8888 phawkna ~ Pu Thangboi

8888 phawkna ~ Pu Thangboi

1988 kum buailai in mipi’ lungphona khempeuh university sangnaupang te’n makaih hi. Tua hunlai in university pen Zangkong leh Mandalay bek ah om hi. Buaina hang in sangte akikhak ciang in sangnaupangte hong ciahto ngeingai uh hi.

Ni khat Tonzang a university sangnaupang teng ka inn vuah hong pai uh a, inn sung ah kong kikalh in thu kikum uh hi. Ko pawl bel inn mai ah ka tu ngeingai uh hi. Thu kikup aman ciang un hong pusuak uh a, amakai Pu Pau Khen Sing (L) in “Zingciang zingsang in kadaang ah khuazang in kituah ngeingai ding hihang ei” ong cih ciang in athu katheih loh hang kalawp mahmah hi.

Tuahun lai in Tonzang pan university sangnaupang lak ah ka theih lai – Sia Nang Lian Zam, Pu Sua Kap (L), Pu Hau Kang (CNF), Lambu Phut Za Lam’ tapa (amin thei nawnlo), Pu Pau Khen Sing (L), ka U Thang Len Piang (L) cihte pawl ahi hi.

A zingciang in khuazang bup in kadaang tual lam zuan in kipai ngeingai hi. Tua pan in kigual in lungphona kinei ziahziah hi. Sahang mual ah kah to, Seventh Day biakinn kong ah, Pu Thawng Khua Nang’ inn sak ah, khualai nawkphei in mualpi pan kikawi a tulaitak a bogoke road ah kipai hi. Tulaitak a Chin Shwepyi hall mai ah kikhawl a thugenna om hi. Thugen tampi lak ah Sitni Kham Khan Thang (L), Pu Am Mung, Pi Ceih Lun te’ thugente mah tha kingah pen hi. Pu Am Mung’ thugenna tungtawn in takheuh pan in meiset tu-a mun ah akituah pah lian ahi hi.

8888 Ni

Ahunhun in mipi’ lungphona ki neito zel hi. 8888 (August 8, 1988) ni hong tun ding ciang in deihtak lungphona kawlgambup ah neih ding vaihawm uh ahih man in tua ni mi tamdeuh hih tuak hi. Kei bel tua ni ka vangngaih khinkhian khat i nung zui in asingkang tom kahuh hi. Tuilim lui tung ah singkang tom in ka om laitak un mipi lungphote Pu Pum Thangte’ kong mual ah hong suakphei ziahziah hi. Loud speaker tawh amakaite awng uh ahih man in ki limzak mahmah hi. “Mi 5 ta na kigual vo” acih khawng zong kiza setset hi.

Tua ni nitak ciang in ka Pu (Bo Neng Za Suan) te’ inn ah ka hawhto hi. Aphaitam vua RC biakinn (RC biakinn lui) mai ah Tonu’ Biakbuk khat suang tawh nalam uh a na zodekta uh hi. Khuamial dekdek ta a atung ah 8.8.88 cih gelh uh hi. Tuni dong tua laimalte omlai in ka um hi.

Ka Kisuan Mahmah Khat

Lungphona ki zongsang lua ahih man in nitak khawng ciang in lamdung lamvai ah lamsiauh kawm in lawmte tawh lungphona kammalte khawng ka awnggawp thei zel uh hi. Nipi ni khat sunday school kah kaciah madeuh un ka siamah nu uh ahi Siamah Lam Cing’ min lo in “Lam Cing Lam Cing” kacih uh leh lawmte pawlkhat in ka nung vuah “Deihlo Deihlo” ci’n hong zuipah lian uh hi.

Noptak sa in ot cihtak in ka awng mawk uh hi. Siamah Lam Cing zong khasia lua in sunday school siamah pan in khawl lian hi. Tonzang ah zong om nuam nawnlo in Kawlpi lalsuk a Rev. Go Cin Zam te’ nukik hong suak hi. Ka kimuh sim un ka kisuang den hi. Kam zongsang pong kihi lel a, azakhate’ khasiat ding lam ki phawkkha hetlo hi. Ka kisuang mahmah hi.

Ka Mangngilh Theihloh Khat

8888 ni pen ni thupi ahihna, democracy kingah taktak tading ahihna thu khawng ki limgen mahmah hi. Kei zong lawp mahmah kahih man in ka Pu Nang Za Gin (L)’ kiang ah “Democracy kingah taktak tading maw Pu?” ci’n kava dot leh “Kingah pak kei in cei Bawi” hong cihsan ziau hi. Adang hong genbeh nawnlo hi.

More: 88 leh Kei ~ Pu Thangboi

Naupang lualai aih teh telzo ken teh hong ci zong hikha ding hi. Tuni in tua thu ka ngaihsut kik teh man kasa mahmah a, zong ka mangngilh thei kei hi. Sawt nai khollo ding ih sak leh kum 31 ong hipak mawk e maw. Kumte tampianta ei, Lai nongsim sak lungdam, Mung Laan Thang (Tonzang, Zogam)