Gullu Mual vai ~ Pau Khan Thawn

Gullu Mual vai ~ Pau Khan Thawn

Gullu Mual tawh kisai in asem abawl agim atawl te khempeuh zahtak huai, pahtak huai mah mah uh sa ing. Thupi uh zong sa ing.

A kigen a ki gelh sa te mah bang in ei kammal zat khat tawh I khasiat, I thadah sak khak loh ding thupi mah mah ding hi.

Kei muhna tawm hong kum nuam ing.

Tu laitak aa sente tawh ding I deih loh hang in Zogam in ki-ukna I ngah ciang, ahih kei leh Federal State I hih ciang in tawh ding cih bang ciang peen I lam et khak loh zawh ding kisam sa ing. Banghang hiam cih leh I gam khuahun pai zia peen in tua lam manawh ding mualtung mi te I ut hang in tu laitak aa gam uk kum pi te ut hiau loh uh cih I theih sa hi. Ni khat ni teh I ngah phial zong in tua ni ma in Gullu mual tawh ding hong vai hawm peel mawh ding uh hi. Tua hih leh zong sente hi lo in mikang gam lam te in hong to leh lunggulh huai zaw mah mah hi.

A khangto sa gam te sep dan.

A khangtosa gamte ka cih hang in ka phak ngeina gam tam het lo a hih man in ka om na Singapore te leh Malaysia te sep dan kei theihna ciang ciang honghawm nuam ing. Gam dangtuam tuam te in zong tua dan mah a zang tek uh hi.

A company te leh kumpi te in a thukimna lai sung uh ah a nuai aa thu te hel uh hi.

1. Nasem te in thaman a tawm peen bang zah ngah ding. Nipi khat in nai bang zah sem ding aa tua a val leh hun val man pia ding. (Hun val man peen ko kiang ah a zah khat leh a lang hi in public holiday teh a zah nih hi.) Hih peen nasemte a’ ding hi.

2. Kipat cil in company mi nasem (worker / admin) (%) bang zah, gam mi bang zah hi ding. Kum sim in gammi nasem (%) bang zah khan to to ding, kum bang zah ciang gammi nasem (worker 100%, admin / management staff 50% or 80% or ???) hi ding. Tu aa peen gam a’ ding hi. (Tu laitak sen te in a mau gammi bek bek tawh sem cih peen gam gina khat hi le hang a hi thei lo thu hi.)

3. Kim le paam (environment) siangtho sak ding. Hih thu peen thupi hi. Nasepnate pan tui ki mawk buak thei lo hi. Construction site te ah tui peen chemical ki hel lo ahih hang in buan tui ahih man in buantui te public drain ah ki khah thei lo hi. Ki siang sak phot hi. Tuisiang a suah ciang in ki khah khia thei pan hi. Factory pan ahih leh chemical ki hel ahih man in “GU TUI” “POISONOUS WATER” cih theih hi. Tua te khempeuh a company in a siansak (refine) phot ding kisam hi. Tua khit ciang in ki khah khia thei pan hi. Pawl khat peen tua bang aa sian sak theih pak hi lo a hih man in ki pua khia ngiat hi. Tua siansakna asem company tuam om ngiat hi. Factory te pan zong huih ki mawk khah lo hi. Ki siang sakphot in huih lak ah ki khah khia pan hi. Ministry of Environment te in encik in tuilak, huih lak ah mihing te a’ ding aa a hoih lo phangphual, nin, chemical cih te amuh khak uh leh tam pi pi liau sak uh hi. A nasiat leh thongkhia, company khaksak cih zong hi thei lai hi.

Hi Hih sung ah public drain ka cih peen ei a’ ding in hawkguam, lui, gun cih ding hi. Factory pan aa pu suak tui khempeuh guam sung te lui sung te ah hong khak loh ding uh thupi mah mah ding hi. A ki siangsak khin tui te bek hawkguam, lui no, gun te sung ahh ongkhah pan ding uh hi.

Hi teng peen Tampi lak pan ei tawh a kisaipak leh ka phawk theih pak teng kong gelh khiat hi.

Hih thu peen kumpi te sep ding a hih hang in ei gam ah hong sem zo khol la kha ding uh a hih man in eite mah GTN: ZYA te maw, ZCD pan maw Environmental Department khat nei in tua te in monitor det ding, huih le tui te testing bawl det ding, tua a’ ding van te zong i neih ding kisam mah mah ding hi.

Sente in tua thute a gam sung mah mah uh ah zang kei le uh kilawm ka sa hi.
A gun uh si suak zel, tu laitak huih nin tawh buai mah mah uh.
Kawlgam ah zong zang lo uh a hih lam Letpantaung vai bang ah kimu thei hi.

Tua ahih manin Kawlgam, Khamgam a’ om u le nau te aw,
Kumpi in gamdang te nasep ding I gam I lei ah hong sawm uh ciang un, thukimna hong lak ciang un, a tung aa thu te na dong mang ngilh kei ta peuh un. I kumpi te in tua thu te ngaihsun khol lo kha thei ding uh hi. Thukimna hong lak ciang un a hih kei leh press conference a ki neih ciang in dot peel mawh ding kisam ding hi.

1. Tha man atawm peen bang zah hi ding?
2. Nipi khat nai bang zah sem ding? Singapore ah nai 44 hi. Kawlgam ah nai 40 hi. Tua nai 40 zui ding maw, zui lo ding. Zui lo ding a cih leh bang hang aa zui lo ding?
3. Tui nin te, huih nin te koi bang in control ding?

Ei khak tan bekbak thei bel om khin kei zaw kha in cin, ka cihsa mah bang in American te Europe gam pan aa te hi leh konggen sa thu te a mau a zat zat sa uh a hih man in zuih hak sa lo ding uh hi.

Sente a hih leh bel zang ngei nai kei le uh kilawm in “aw” hong ci phial zong un a tak tak in zui zo lo kha ding uh hi.

A tung aa kong gelh teng peen Gullu mual bek hi lo in i gam hong khak to tak pi leh factory tuam tuam hong kihong kha ding a hih man in i theih kholh ding kisam mah mah ding hi.

Kei muhna dan hi.

I biak Topa’n Zomite leh Zogam thupha hong pia ta hen.

Pau Khan Thawn
Singapore
2013-02-02