Dawi kungpu Sial kili nei

Dawi kungpu Sial kili nei

Keipen Dawi kungpu sial kili nei ii-aa dingin mi lamdang ka hikei, a man kei hongthei in kenzong a mah kathei hi. A mah tawh ka ki lai-a, a niam theih tantan niam in a poitheih tantan ka poi hi. Nung kiklo ka hih man in a tawpna ciang dawi kungpu a nungkik hi.

Khuadam nuai ah ka om laitak ka puan honghawk sak aa, ken ka vun ka hawk leh a nungkik hi.
Namsau tawh ka pumpi hong phelkhap-a ken ka lungtang temta zum tawh ka dawtkhap leh a nungkik hi.
Huihpi guahpi tawh hong denga huihpi tungah tuangin guahpi lakah ka lam ciang a nungkik hi.

Hong cilphih in hong phuisam hang ka samzang khat zong a ling kei hi.
Pasian thusim leh thupha namcin ki phumna ka pumpi pen khemna bek a nei dawi kungpu sial kili nei sangin man neizaw ahih manin ka mitmul zong a lingsak zokei hi.

Dawi kungpu sial kili nei in kei kua cih hongthei a, kei koi lam manawh-in pai cihzong hongthei hi. Ka ngaihsutna leh ka ngimna te hong khaktan zolo ding cih a thei-a, kuamah in zong hong khaktan zolo ding cih a thei hi.

Tua ahihciang sanggam aw, ka hihna leh kei dinna nang deihdan tawh a ki lehbulh aa nong muhdah nopleh nang thu hi, ahih zongin dik nongsak leh itna tawh thupha hongpia inla thu hong ngetsak in.

ADK.
Camp Mary