Jakarta khuasung Bus khawlna khatah Bomb puakkham, mi 5 si, 10 val liam

Jakarta khuasung Bus khawlna khatah Bomb puakkham, mi 5 si, 10 val liam

Indonesia gamsung East Jakarta khuapisung ah zanni Wednesday nitaklam in Bomb nihvei puakkham in mi 5 si cih CNA pan kiza hi. Suicide Bomb aki sukham hi a, asi mi 5 lakah Suicide Bomb asukham te mi 2 leh Police Officers mi 3, akigawm in mi 5 asi ahihi.

Bomb kitap pen nitaklam 9pm hunpawl in Kampung Melayu Terminal kicihna Bus Terminal khatah apuakkham ahihi. Asi mi 5 banah adangzong mi 10 val liam cihi. Aliam te lakahzong Police Officers pawlkhat kihel uh a, khuasungmi Civilians tezong liam uhhi.

Hih Suicide Bomb asukham pen kua kipawlna cih akician in kitheicianlian nailo himahleh abeisa inzong IS migilo te’n buaina piangsakden ahih manin, tuate ii gamtatna mah hiding in ki ummawhpah hi.

National Police Spokesman Setyo Wasisto in Reporters te tungah agenkhiatna ah amasa in Suicide Bomb aki sukham pen mikhatbek hiding in ki ummawh himahleh, ataktak in mi 2 hiding cih genkhia hi. Police Officers 3 takin sihlawh ahih manin, akhasiatna zong pulakkhia hi.

Aliam te lakahzong Police Officers mi 5 kihel a, adang Civilians zong mi 5 mah kihel uh cihi. Suicide Bomber tepen anih in pasaltuak hi uh a, aphual mahah sipah uhhi.

Hih Bus Terminal pen Minibus leh Bus golpi te in phualpi in aneihna munkhat ahihi.

Video Clip aki khahkhia pawlkhat ah Bomb akitap ciangin mihingpumpi anengneng in aki thehthang, akhut aki lawnkhia cihbang in mulkimhuai honkhat ki muthei hi.

Video etnopleh: Five die, including suicide bomber in Jakarta blasts

TV sungahzong aki suahsakna ah Kampung Melayu Bus Terminal panin meikhu khuto in, Police Officers tezong aphual ah adelhin buaimahmah uhhi. Bomb kitapna munteng Police Officers te’n khaukhung in umcippah uhhi. Zankimlam ciangin Bomb hemkhiathei “Bomb Squad Official” te leh Sniffer Dogs te’n aphual teng sitcianna nei uhhi.

Ageinai ah amukha te genna ah Bomb puakkhampen akizomphial in puakkham cihi. Nitaklam khuasung mipi te nasep ciahding in Bus khawlna ah akiphut ziahziah laitak nai 9pm hunpawl in apuakkham cihi.

More: Indonesia ah naupang kha 10 aphapan khat agilsungah naupaai ahih manin Surgery kibawlding

Britian gamsung Manchester ahzong zandiak mahin Suicide Bomb puakkham in, mi tampi in sihlawh in aliamlawhzong tampi mah om uhhi. Tua Manchester vaizong vengnailo, tu’n Indonesia, Jakarta khuapi sungah Suicide Bomb puakkham leuleu hi. ZD Sawltak #zomidaily