Naupang leh Sum (Cidamna kiukhat pan)
Adiakdiak in Myanmar gamsung ah naupang te aki itbawlpian ciangin mohlei nading ci’n sum kipiathei hi. Pawlkhatbang sangkahding “mohphu” aki piakkeileh sang painuamlo cihkhawngzong omtheiliang hi. Tuabangin khutsungah sum kipia pen Myanmar naupang te sungah ki limmuh phadiakleh kilawm hi.
Sumpen amannei mahmah vankhat ahihzenzen hangin, akihhuai penpen vankhatzong ahihi. Mihau, mizawng, khutdawhngen, ninkhawm, zato sungah nasem, misibuk ah nasem, ekbuksil cihte dongin minamkim tuamtuam ii khutsung ah akileh kawikawi ahih manin, tua sumte pen siangtho hetlo in, kihhuai mahmah hi.
Na tate sum napiakciang inzong tua sum napiak, sum atawina akhutte uhpen sawpsiang, silsiang cih omhetlo in, asawtlo in amuk, akamsung lawnna in neikha theiding uhhi.
Sumpen asiangtho dingin saban “Soap” khawngtawh asawp tangtang cihbang kuamah omzenzenlo hi. Sum tungah lungno aomloding in lungnoza akapden cihbangzong kuamah omzenzenlo hi. Tua ahih manin, sumpen akihuai mahmah vanzatkhat ahihi. Sum tungtawn inzong natna lungno tuamtuam kilawhthei hi.
Tua ahih manin nute pate in naupangno tepen sum piak huai, tawisak huai khollo hi. Naupangno tepen apumpi sungah lungno natna te adalding khauhnailo ahih manin, ulian te sangin cinabaih, lungno kilawhbaih zawlai uhhi. Na tate moh anekding nadeihsakleh nangtektek in leisak in, amohngiat in piakding hoihzaw hi. Sum tawh napiakziau pen moh tektekzong naleilo khathei a, kunza, kunpawng, khaini, sahdah, etc… cihbangpeuh naleithei sawnsawn uhhi.
Myanmar gamsung phadiak ah mohzuah nupi te’n khuttuam “Gloves” cihbang azang tamhetlo a, akhutguak in mohkanding khawng mekziahziahlel uhhi. Tua akhutpen sawpphot tadih cih omlo in, tua akhutmah tawh sum kipialeh sangsukpah, nikkawmkhawng, puansungsilh awmsung khawngah hensukziau theilai uhhi.
More: Naungek suakcil ending in napai ciang theihhuai pawlkhat
A khangto gamte ah sum laidal “Cash” kizang nawnlo in, Credit Card, Debit Card cihbangdan vive akizatna pen cidamna tawhzong akituak mahmah ahihi. Azangzo nailo ei mizawnggam te’n ihtate acidamding ihdeihleh anu apa te’n ihkepsiamding akisam ahihi. Naupang cidamlo, acina pahpahthei acici nute pate’n ihtate bangcikep ihhiam cih etphat huai, ngaihsut huai hi. Ref: Child Health Myanmar Sawltak #zomidaily
Comment piaknop aomleh...