Kiteelna, kidemna le Party kician ~ Pau Sian Lian

Kiteelna, kidemna le Party kician ~ Pau Sian Lian

Myanmar gambup in tukum November 8, ni-in kiteelna khat i nawk leuleu ding hi. 2010 a kipan hi leh athum veina hongsuak-a, kiteelna tawh kisai kidop huai, theihhuai cih a kipan thu tuamtuamte ahi ciangkhat i theikhin ta hi. Ahi zongin politics paizia te zong kibang denlo, a hunzui in kikhelna om toto ahih manin, hih thului sungah kiteelna vai lungngaih huai pawlkhat kong kum nuam hi.

Asuakta le Thuman Kiteelna (Free and Fair Election)

Hih pen i zakzaksa thu ahi phial zongin kiteelna ah suahta takin meetang khiat theih nading le kideidanna omlo thuman kidemna ahih ding gen phapha nuam hihang. Kiteelna pen minam makai ding le minam vai-ah tanu hong sem dingte teelna pawipi khat ahih manin kipattung limlim in, mipite in suahtak takin a teel, thuman thutak tawh kipankhia ahih ding kisam masa hi.

Kiteelna pan lamet zahsang kimang in, a kizang thei zaw mipi tangmi le lamet a bang ngiatlo, muan a banglo tangmi zong kimukhia ding hi. Tua ahih manin atung pekin mipi te-in lungkim takin a teel uh ahih nakleh a sia a pha thuakzo zawdeuh in kuamah ki mawhsak theilo pah hi.

Kiteelna pen mikhat pum ukna, mi tawmno te thuneihna (dictatoship, hierarchy system) leh do kik theihna lampi khat zong ahi hi. Tua bek thamlo, kiteelna pan a gualzo te bekin gam tuamtuam kumpi te le gammi te’ theihpihna (legitimacy) ngahpan uh ahih manin na meetang pen gam le minam ading manpha mahmah hi. Tua kawmkal-ah party te’ thu ngaihsut sim theih gige ding khat omhi. Mipi tangmi cih peuhmah in meetang (vote) nih vei kisam uhhi. A masa in mipi tangmi suah theih nading in mipi’ meetang kisam uh hi.

A nihna-ah mipi tangmi hih khitteh kumpi innpi (government) sungah amau geel, thusun te a taksuah theih nading in palai dang, tangmi dang, thunei dangte panpihna kisam lailai uh hi. Tua ahih manin kal masa ahi, tangmi ding na teelma in kal nihna ahi kumpi sungah lut khaleh mee a koicih ngah uhtam?, cih kancian masak huaihi. Tua teng ciat khit teh kuama thuzawhna, holhthawhna manglo in, ei mimal lungkim ngiat mipi tangmi ding khat tha piak ding ahi hi.

Idea Kidemna (Competition of Ideas):

Kiteelna pen tangmi ding teelna ahih hangin mimal meel-le-sa, beh-le-phung, pau-le-ham cihte thupi masa lo zaw hi. Tua bek thamlo party’ min-le-puam, logo le dialkhai (flag) cihte zong thupi masa zawlo hi. Tuate khempeuh pen olno takin laih theih thu hilel hi. Tuate sangin political partyte’ kiteelna i cih buangin, a party dinpih political thupai zia (political ideology), party policy, party kiteelna kamciam (manifesto) le ngimnapi (strategic plan) te thupi mahmah zawhi.

Hih teng kician takin a neilo party pen kilamzia picinglo party (uninstitutionalized party) ahih manin mipite panpih ding cih sangsik hong sumsak zaw theihi. Tua ahih leh party muan huaina koi cih sit ding? cih hong lunglut huaihi. Tua dan etcianna (assessment) nam tampi om-a telnop dingin, SMART zangin etcianna pen i ki hawksak kik nuam hi. Party ngimna, geelna tawh kisai dotna nam 5 omhi.

• Kician/tel sitset hiam? (specific)
• Kiteh thei hiam? (measurable)
• A kizo/ngah thei takpi mah hiam? (achievable)
• Kisap takpi le kisem thei takpi-te mahhiam? (realistic)
• Hun a lapzo diam? (timebound)

Hih dotna teng tawh meekuang lui party-te sit phatphat huai hi. Tua bek thamlo a mimal i muanhuaina le kiciatna (qualification) zong et kul hi. Meekuang lui ma-in bangteng sem ngei, bang thu lam ah kiva in politics a tel takpi mahhiam? cihte thupi ding hi. 2010 khit a kipan meekuang luingei, mipi tangmi zong a tawm pen term khat a sem ngeite in meekuang hong luikik leuleu uh le theih ding thukhat om hi. Term masa a sep lai-in a sepnate tha nangah takpi le teelkik theih ahi hi. Ahi zongin term masa lai-in tha nangah kei le term nihna zong hong kilamdang hetlo ding ahih manin teelkik huai nawnlo hi.

Kigalna ahilo Kidemna (Competition, not conflict)

Kiteelna cih pen a zo, a lel cih a omden kidemna pawipi khat ahi hi. Kiteelna a gualzote in a lungdam mahmah uh zah khatin a lel-te in a thuaklah theihuh kidemna khat ahi hi. Tua ahih manin kiteelna pen lungsim picingsa gamte ah zatui hi napi lungsim toi, niam gamte ah gu suak mun mahmah hi.

Africa gam a kipan gamsung buaina, tualgal tamna gamte bang-ah kiteelna om kumin gal-le-sa adai ding bang tase mah le kiteelna om khit teh kihuatna kidona thak tawh buaikik in, galvai tamzaw khat hei mawk hi. Myanmar gam zong leitung ah tualgal sawt pen gam hi-a, Zomi te lah a kilemlo diak minamte hita sawnsawn hi. Minam dang, gamdangte sangin kidop, kikep ding tamzaw hi.

Party te-in kiteelna ni a tun dong khat-le-khat kidem, kiphin in akitawngkha phial zongin, gam le minam it takpi le kiteelna man khit phetin khut kilen in minam ading na sepkhop theih ding kisam hi. A gualzo party te-in kiphasak kha loin gam-le-minam ading in mipil, mi muanhuai te pawlbawl in zot kul-a, gual lel partyte-in zong gam-le-minam hamphat nading ahih nakleh lawp takin panpih kul hi.

Tua bang hih theih nading in party makai te le nungzui tengin “Gam-le-minam puah nading party a zang maw? Party thakhauhna dingin gam-le-minam a zang ka hiam?” cih kidot thapaih huai hi. Party pen i lungtup ahi mipihte’ phattuam nading in a kizang lampi, molhtum a hih ding kiphawksak kik phapha ni. I ngimna a kibat nak leh gal hilo lua kisa lawm vive i hi hi.

Thukhupna:

Myanmar gamah kiteelna pen kum nga (5) khatvei ta kinei ahih manin, kiteelna khat vei neihtawh leitung hong bei suak pahlo ding hi. Bus i tuan teh khawlmun (station) khat-ah tawlnga pakin kilaihna om den hi. Tu amah bangin kiteelna om sim party khatpeuh hangin minam bup kisiat khak loh ding thupi mahmah ding hi. Kiteelna hangin i deih mahmah party khat peuh hong guallel, bei mangziau kha mai thei hi.

Ahi zongin patauh huai peuhmah lo hi. Antifragility ngaihsutna tawh en le hang tua zahin a beimang lawmlawm party pen a mau (party kipawlna) kicin lohna, natna ahih manin tua dan party te a bei pen mipi ading hoih zawsop thei lai hi. Bang hang hiam cih le a thanem party in mipi hong thakhauh sakzo hetlo dinga, a thanem party khatpeuh hong mang phial le zong, hun khatteh tua mun-ah a hatzaw, picing zaw, kician zaw party thak khat hong piang kik thei lua lel hi. Dr. Pau Sian Lian, Ph.D