Khangthak Tualgal ~ Lian Tuang

Khangthak Tualgal ~ Lian Tuang

(Tu laitakin Zogam le Zomite sungah guihtheih khamtheih zavom zakang zatui zong lang lua mahmah ahih manin I minam bup ading thulianpi khat hi cih ngaihsutna tawh hih thu a gelh I hi hi.) I gam sung I minam sungah khantohna tampi ong om mah bangin a langkhat ah siattheihna adiakin guihtheih khamtheih zatna lam ah zong ei tawh kituak lo zah dongin nakpi takin I khangto citciat hi.

Kawlpi huam sung minam tuamtuam lakah zavom zakang zang pen kua minam a tam pen diam ci in thongsung pan ong pusuak zawh kha 3 khawng a pha zatui zatna sungah a kidiahkik khangno khat ka dot leh kawl le zo kikim lel in teh. Zavom zakang pen tulaitak khangnote in nak zah mahmah uh ong cih san hi.

Guihtheih khamtheih pen Myanma gam bek hi loin leitung bup in a kibuaipih mahmah thu ahi hi. (State counselor. Peace Talk. 11 April 2017 )

Kibeh laptoto

Zavom le zakang ( No. 4 ) I cih pen buhkhuh natna bangin a kilawh baih mahmah zongsatna nam khat ahi hi. Thu tuamtuam tawh khatvei nihvei sukha peuhleng a kizongsang thei ziau nam na hi mawk hi. Pawlkhatkhat bel a ut kik nawn hetlo zong om thei veve ci. Kikholhpihte zui in ahi zongin, a sin nuam mahmah, baih ngahlua, nasep gimlua , gualnuam nuam, sinkham lungkhamna nei cih bangin thutuamtuam hangin akizang kha ahi hi.i

Atam zaw in a masa lam in bel sum om dan zui in akhu in kidik masa hi. A sawt lam ciangin sum tawmno tawh kham theihna dingin phim tawh thagui ah kisun hi. Thagui a sut ding bel kuamah ki ut hetlo ahih hangin sum hamsatna hangin kisun veve maita hi.

Hih zongsatna pen khat le khat akilawh thei cih ding ahi hi. Gtn: a zongsangsate lakpan a kisap hunhun in a leizo ziauziau a om hangin atamzaw in sum kicing takin nei mengmeng zo nawnlo uh hi. Ahi zongin tua dan a sum hamsa mite in mithak nih le thum kaikhawm zo peuh leh ama a khop ding om theitoto leuleu hi. Tua ahih manin ama kisap hun sim in a lawmding a kisincil ding mi thak zong pianpianpah hi ci in zatui sunga kidiah ngei khangno khat in gen hi.

Kidek ding hamsa

Guihthieh khamtheih ( zu, za, khain, tuibuk,..) cih te pen theihloh kalin a kizongsang pak vive ahih hangin kidekkik ding hamsa mahmah ahih lam mi khempeuh in I theihsa ahi hi. Adiak in zavom le zakang pen kidekkik ding aham zaw lai in kigen hi. Akhu in a dikte kidek kik ding baih zaw deuh a, phim tawh thagui ah a kisunte pen a kidek kik ding hamsa mahmah hi ci hi.

Kidekkik ding hamsa lua mahmah ahih hangin khatvei zongsatkik ding baih mahmah citciat leuleu hi. Camp khat peuhpeuh pan akl thong sung pan in a kidek sitset zo te zong kum 10 val nangawn a kidek zo khin ahi phial zongin a lawm le gual, a muh ngei a zat ngei khatpeuh hangin cisa nat bangin a zongsatna in tun kik thei veve ci hi. Tua ahih manin cidamna lam siavuante in hih pen natna nam khat in na ciamteh zaw uh hi.

Upadi kikhel

Abei sa ciangciangah Myanma gam upadi in zatui( zavom zakang zatui ) a zangte tungah thukhen in kum tampipi Thong kia sak hi. Tua tawh kizom in mipite in zong zatui zangte ki kihta in lipkhap ngaihsuh hi. Hih pen kumpi policy hang zong hi leh kilawm hi.

Ahi zongin State Counselor in khangnote tawh kimuh khopna khat ah “Guihtheih khamtheih ( zavom zakang zatui ) a zangte upadi tawh dan pia in thong kiatsakna pen khiatna nei hetlo gamtatna hi”( State counselor. Peace Talk. 11 April 2017 ) ci in gen hi. Tua mah bangin zatui zangte upadi tawh kizui in Thong kiat kul nawnlo dingin thukhu a kibawl laitak hi ci in, Gen Minister of Home Affairs in tangko hi. ( DVB .10 April 2017 )

Luahuaina

Ahuampi in en ding hi leng hih zatui ( zavom zakang ) zangte pen thudik hithiat in amau le amau in om khikhe zaw uh hi. Ahi zongin nisim naisim in a zatui kisam ahih manin sum kisam den uh hi. Zatui a zat hun tawh tawh kizui in ama zatui zatzah ( limit ) zong khangtoto lailai hi.

Zatui lim zat semsem leh nasep silbawlna ah thakia semsem leuleu ahih man sum pen a baih lam in zon kul leuleu hi. Amasa in innkuan sung, tua khitteh u le nau sung, veng le pam sung sawk kawikawi uh hi. Asawk theih ding a om nawnloh ciangin a masa lai dan mah in abanbanin guk theih guk mawh zuaktheih zuakmawh ong sawk ta hi.

Kawlpi huam sung siattatna, tuahsiatna, gutabuluh, buaina tuamtuam ( Police case ) a tam semsemna tawh kisai in Britist Council le Edulife te thukantelna khat ah mipi 31% in guihtheih khamtheih ( adiak in zavom zakang ) hang hi ci in mukhia uh hi.

Cycle kigu, inn kiluh, mi lampai lai khatpeuh sumbawm khi, bilbah, nai, phone te sut in taipih cih dante a kibeh lap semsemna thu tampi lakah guihtheih khamtheih( zavom, zakang, zatang ) kilimzatna hang zong khat in kihel hi cih thu ahi hi.

Dipkuat huai

England te in Sen gam angah zawh nadingin zavom zakang tawh na sim hithiat ngei ahihna thu leitung tangthute tungtawn in kimu thei hi. Zogam khua pawl khat ah zong papi teng zavom zangin si khin phial ahih manin Meingong khua a kici liang khua nangawn kiom ta hi.

Hih zatui a zangte in ahun zui in zatui zat ding cih pen amau ading athupi penpen ahih manin, thu dangdang le ama mailam ding nangawn bangmah vaihawm manlo akl zonawnlo ta uh hi. Cidam thahat in a om laiteng a innkuan le veng leh pam tengin mi phengphi khat a kem bangin ki encik in kibuaipih tawntung a, a damloh uh ciangin zong kibuaipih suak hi.

Cancer natna nei bangin amau mailam ding lungzin huai mahmah a, tua lungzinna in innkuan sung u le nau sung, khua le tui sung tawh ong kizom hi. Tua ahih manin hih zavom zakang zongsatna pen minambup ading cancer natna cih theih ahi hi.

Kikep kihuaizia ding

Ahuampi a kigen ciangin hih zavom zakang zatui zangte in zong hih zongsatna ning mahmah cimtak mahmah in nusia nuam mahmah uh hi. Kuama theihloh kalin manlah in sim gamtat tawntung ahih manin gim mahmah kisa uh hi.

Amau mahmah ut lo pipi in pumpi deihna nang zolo ahihna tawh kizui in a omom na mun khempeuh ah kisuang den uh a, mikhempeuh kitta mai uh hi. A lungsim tawngah a lunggulh tawntung uh thu in zatui zang nawnloin suakta takin nuntak ding cih thu ahi hi. Amau le amau in zong hanciam in thasan in kisin tawntung uh hi. Ahi zongin lawhcing zolo zaw hamtang hi.

Guihtheih khamtheih zatna akiam nading nasem department te gen na ah “zavom zakang azangte a kidek zawhna dingin thu 3 kisam hi.”

• ( a ) Zatui a zangte in kidek ding cih lungsim khentatna nei ding
• ( b ) Akim le pam in thapia in hoihtak panpih ding
• ( c ) Ahuh ding center, kipawlna, camp…, thahat ding kisam hi. Hih thuthum a kilekkim nakleh zatui zangte sungah kikhelna piangzo thei hi ci hi.

Ahi zongin “ Kawlgam le Zogam dinmun adingin a zangsa te kidek kik ding sangin, a zang a kibehlaploh nading nakpi takin hanciam huai masa sa ing” ci in thuneite khat in ama muhna gen hi.

Thukhupna

Kawlte vaite in hih guihtheih khamtheih tawh abuai hangin amau cimang pak zolo ding uh hi ( amau zat phamawh kei cihna hi lo ). Ahi zongin Zomite in amaute gamtat bangin I gamtat khak zenzen laizang pen asau hetlo hun tomno sungin I cimang kha mai diam cih ka lung patau hi. Hih pen kuama bawl hi loin ei le ei a kibawlsia Tualgal taktak ahi hi. Hih guihtheih khamtheih vai pen minam le gamvai kikupna le nasepnate ah hangsan tak in hunpia in kikum in thasan hun mahmah ta ding hi cih I kiphawksak nuam hi.

Tu laitakin Zogam le zomite sungah hih zavo zakang ong lang lua mahmah ahih manin I minam bup ading thulianpi khat hi cih ngaihsutna tawh hih thu a gelh I hi hi. Lian Tuang