Kikhelna le Maban nei theology kibat loh deuhna

Kikhelna le Maban nei theology kibat loh deuhna

“Christian biakna pen hun zui-a kikhelkhel biakna hi lo hi. Hun zui-a kikhelkhel biakna a hih leh biakna maan lo hi ding hi. Christian thu zuihna ah hun zui-a kikhelna ziapi khat om hi ci-a ngaihsutna sungah khem thuak kha kei in. Kikhel khel cih bang hi lo hi. Banghang hiam cih leh thumaan maan sa thu dik sa khat pen maan lo kik dik lo kik cih bang om ngei lo hi.
Jesuh Khrih in zanni tuni a tawntungin kibang ngit nget hi.”

1. Progressive cihteh a khangkhang, a kibehlap lap, a kikhel khel cihna hi. Christian te in khantohna le kikhelna a kinial hi loin thumaan bulpi upna le zuihna (doctrine and practice) tawh kisai ah ih khelkhel ding ih khankhan ding ih behlap lap theih ding thu om lo hi. Khantohna le kikhelna maan pen a kip a kho a kikhel themthum lo, beh laplap a kul lo thumaan bulpi tungah kinga hi cih lam hizaw hi.

2. “Kikhelna” le “maban nei” cih kammal kibang lo hi. Kikhelna pen “change” kici a, maban nei pen “process” kici hi. Gentehna, aktui, akno, akpi hih pen aktui pan akno ah kikhel (ပြောင်းလဲ) hi loin, aktui pan akno akpi ah a khantoh loh a phatmawhna maban (ဖြစ်စဉ်) ih muh sak theih ding a kisam hizaw hi. Kikhel cihteh akno pen aktui tawh kisai nawn lo banga ngaih sutna hi. Maban nei cihteh tua akno pen tua aktui tektek pen mah pan hong keuh hi a, tua akpi pen tua akno tektek pan hong piang toto, maban kizom khantohna hi cih thu ahi hi. Change (ပြောင်းလဲခြင်း) le Process (ဖြစ်စဉ်) a khiatna, a deihna a kibat loh lam i kan tel theih ding thupi hi.

3. A kikhel ngei lo tua Lungdamna thukip hilhna tawh mawhnei mite amau ngeina lui le daan le ciin te pan hong kikhel-a a kikhel ngei lo Lai Siangtho thupom (doctrine) le upna (faith) ah hong pianthak ding uh a kisapna pen mihingte’ daan, ciin, zuih le ngeina tuamtuamte tawh kituak-a Lai Siangtho theology i khelkhel sawm sangin a kisam zaw thu ahi hi. Khel phei gawp theology baih-a a kikhelkik sak theology pen hamsa hi.

4. A kikhel khel theology thuhilh Sya maan lote in leitung thupiangte zui in a upsa uh a zuih sa uh thu pen “tuhun teh, tuhun teh” cici mawkin tua tawh thu kawngpi khelkhel sawm mawh uh hi. Kheelna maan a om mah bangin kikhelna maan lo thuhilhna tam mahmah ta hi.

5. Tulaitak-a leitung thupiang Covid=19 hanga mi kinai om lua lo ding (social distancing) bang ngeina pi khat hong suak ding, tua tungtawn-a ih theology sut zia i khel hong kul toto ding cih lam-a muh ding hi loin, thu umlo mite tawh na kigamla om un, ci-a Lai Siangtho ii hong hilh pen mah kikhel loin hong tang tungtung ahihna lam ah muh theihna-a i neih ding kul zaw hi cih thu…ih taksa ading natna neite tawh kigamla om (social distancing) a kul leh ih kha ading natna hong piangsak thei leitung vaite tawh bangzah ta-in kigamlat om ding kisam zawkan lai hi lo hiam ci-a Lai Siangtho hong hilhna thute (the old truth, the old doctrine) mah hong kisam kikkik ahihna thu muh lawhna a ih neih ding Topa in kisam sa hi.

✓Ih LST thu up zia, i Christian thupom zia maan lote pen Lai Siangtho phatak-a simna le kantelna tawh kipuahpha-a kikhelkikna pen kikhelna maan hi-a, tuhun adinga ci-a LST theology khelkhel theih hi lo hi.

✓Christian biakna pen kikhelna hi loin kipna hi zaw a, a kilaihlaih theology hi loin maban nei theology hi zaw hi.

✓Christianity is not about change it is about the same yesterday, today and forever matter. It is not about progressive theology but processing theology. Evan. Suangh Dal