London khuasung ah migilo te khutlum pan sidek in akitai laitak pasal khatin Beer haikhat nataipih valval

London khuasung ah migilo te khutlum pan sidek in akitai laitak pasal khatin Beer haikhat nataipih valval

Nungsungteng London khuasung ah Terrorist mi ngongtatte gamtatna hangin mipi linglawng mahmah in buaimahmah uhhi. Nung Saturday ni zanlam in Terrorist mi 3 in London khuasung ah mawtaw khattawh mipi phulgawp in taihsakgawp uh a, tuakhit ciangin temta tawh adawt manman dawtlum uhhi.

Nung Saturday ni London khuasung buaina hangin Terrorist mi 3 tetawh akigawm in mi 10 si a, adangzong mi 48 takin liamlawh uhhi.

Tua Terrorist te’n London Bridge tungah mawtaw tawh aphilgawp laitak in mipi te laulua in taikekgawp uhhi. Tualak ah pasal khatpen lau in ataikhia hisam napi’n akhut sungah adawnbang Beer hai “Pint” pen nusia ngamlo in, taipih citciat hi.

Sky News te’n tua mipi alau in ataiziahziah laitak Video azaihna ah hihpa pen Beer haikhat tawh taikawm in, agei ah midang ataite’n makhelh ziahziah uh cihi.

Hih Photo pen nungsungteng Twitter leh Social Media tuamtuam ah gammeikang “Wildfire” bangin tawmveisung in kizelgawp pahhi.

Banghun in mawtaw in taihlumding cih kigentheilo, banghun in temta tawh hongki dawtlumding cih kigentheilo in luangkham in aki taikek laitak Beer haikhat nusia ngamlo in ataipih pen lamdang kisa mahmah hi.

British Newspapers te’n tuapa pen thumanlohzia limlahna “symbol of defiance” ci’n genkhia uh cihi. Twitter tung ahzong Henry Slesser akici khatin “True symbol of the British spirit as man flees terrorist attack clutching his pint” ci’n gelhkhia cihi.

Abeisa kum 10 sungah London khuasung Tourist Shop te ah “Keep calm and carry on” cih World War II Slogan kisuang kawikawi ci’n tua Beer hai tawikawm in ataipa pen “Keep calm and carry on” taktak hi acizong om uhhi.

Video: Man Flees London Bridge Terror Attack Holding A Pint Of Beer

Pawlkhat leuleu in ciamnuih uh a, London khuasung ah vanman tamlua mahmah ahih manin, anusia ngamlo hiding cihsan uhhi. “London Spirit” ihcihcih tua aive ci’n aciamnuih zong om uhhi. “London Hero” acizong pawlkhat mah om hi.

Khatleuleu in Twitter tungah hih Beer haikhat pen Sterling Pound £6 (US$7.74) tak manmawk hiven. Ka taipihmah keimaw ci’n kheltak in gelhkhia hi.

More: London khuasung ngongtat te buaisakna “Terrorist Attacks” hangin mi 10 si, 48 liam

Beer mahmah, zu mahmah a iplah tentan te lakah khat hingelngel dinghi. Nangzong na utdandan in na Comment gawpdih ou 🙂 ZD Sawltak #zomidaily