Kimpu leh Kimpi – 36 ~ Hau Za Cin

Kimpu leh Kimpi – 36

Nikhat a lamdang mahmah in Kimpu a ihmutna pan hong khanglo in hong awngkhia gawp a, nurse te in a bangci hiam ciin a lupna tungah khau tawh akhihcip uh hi. A sawtlo in a lu hik mulmul a, a khe a khut hong vot duakduak in a cimul hong tho a, a gil hong puak in, a gil sungah huih bebek hong khang in a gil hong gol hanhan hi. Nurse te lungkia in ‘i cina a si ding hi inteh’ ciin a kem a zi leh a meltheihte innpua ah sawl khia in, doctor sam in a en uh hi.

“Bangci a hia?”
“A gil hong gol hanhan hiveh aw, a khut a khe vot gawp hilo maw Doctor”
“Aw, tua ahih leh a gilpuak a kiamna dingin huihza pia un…”
“Aw, aw….”

“Tua a ging du-dut bang ahia?”
“Cina veih pek hi ei Sianu”
“Ka lut thei ding hiam? Kimpu lupna hilo hiam?”
“Himah ei sianu, kong dong thei ding uh hiam? Nang a kua na hia?”
“Kei, nidang lai a Kimpu lawmngaih Nuamno hi ing. Ka lawmlui a cina, si dekdek in lupna tung bek ngakin om cih ka theih ciang hong veh hi ing…”
“Aw, tua ahih leh tawmvei na ngak inla, den ciang lut in maw Sianu?”

“Hallo, u Kimpu, u Kimpu…. bangci na hia?”
[Kimpu, a zatui nek tawh a luvai in a mit hakzo lo a, a mitsi bibiai kawm in] “Kua na hiam? Na aw ka zak ngei hiveh aw”
“Kalai u Kimpu, hong thei nawnlo, nong mu hia?”
“Ka mit hakzolo hi veng aw, kua na hia?”
“Kei maw, Nuamno hi ing,”
“Aw, aw… Nua-nua-nua—-nuaaammmm…. so-so-sooorrrrrryyyyy….”

Nai khat zawh ciang Kimpu zong hong halh deuh, khua phawk deuhta ahih cianga hoihtak kiho theita….

“U Kimpu, na damloh ka zak ciang hong pai hi ing…”
“Lungdam si ing e Nuamno, bang na ci a?”
“Dam zel buang ing, nang a bangci na hia?”
“Kei maw, Nuamno, ka tangthu gen taak kei”
“Gentak lo cih om kei e”
“Hong gen peuh aw, ken zong ka tangthu hong gen ning… i kigawm kik theih nawnloh ding hang zong i tangthu kitheihsak leng hoihsa ing e, hilo maw, hun khat laia ka it pen u Kimpu nai ve…”

Tua acih ciang Kimpu hong nui siuseu a, a cinat zawh kum tampi sunga khatvei a nuihna hi…

“Kei maw, (na theihsa) sang ka tawp ciang, sang pan khua ka tun ciang ka zawl khial te na gai in, ka pa in inn ah na puisak in, zi 2 nei hipah kai ve. A sawtlo a ta nih nei pah. Tua leh nutakna hamsa, letli khawnga vak zel. Nasep lah kigim, nuntakna lah nopzaw cih mahmah omlo, ni khat ka lungkhamlua in zu deihtak dawn gawp… .tua nitak ka gilpi hong na, tua pen zu ka dawn kik sima hong suak kik zel, gilpi na a nei to den, tuni a tung kai-ta ve…”
“U Kimpu, sang i kah lai zu dawnlo hive cin maw….”
“He, tua maithak muak zana nong dawnpih, nong ciapsak pan a kipan kaive… tua nitak ka hih ngeiloh tampi hihkha ka hi…”
[Nuamno kisuanglah pian]
“Tua pen kei kong sinsak hi tuanlo pi, u Kimpu, i lawmte tawh gualnopna ciin i dawnkhawm, i giakkhop hi lel hi ven….”
“Tua pen kizom suak sak kha ing a… kei a kamsia hi ing”
“Ei zong tu dong mah kidawn a kisiatpih lianglo pi u Kimpu, nang tam dawnlua nai ve, na damciang na kidek kul ding hi…”
“Kidek sawmta mah hing. Ka dam leh bel zu ngawl ding, ka damkikna a hang leh hong damsak kik pa thu gena tangko ding cih ka geelna hi”
“Kong phakloh gim nam leuleu ve cia u Kimpu”
“Kei pen mihing siamna tawh a damding hi nawnlo, ka dam kik leh tunglam pan damsakna hi ding hi”
“Tua bangin kisiat ngaihsut kei in u Kimpu aw”

“Nuamno, i thugen a dang khel ni. Nang bangci nuntak na hia?
“Kei maw u Kimpu, sangpan degree ka zawh ciang lawmngaih lah neilo, nungakpi kihi mai…”
“Tua leh?”
“Tua leh ka khuaval dante mite in hong thei ahih cianga, mi ngeina tampi in hong hel nuam vetlo e…. nikhat galkap a khuan (leave) ciah khat hong om, tua in hong en nuam pian ahih cianga kei zong va naih, kimaingapsak…..”
“Tua leh?”
“Tua leh khawng hong kawi nuam e maw, kei zong utlo, kei tua bang ziauziaute hi keng ci…”
“Tua leh?”
“Tua leh aman ‘lawmngaih na nei hiam?” ciin hong dong phophot?”
“Kei zong, ‘nei ngei mah ing’ ci ziau”
“”Ken hoih hong sa ing, nang nong ngaihsun zo diam” hong ci”
“Tu zan hong ngaihsun lai ning, zing ciang Zomimio college niangtui sai ah kimu ni, tua san ah hong gen ning” ci…. amah zong ciliing daldal a ciah…ka nuihza bang za pian e maw…”
“Banghang in maw Nuamno?”
“Ken, lawmngaih neilo e… ahih hang a neilo bang kigen utlo e… neilo ci leng hong neu muh dinghi ven… hilo maw….”
“Himah ei, numeite ngeina…. tua leh?”
“Tua leh kei zong a zingciang Coffee dawn kawma kimu dingin ka pai sawm hi. Ahi zongin amah Phone in, ‘nai lang zia kai ning’ ciin kiziakai sak…”
“Tua leh?”
“Tua leh amah’n, phamawh kei, hong na ngak ning… kong pui diam… hong ci… ken zong hong pui ken, ka ziakai leh kong tun man kei leh a kimulo hi ni, ci….”
“Tua leh?”
“Tua leh aman, “kei ka khuan a bei kuan hita a, i kimuh loh theihloh hi, taxi tawh hong pui ning,” ciin mawtaw saap in hong pui… kei zong zui mai e maw….”
“Tua leh?”
“Tua leh aman niangtui, coffee, nek ding tuamtuam hong taih, holimlim, …..”
“Tua leh?”
“Tua leh a tawpna ah, aw ling kauhkauh a, “Nang nong gen ding pen” hong ci”
“Tua leh?”
“Tua leh ken zong, “bang maw” ci, a theilo kineih e maw”
“Tua leh?”
“Tua leh aman, “Zanni in Zomimio College niangtui sai ah kong gen ding na cih pen” ci”
“Tua leh?”
“Tua leh, ken zong, “Aw, aimah ve…. kong gen khin ka sa a, tua bel gen kikkik a kul zong hilopi, kong pai ut naak leh a gen khinsa hi lel e…..” ka ci hi”
“Tua leh?”
“Tua leh aman “tua leh hong ngai cihna maw Nuamno” hong ci….”
“Tua leh ken zong ka lu su ngeungeu in, aman zong telsiam pah”
“Tua zawh ciang bangci….”
“Tua zawh kiteng, amah a khuan bei leh pai kik ding ahih cianga, a taam sunga mopawi bawl biangbuang…… zong hong sam manlo kha ing ei u Kimpu, sorry”

“Sorry leh thank you kici den ding i cihte na zat lai manin thupi hong sa ing Nuamno, thank you”
“Kei angtang zaw ing… ”
“Nong hawh lungdam ing Nuamno,”
“Bangmah cih theih omlo, na duh khat peuh na leina dingin hiah sum tengh khat, a cihtak hi kei, na kisap a om leh hong gen in ka hihtheihzah in hong hanciam ding hi ing….”
“Bangmah vehna kul kei Nuamno, nang zong na tate, na pasal ading sum kisamding hiteh..”
“Na dam in maw u Kimpu….”
“Aw……”

Nuamno, a nungak laia sang hoihzaw a kizem sitset in kongkhak a kaan dong Kimpu in a en cim thei kei hi. Galet in a mit zong a phialep kei hi!! “La kik thei lengmaw…. ”

Kha 2 val bang a lup khit ciang Kimpu zong hoihtuam tuanlo, lah sia tuam tuanlo ahih manin sum leh pai a haksat tawh Zomimio khuapi a meltheihte kiangah kikem phot ding maw, inn lam ciahsan phot zaw ding cih a ngaihsun uh hi…..

(zop lai ding)

Hau Za Cin
Phuitong Liim