Kileek kimna (Consistency)

Kileek kimna (Consistency)

Akileekkim cih kammal pen kizawitawn ahih kei leh kihualkim cih ding ahi hi. A kileekkim dingin deihkaih thu hilh ding hi lo a, ih thuhilhna ah a nung ama a kileekkim, a kizawitawn, a kihual ahih ding thupi zaw hi. Budhism upna le Christian upna a kileekkimin vaihawm ding hi lo a, Christian upna na hilhna ah na thugen, na thuhilhzia khempeuh a pat pan a tawp dong a hual-ton khawm tawntung zo ahih ding pen kileekkimna (consistency) ahi hi. Na thu hilh le na gamtat a kizuih kei leh a kileekkim lo (inconsistent preacher) na hi hi. Na thuhilhnate khat le khat a kitukalh leh akileekkim lo thuhilhna (inconsistent preaching) ahi hi. Khat’ gen um zelin a khat’ gen zong na up zel leh a kileekkim lo thu-ummi (inconsistent believer) na hi hi. Na gen masak le na gen nunung kileekkim tawntung ding cihna hi. Kibat tawntungna pen kileekkimna ahi hi. Na thuhilhnate khat le khat a kibat kei leh a kileekkim lo thuhilhsya na hi hi. A kileekkim lo thuhilhsya pawlkhatte’ hangin thu-ummi tampitak hoi suk hoi to uh hi. Tua ahih manin hih kum zalom 21 sungah a thakin ih kisap thu in akileekkim thuhilhsya’ thuhilhna le thu-ummi ahi hi.

Ih tate ih ukna ah zong eimau mahmah in ukzia a kizawitawn, a kihualkim, a kileekkim in ih uk ding kisam hi (Consistency). Tuamah bangin Thuhilhsyate in zong a thuhilh uh kileekkimin a kizawitawn ahih ding kisam hi. Tua mah bangin thu-ummite in zong ih thu-upna pen a kihual a kileekkimin ih up ih pom theih ding kisam hi. Bektham loin Christian te zong ih nuntakna ah akileekkim, a kihualkim, a kizawitawn upna le zuihna ih neih ding pen a kisam pha mahmah ahi hi. Tawi ih teh ciangin a lang le a lang kileekkim leh tawi maan kici hi. Na tate za tep lo ding na deih leh nang zong za teep kei lecin a kileekkim pan ding ahi hi. (Possitively): Pa in zu dawn thei dinga tate in dawn thei lo ding hi cih thu pen a kileekkim lo thuhilhna ahi hi. (Negatively): Pa in zong dawn thei dinga ta in zong dawn thei ding hi cihpen akileekkim hong suak kik bilbel hi. Sangnaupang a nei syate in a sangnaupangte a ukzia ah a kileekkim kul hi. He must be consistent in the way he is intructing them. Gentehna in, sangnaupang zatep peuhmah ciang tawh thumvei sat ding na cih leh: bang hun, bang thu, bang mi, bang sa a piang zongin thumvei lian, val lo kiam loin na zat lian ding pen a kileekkim ukna ahi hi. Lai a ong peuh mah letsongpia ding ci napi cin na piak kei leh akileekkim (consistent) lo na hi hi. Lai en lo peuhmah daan pia ding na cih leh a en lote thukhun bangin daan piak takpina pen kileekkimna ahi hi. Genbang, khalbang in sep loh kik zeelna zong kileekkimlohna ahi hi. Thu kheel kawikawi pen kileekkimna hi lo hi. You must be consistent. Na gen na hilhsa thukhat na khel kikkik leh naupangte in thumang nuam nawn lo uh hi. Kileekkim lecin na thu hong mang ding uh a, na ukna mualsuah zo ding hiteh. An nek tui dawn hun, lai et hun, lup hunte ah zong hun maantak tawh na uk lianlian zawh ding pen kileekkimna ahi hi. Na gen banga gamtatna tawh sepna pen kileekkimna kici hi. Ih dinmun pen a patpan a tawpdong kibatsak tawntung zawhna pen kileekkimna ah hi.

Akileekkim thupomzia tawh kisai tuhun thu kihilhna nam thum ka gen nuam hi. Khatna ah, Upna: Upna ih cih pen a kileekkim upna kisam ci uh hi. Upna bek hi loin thukham zuihna tawh a kigawm ciang bekin akileekkim upna hi ci uh hi. Nihna ah, Thuhilhna: Thuhilhna ih cih pen akileekkim thuhilhna zat ding kisam ci uh hi. Hotkhiatna pen a kitaan thei bangin gen zel ding, a kitaan thei lo bangin hilh zel ding pen kileekkimna hi ci uh hi. Thumna ah, A langlek Upna: Lungdamna thu a kigen ciangin alangleek upna thu gen lo ding ci uh hi. Jesuh bek, Hehpihna bek, Upna bek, Lai Siangtho bek, Pasian’ minthan nading bek cihte pen a langleek upna hi ci uh hi. Hih bangdaan thuhilhzia saan zia upzia a pomte pen a kai-ngawi (neutral position) kici hi. Hih banga kai-ngawi-na pen kileekkimna kisa hi. Ahi zongin Lai Siangtho in ong hilh kileekkimna thu pen tua bang na hi lo hi. Na vot leh vot vet, na sat leh sa vet a cih mah bangin: Upna bek ih cih leh upna bek thu hilhnazia tawh a kihualkim, a kizawitawn tawntung upna pen akileekkim ih cihcih pen ahi hi. Khatvei leh upna bek khatvei leh gamtatna zong cihzia pen Lai Siangtho’ gen kileekkimna na hi lo hi. Khatvei le gupna kitaan thei, khatvei leh kitaan thei lo na cih leh tua pen na thuhilhzia mahmah ah nang le nang zong a kihual lo, a kileekkim lo na hi zaw hi. Lai Siangtho in akileekkim thuhilhna a cih ciangin gentehna, gupna a kitaan thei lo ahihna pen Lai Siangtho buppi tungtawna na hilhcian theih ding a kisapna pen kileekkimna ahi hi. Lungdamnathu tawh kisai-in Lai Siangtho sungah alangleek cih bangin kigen lo hi. Jesuh bek lampi, nuntakna le thumaan ahi hi. Hih thu pen alangleek thu hi lo a, hih thu tawh ih thuhilhna khempeuh kizawitawnin thuhilh tawntungna pen akileekkim thuhilhna kici zaw hi.

Thusia le thuhoih, midik le migilo, thumaan le thuzuau kikaal ah akaai-ngawi sepsakna pen leitung mite’ gen kileekkimna ahi hi. Lai Siangtho’ ong hilh kileekkimna (consistency) ih cih pen tua bang na hi lo zaw hi. Thusia pen thusia, thu hoih pen hoih, midik pen dik, migilo pen migilo, thumaan pen thumaan, zuau pen zuau ci-a muh theih tawntungna pen akileekkim Christian nuntakna kici zaw hi. Thu-umlo mite san theih ding le thu-ummite’ sankhop theih ding akileekkim thuhilhna cih bang Topa Jesuh in ong hilh ngei lo hi. Tua sang sikin, Hehpihna hang bekin upna tawh diktanna thu na hilhna ah na thuhilhna in dinmun a nei hiam? Khatvei leh upna bek hi kei. Khatvei leh upna bek hi. Khat ading upna bek, a dangkhat ading gamtatna tawh cihbanga thuhilhna pen Lai Siangtho’ gen kileekkimna hi het lo hi. Lai Siangtho gen Lungdamna thu pen tua Jesuh’ sung “BEK” ah cih thuhilhna tawh kizawitawn a na hilh tawntung theih ding pen kileekkimna hi a, tua bangin hilh thei lecin na Pawlpi mite sungah upna kikhat thei pan ding ahi hi. A bilbelin, Jesuh sungah upna hang hi kei, gamtatna tawh a kithalawh ngiat hi cih a bulphuh na hih phial lezong na thuhilhna khempeuh ah upna thu suang nawn vet loin gamtatna thu lian bek hilhcian lecin tua pen ama’ lampi zui-in a kileekkim mahmah thuhilhna hi bilbel leuleu hi. Sa la sa lo vot lah vot lo, upna bek lah ci nuam lo, gamtatna bek lah suang ngam loin a kaaingawi a omna thu pen kileekkimna thu hi lo hi. Lampi khat tawna tua lampi bek tawh kithuhual-in akileekkim nuntakna a nei ih hih ding thupi pen hi.

On Cup, One Cross, One Lord. Na thuhilhna ah lawngkhat zui-in na hilh thei nai hiam? Tua banga hilh theih ding pen Lai Siangtho’ gen kileekkimna hi. Mun khata na thuhilh le a dang khata na thuhilhna lawngkhat bangin a gin khop theih kei leh a kileekkim lo thuhilhna hi ding hi. Mission nasepna ah mission syate kilaih mun lua mahmah ahih manin Kawlte in hua syapa’ gen le hihpa’ gen kibang kei. Koizaw hiam ka up ka zuih ding uh ci hi.

Tua hi a, ei Pasian’ nasemte sung cih thadah eimau mimal thuhilhna mahmah zong a masa le a nunung akileekkim thei ih hih ding pen kum zalom 21 sungah a kisam mahmah ding thukhat ahi hi. Na thu-upna, na thu hilhna ah lampi khat zui-in na um, na hilh thei nai hiam? Lampi nih zuih khatin kizui thei lo hi. Lampi nih pen mi nih in khat tuak zui thei bek hi. Tua tegeel’ zuih lampi tegeel gawmtuahna tawh akileekkim lampi kici thei lo hi. Lampi khat a mong tundong zuihna pen Lai Siangtho’ gen kileekkimna thu ahi hi. Ih thuhilhna ah amasa le a nunung a kibat tawntung ding a kihual tawntung ding a kizawitawn zawh tawntung ding pen Lai Siangtho’ gen kileekkimna thu hi ei! Is your preaching consistent? Your message must be consistent in preaching. You must be a consistent person in what you believe. Thuhilhsyate le thu-ummi mal in hih kileekkimna (consistency) thu ih kisam pha mahmah uh hi.

Evan. Suang Dal