Khang Khat Nun Na

Khang Khat Nun Na

Leitung mihing nun taak hun sung i et kaak tak ciang in khan tom leh khan sau i cih pen minam khat le khat kibang kim lo hi, a khan sau deuh minam ki om veve aa, a khan tom deuh minam ki om veve hi, a huam pi-in i et kik tak teh mihing naham sem lo, khuapi sung pan khang khia te mah moi suak den zaw deuh kasa hi.

Hi cibang mihing lei nun zia sung ah ei Zomi te pen a khan sau minam zongh i hikei aa, a khan tom lua minam zongh i hi kei hi, cih kei mimal muh dan hi, a huam pi-in kum 60- 75 kikal leitung nusia tampen kha ding in lam en ing’…

Tu-in leitung ah kapian zawh ka kum 28 sung ka luut ta hi, kum 70 nungta ding in ka kingaih sut tak ciang in ka hun a lang kum 35 a cing ding ong hi ta mawk aa kakhang no hun hong bei diai diai a hita hi, ka neulai-in kei sa’ng a lian zaw te cia kapha nuam mah² hi, ka tang valno ciang in bang hun khawng ciang zi a ki nei zen tam maw ka cici hi, kum 27 kaphak ciang in Pasian in zi ong nguan hi, Pasian thupha kasan uh leh nikhat ni ciang Pa ong ki cih ding hun ka bilkha in zaza ta hi, hun ong pai toto ding aa Pu aw ong kicih ding hun ka bilkha in zaza khol ta ing’ tua hun ciang in kei aa ding in hih leitung ka nun taak na ah-hun nunung a zangh² ta ka hi ta ding aa, ka neu lai aa kei sa’ng lian zaw te cia kaphak nop hun a om mah bang in, tu laitak aa naupang no te kum zah bek-ka phak kik nop hun hong tung kik ding a hih lam thei khol ing..

Tua a hih leh U te naute, sang ngam te aw leitung mihing te i sahkhua hin-na hibang hun teng tawh i hun hong bei ding ong himawk aa khat vei sikhin leng kitho kik nawn lo ding himawk a hih teh, na sih ding hun hong tun ma-in hih leitung ah bang sem nuam pen na hiam’ bang sem te hampha sapen na hiam’ a thak in kingaih sun dih ni’…. nasep nop na telkei leh pha mawh lo hi, miham pha nasak te nasep lung ngai kik in’ tua in-nang aa ding in Pasian hong piak nasep na talent hipah kha ding hi.

Hih leitung ah kasep nop-pen² lah sem khalo ing aa, ka suah nop- pen² lah suak zo tuan lo, hampha kasak pen² te nun taak khuasak zia lah cik mah-hun aa ka phak zawh ding hilo ci’n khat vei² ka lung sim neu in katha nem thei hi, ka ngaih sut kiik kiik ciang in, ka en pen² ten zongh nuam sa khin tuan lo, hampha kasak pen² ten zongh nop sak na bucing ngah zo kisa tuan lo a hih lam phawk-kik ing’ .

Tua a hih leh-hih leitung ah, na neih bang² tawh, na pil na tan² tawh, nasep zawh zah² in,na hun neih sun² tawh na “Khang Khat Nun Na” na bang ci zat sawm hiam? Pasian aa ding maw, Gam le minam aa ding, na khua na tui aa ding maw, nang le na inn kuan bek aa ding, bang sem lecin kisiik omlo pen ding in – ngaih sun na hiam….?

Ka lung dam…

Sawm Pau