Malaysia ah Astro TV Channels aguk in athuahsak mi 6 kiman

Malaysia gamsung ah Astro TV Channels pen ataktak sangin aman tawmsakzaw in athuahsak kawikawi mi 6 kiman cih theSun pan kiza hi. Astro TV Channels pen Online Streaming panin khasim asaapman atawmzaw in midang te kawmsakkik uh a, tuapen thumanlo “illegal” namkhat ahihi. Tuabang in aki thuahsak tepen “Pirated Astro Channels” kici hi.

Tua akiman mi 6 tepen pasal vive hi uh a, kum 39 panin kum 53 gualpawl ahi uhhi ci’n Bukit Aman Commercial Criminal Investigation Department (CCID) director Commissioner Datuk Acryl Sani Abdullah Sani in genkhia hi.

Kuala Lumpur, Johor Baru khuasung tuamtuam panin April 20 ni akipan akimankhia toto uh ahihi.

Tuabang in amatkhiatna ah Online Live Streaming in azat uh Modem Unit 12, Router, Astro Decoders & Cards Unit 500 val, Adroid Set-up Box, Mobile Phones, Computer Tablets cihbang in avanzat uh tampi zong matkhiatsak uhhi.

Hihbang in agamta kipawlna te’n Astro TV Channels pen atawmzaw in thuahsak in, Malaysia gamsung ah 2015 kum khawngpan in akipan uh cihi. Malaysia gambup ah amaukiang panin Astro TV Channels azang Customers zong mi 30,000 bang neikhin uh a, khasim in sumlut khakhat RM900,000 bang ngahden uh cimawk hi.

Hihvai tawh akiman tepen Friday ni akipan “Section 41 of the Copyright Act 1987” thukhun tawh kizui in thusitna kineiding cih kiza hi.

Tuaban ah CCID ulianpipa genna ah hihbang in thumanlo in “illegal cable television” ah akawm, Subscribe abawl tepen “Copy Rights Act 1987” cih thukhun tawhzong kituaklo ahih manin, azangkha tezong mawhna nei uhhi.

Hihthu hangin gamsung mipi tezong pilvang in hongki dawmding in ki lamen hi ci’n genkhia hi.

Malaysia gamsung aom Zomi sungah “Astro TV Channels” alakha na om uhleh hoihtak na sitpha un. Astro TV Channels pen a Company taktak panmah ahiam cih theihcianhuai hi.

Summetbawl te’n hong gukthuahsak “illegal” ahih khakding kidop huai mahmah hi. Vankham namkhatmah hi a, azuakte bekin thuaklo in azangte inzong ki thuakkha theidinghi.

Nidangin Setapak vengsungah Astro TV Channels atawmman in athuahsakthei om cih ki zakha ngei a, summet bawlna aguk thuahsak tepawl hingelngel khading hi. Tukpeng “Football” a uk phadiak Zomi pawlkhat Astro Channel azang om ahih manin, “Pirated Astro Channels” khawng ihzat khakding kidop huai mahmah hi. Hih http://www.astro.com.my pen Astro Company taktak hi a, amau kiangah dotcianna ki neithei dinghi. ZD Sawltak #zomidaily