiah meipai theilai hi.
Thukhensatte icihpen, aki khentatnailo thute ahi hi.
Deihloh hunhuna makai lutang khatpeuhin akheel’ alaihziauziautheih, kawlgam kumpi’ thukhunte zong thukhensat hikhathei ding hi.
Zudawnnawnlo, zateepnawnlo dingin ”ka khensat hi” acih leh, dawnkikthei, teepkikthei cihna hi a, ”ka khentat hi” acih leh, zangkik nawnloding cihna ahi hi.
Aki khentat nailo, pawlpi thukhensat acih tezong kheel/laih ziauziau nuam uh hiding hi, ci in ka um hi.
Ka lungdam, Munkhai’pa
BUSZUI MAW? MEILEENGZUI MAW? SAKOLNUNGZUI?
1984 kumin, Manipur Imphal khuapi ah, Literature a Ph.D. Pu Dr Kam Khen Thang innah ka hawh hi.
Amah’n: ”Lamka pan bang tawh hong pai nahia Pauno?” hongci a, ke’n: ”Bus tawh” ci in ka dawng hi.
Amah’n: ”Bus tawh hongpai nahih leh, nang abus mai ah paimaw? abus nungah zui maw? ai’hkeh, bus tawh maikim a hong tonkhawm maw? hongci a,…
ke’n: ”Abus tungah kei hong tuang” kacih teh alungkim zopan hi.
Ama deihna bel ”bus tawh” cih pongmawk pen kicing asalo ahi hi.
Keizong lai le kampau maan zatding kisin kawmkawm lehang a ut kahi hi. Sakolnung azuizui Zomite ihita zongin, motor meileeng vanleeng te’nung bel zui nawnkei leeng ut ing.
Ka lungdam, Munkhai’pa
ZEISU KISUANGTAAK
Ihihna bangbang, ihihna zahzah tawh lungkimin, Topa lungdam’ kokou ni.
Lungkim a, lungdam’ akote’ tungah a LUNGKIM PASIAN ahi hi.
Buhciimsiang bekbek mah anezo innkuan khatin: ” Topa, lungdamlua ung. Buhciimsiang nong neksak zawhden manin na min hong phat ung. Cidamna tawhzong ki tuak penbek thamlo in, lim kasa mahmah uh hi. Ko’ innkuan adingin na hehpihna kicing hi” ci in, ziing le nitak sialin lungdam’ akohkoh denmawk uh leh,..
“Buhciimsiangbekbek hanga hizaha lungdam’ hongko’ denmawk” ci in, tua innkuante’ tungah, Zeisu naki suangtaaklua ahihmanin, tuani a kipanin, buhsih le sameh lim zong nezelzel zo pahpah thithe uh hi, ci ei’ leh… Halelu jah!!!
Ka lungdam, Munkhai’pa
Video: Itna Kip Khosak in ~ Lengtong Pauno (lamal hilhcianna)
https://www.youtube.com/watch?v=7f7rCgZ-OTU
LUNGKIM, LUNGKIM, LUNGKIM…
(…gam 3na ngakte’ nisim nuntak pihding)
Late. 37:4. TOPA sungah LUNGKIM in, amah in na lungsim deihna hongpia ding hi.
Late 147:11. Amah zahtakin, ama itnakip amuang mite’ tungah, TOPA a LUNGKIM hi.
Gamlakvakna 14:8. Eite tungah TOPA a LUNG KIM leh, bawngnawi leh khuaizu aluan’na leitangah eite hong paipihin, eite tungah hongpia dinghi.
Notes: Eite tungah TOPA hong LUNGKIM nak leh, imaavangin, ilamzang ding hi.
Ka lungdam, Munkhai’pa
Comment piaknop aomleh...