Singapore ah mawtaw honkhat kiphu khagawp, mi 26 liam
Singapore gamsung ah tuni Wednesday (Dec 20) zingsanglam in mawtaw honpikhat ki phukhagawp ahih manin mi 26 in liamlawh cih CNA pan kiza hi. Tua aliamte pen Bus Driver khatleh Passenger mi 25 hi uh a, Woodlands Checkpoint geiah tuzingsang atuahsia ahihi.
Singapore Authorities te genkhiatna ah tuzingsang 6am hunpawl in 21 Woodlands Crossing ah tuahsiatna omhi ci’n hongki zasak cihi.
Hih tuahsiatna pen mawtaw tampi akiphukha “multi-vehicle collision” hi a, Trailer mawtawpi 2, Bus khatleh mawtawneu khat aki phukhagawp uh cihi.
Facebook tungah aki khahkhia Photo pawlkhat ah mawtawneu khatpen mawtawpi 2 kikal ah ki tepcip, Sandwich bangin akikal ah kitepcip cihi.
Police te genkhiatna ah aliam khempeuh Khoo Teck Puat Hospital, Ng Teng Fong Hospital, Tan Tock Seng Hospital cihte ah kipuak kawikawi hi ci’n genkhia uhhi.
Bus Driver leh tua Bus tungah atuang Passenger tepen atamzaw liamgawh lualo, Minor Injuries kici hi.
Hih tuahsiat laitak ageinai panin amukha Passer-by khatin genkhiatna ah tua Bus pen akongkhak Door ki hongtheilo, apanglam kidalcip ahih manin, amai Windshield panin Passenger te kahto in, pusuakkhia uhhi ci’n genkhia hi. Tua Bus pen amailam zancipgawp in, naksiat mahmah hi.
Singapore Civil Defence Force (SCDF) Spokesman khatinzong hih mawtaw accident pen tuni zingsanglam 6:10am hunpawl in Woodlands Crossing ah thupiang hi a, mi 26 liamin, avek un zato kipuak hi ci’n genkhia hi.
More: Malaysia, Serdang vengsung ah mawtaw 6 tak kiphugawp in mi 2 in sihlawh
Hih tuahsiatna hangin Woodlands Crossing tengah lamzikpi pawlkhat aki khakcip hi a, zingsanglam 10:15am hunciang in ki hongkik pan hi. Ahi zongin mawtaw hawlte hoihtak kidom un ci’n Immigration & Checkpoints Authority (ICA) te’n genkhia uh cih kiza hi. Sawltak #zomidaily
Comment piaknop aomleh...