ZAM Thupuak :: 28 Apr 19 (UN thukikhel te zaksakna)
CHIN STATE PAN HONG PAI GALTAI TE TUNGAH UNHCR THU KIKHELNA TAWH KISAI IN ZAKSAKNA Chin State khanglam buaina te hangin kawlgam ah ciah kik dingin lungmuanna omnai lo hi cih muh khait na tawh kizui in UNHCR in Chin State pan hong tai khia galtai te kepbit lai dingin kikhen tat hi. Hih kikhelna ah hoihtak leh manlang takin sep theih na dingin minkhumna (Register) leh gambelmi in ciapteh theih na ding sep zia bawl zia te ka puahphat laitak uh ahih lam zong kong thei sak nuam uh hi. Hih puahphatna te ih bawlna hang in Chin State pan hong pai galtaite thu tawh kisai (RSD interview) te hong zekai tuam ding hi. Hih vai tawh kisai in thuthak a om sim in zong kong zasak den ding uh hi.
Gambel mi in a kiciamteh sa leh gambel mi in ciamteh ding a ngak lai te khempeuh pen amau hong pai khiatna gam koi pan hiam cih tawh ki-en loin amau ih hih na tawh ki-en pha in a kingaihsut phat laitak ahihi. Hih vai tawh kisai in thu kikhelna leh thu thak a om bangbang UNHCR pan in hong zasak den ding hi ung.
Gambel mi a ciamtehna a ngah sa leh ciaptehna ngah dingin a ngak lai khempeuh te nunglamin ih zat ahi sep leh bawl ding gelna (policy) leh mimal in teel theihna te ngaihsun kik nawnloin 01 August 2018 pan 14 March 2019 sungin teelna a neite khempeuh a card uh ahih kei leh alaidal uh ki renewal sak ding hi.
Khen khatna : 01 August 2018 pan 14 March 2019 sung mimal in etphatna a kibawlna ah kihel kha loin UNHCR pan in card renewal dingin appointment a kipia te khempeuh pen Malaysia UNHCR te ih paizia tawh kizui in hong ki renewal sakkik ding hi.
Khen nihna : 01 August 2018 pan 14 March 2019 sungin mimal in etphatna sungah kihel in 31 December 2019 dong card tawi suak ding a teel te (Option 1 a teelte) Malaysia UNHCR te ih paizia tawh kizui in card kipia kik ding hi.
Khen thumna : 01 August 2018 pan 14 March 2019 sung mimal etphatna sungah kihel in laidal a kipia te (Option 2 a teelte) khempeuh zong Malaysia UNHCR te ih paizia tawh kizui in card kipia kik ding hi.
Hih a tung a khen 3 sung ah kihel te pen na card ahih kei leh na laidal a sihma (Expire Date) in UNHCR pan in hong kisam kik ding hi. UNHCR pan in sapna appoinment omlo pi in zum ah nong pai loh na ding uh zong hong thei sak ung.
Phone number na khek or na laih zenzen leh a nuai a bangin sms kikhak in ki update thei ding hi.
UNHCR zum ah phone No. puak dan ding Phone No. (alui) Space 791-09C++++Space 791-001+++ Space Phone No. (Athak) hih teng khen in Phone No. 011 17225 222 ah sms khak ding.
Na khak khit ciangin ni 7 sungin hong zasak kik ding uh hi. Hih phone pen message a lut bek kingah ding a, phone sapna in kingah lo ding hi. Appoinment a nei te kikhelna a om leh UNHCR pan in phone ahih kei leh message tawh hong zasak ding uhhi.
UNHCR AH MEETING KINEI
25 April 2019 (Thursday) ni-in UNHCR pan RSD/CLU leh RST lam pan ulian te leh Community tuamtuam pan makai te, Sangsia te leh pawlpi kem siate kimuh khopna UNHCR zum ah sun 2:00PM in kinei hi. Hih hun sungah UNHCR lam pan in amau nasepzia ding gelna (Policy) te hong gen khia uh a, tua khit ciangin dot na leh dawn na tuamtuam te kinei hi. Dotna leh dawnna tampi sung pan in Innkuan lutpih vai tawh kisai in zong kidong a, amau hong dawn kik na ah “A lutpih ding te in UNHCR zum a hong report hun tawh ki en a, a lut pih pah thei kei zongin a lutpih hun in kum cing nailo ahih leh kum tampi a sawt zongin a file uh kigawm thei veve ding hi” ci-in dawng kik hi.
Damlo (Vulnerable Person) te tawh kisai in zong UNHCR pan in Register nong piak sak lai thei ding uh hiam cih dotna tawh kizui in “UNHCR pan in damlo (Vulnerable) te nidang pek pan in Register kipia a, tuni dong mah in zong kipia lai hi. Ahi zongin UNHCR tawh akizom NGO zato te tungtawn in kipia bek ding hi. Hih zato te kiangah zong UNHCR ah report na ding tawh kisai sepzia bawlzia dingte kapuak khin uhhi” ci in dawng kik hi.
India pan Card Transfer te vai tawh kisai zong dotna kinei a, amau hong dawn kikna ah “UN te in register hong piaksa khat pen koi mun koi mun pan in amau ih sepzia bawlzia tawh kizui in ama thu a cingin hong piak theih nak leh kizop sak thei mah hi” ci in dawng kik hi.
Kum tampi RSD/RST akisam lote tawh kisai zong dotna kinei a, “tua te pen a hun zui in meeting nei toto in tua pan in kikum toto leng hong lem toto ding in um ung” ci in hong dawng hi.
Sangnau pang te vai ding zong dotna kinei a “Hih sangnaupang te pen Primary pan in Secondary akah na ding leh sang te hoih tak a zop toh theih na ding uh Malaysia kumpi leh University tuamtuam tawh kikupna ka nei denden uh a, mai lam ah thu hoih hong piang ding in ka lem en uh hi.” ci-in dawng kik hi. Kimuh khopna pen nitak lam nai 4:00 kim in kizo thei hi.
KIDAWM THEI LENG
UNHCR te December 31, 2019 ciangin hong panpih nawnlo ding a cihna hong khel in tu-in kum 3 bang hong pia kik uh a, ih lungdam mahmah hi. Ahi zongin amau hong piakna uh tungtawn in ih zat dan ih siam ding kisam mahmah hi. Galtai dinmun a om ih hih leh galtai khat ih din mun tawh kituak in ih om ding kisam hi. Ih khut sung hong tungsa hamphatna te zang kha lo zek khaloin ih va ap kik khak ding kidawp huai mahmah hi.
Nang mahmah in na kam pan na pulak thu pen nang mahmah in palsatin na pulak thu tawh a kileh bulh in na gamtatna in nang bek tungah siatna hong tung hilo a, na mipih tampi tungah zong tua siatna pen a kibang in kithuak khawm ahihi.
Tua ahih manin galtai hi ing ih cih leh galtai khat din mun kho takin len in galtai hi kei ing ih kicih leh zong ih dinmun kho tak in ih letkip ding thupi mahmah hi.
Ut hun ciangin ei thugensa mah palsatin ih gam ih lei ciahin ih ut hunhun ciangin pai kik zel, ih ut ciang ih card renew in ih ut loh ciang nusia zel cih dinmun pen nang suahtakna ahih hangin tua in mi tampi tungah sukha, buaisak tuam mahmah cih ih phawk ding hong thupi mahmah hi.
Ei hong huh nuam hong panpih nuamte hong huhnop semsem leh hong panpih nop semsem na dingin ih sep theih ding leh ih kalsuan theih ding thupi a, ei hong panpih nuamte a hong muh na ah a panpih huailo ih suak loh ding hong thupi mahmah ding hi.
Thu leh la khat peuh ah a ma hun zui in ih kalsuan ding zong kisam a, a hun ih lap ding leh a hun nailopi in ih ki pei ngawp loh ding zong thupi hi.
UNHCR ZUM PAN PHONE HONG KISAP CIANG
UNHCR zum pan in phone hong kisap ciangin hong sapna mun (RSD,DSU/RST/RSC/OPE, DHS..etc) dong hamtang inla, bangvai tawh hong sam cih zong dot ding mangngilh kei in. Phone hong kiho ciangin zong hoih takin kiging kawmsa in dawng kik inla, thudot hong neih leh zong na zum vai tawh akipelh loh ding hoih tak ngaihsun kawmsa-in dawngkik hamtangin. Kam khat I dawn khialh na tawh supna tampi piang thei hi. A diakdiak in hong sapna Department I theih kei leh zum I pai ciangin nawn kai na tampi om zelzel hi.
ZATO LAM TAWH KISAI :Zato lam tawh kisaiin vai khat peuh na neih leh Contact :Sia Mungpi 018 3122 957
DAHPIHNA PULAKNA
Tuithang khuami Ngaihte beh Pa En Khan Mang leh Nu Thang Ngaih Dim te tapa Pa Lian Deih Tang in a nasepna mun pan in accident na hang tawh hong nusia hi. ZSM hong lut kha lo ahih hangin zum vai teng ZAM pan a kivan a, innkuanpih te lunggulhna om bangin aluanghawm Kawlgam ah 24 April 2019 ni-in kipuak hi. Sanggampa Lian Deih Tang hong nusiatna hang in adah akap khempeuh Topa Khasiangtho in alamdangin hehnepna hong piaksak tahen. ZAM/ZSM pan in zong dahpihna ih pulak khia hi.
2019 ZSM LAIBU TE HONG AP KIK TA UN
2019 ZSM laibu te I hawm khiat zawh kha 4 bang hong cingta ahih manin March kha bei ah ih laibu khempeuh Zum ah ih puak kikna dingin ih ki zasak hi. Hong ap kik khin zong tampi mah ki om a, hong ap man nailo zong zong ki om lai ahih manin in a manlangin nong ap kik nang uh zong hong zasak ung. Mapang khawm in ih sep khopna te hang in tuni ciang a kalsuan zo ih hihi. A lut man nailo ih om leh zong aman langin ZSM ih lut tangtang ding zong kong zawn phapha uh hi. Ei adingin a lut ih hi masa kei aa, a kisam te adingin panpihna a pia ih hi zaw hi.
UNHCR ZUM AH VAI KIDAWP THEIH NI TE
Health Unit (Damlo te tawh kisai)
Monday, Tuesday leh Thursday nite ah zingsang 9:00AM pan 11:00AM kikal sungteng in UNHCR zum ah pai in huh kigen thei hi.
Livelihoods Unite (Nasep vai, sum leh pai cihte)
Wednesday leh Friday ni te ah zingsang 10:00AM pan sun 2:00PM sung in huh kingen thei hi.
Education Unit (Sangvai tawh kisai)
Monday, Wednesday leh Friday nite ah zingsang 10:00 AM pan Sun 12:00PM sungin kipai thei ding hi.
WELCOME TO ZAM
Kawlgam, Vaigam, tuipigal leh gam tuamtuam pan Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah nong hawh/phak hamtang in thapiakna leh idea tuamtuam piakna nong neih na dingun kong zawn phapha uhhi.
ZAM ZUM AH KILEI THEI
ZAM zumpi ah I ngeina van tuamtuam ahi Zopuan Design tuamtuam, Zoniik Design tuamtuam, Puanten, Puandum, Zodial(Silk), Puanlai san, Zokhi, Tanghciin, Khephiau, Zolukhu, Zothungkuah, Zodial cihte akipan naupang puan tuamtuam te deih zahzah kilei thei hi. Tua bek loin khui tuamtuam leh anuai a laibu te zong kilei thei hi.
ZAM ZUM AH HONG HAWH
Zampi Khuami New Laibung SDA pawl pi ah Pasian nasem Sia Khual Sian Thang in Zomite a it a veina tawh kizui in Malaysia ah tawmvei hong zin sung in ZAM ah hong hawhin Isaiah 41:10, 13 bulphuh in Pasian kammal tawh thapiakna leh thungetsakna hong nei ahih manin kilungdam mahmah hi. Topa’n siapa nuntakna hong zang sem sem tahen.
TUKAL SUNG ZATO LAM BUAIPIH TE
- 1. Cing Nem Kim (Ngalbual) Kajang zato ah
- 2. Niang Lian Lun (Anlangh) Selayang zato ah
- 3. Cing Zam Huai (Singgial) Klang zato ah
TUKAL SUNG THONG LAM BUAIPIH TENG
- 1. Kap Hau Tuang (Vaivet) Puncak Alam thong ah kiveh thei
- 2. Cinte (Vaivet) Puncak Alam thong ah kiveh thei
- 3. Pau Peek (Vaivet) Puncak Alam thong ah kiveh thei
- 4. Thang En Pau (Kuanglian) Jinjang Lockup ah kibuaipih laitak
KIMAT KIHEN NA TUAK LEH : Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kiging sa in om den ding uh hi. Sia Tuang Pu : 016 254 4093
NASEP LAM TAWH KISAI : Zomi nasep neilote in nasep tuamtuam om hi. A lunglut leh dot nop aneite in Sia Khuppi— 016 3838 014, 011 3563 2059
LUNGDAM KOHNA 1. Nang Suan Khai RM50 Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi danin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen.
Comment piaknop aomleh...