Zuau Siangtho

Zuau Siangtho

Zuau Siangtho genna loh tawh Zomite’ Gam thupi ki tungzo peuhmah lo hi, ki ci hi. Aman diam? Zuau gen ngei ngiatlo aom takpi diam? ei tawh i ki ngaihsut ciangin….,

Zuau na gen manin bang teng phattuamna hong piathei cih na ngaihsun kha ngei hiam? Midangte zong phattuamna a piaklam na phawk kha ngei hiam? Zuau gen lo dan khat in na om hangin na khempeuh a theipa muhna ah zuau a gen takpi na hi aa, Zum (UN)nasem lian pipi te muhna ah thuman gen na lel hi. Zomite muhna leuleu ah Zuau Siangtho a gen na hi leuleu hi. Na khat peuhpeuh adawl adawl in om dan aive.

Papi ten, ” Zuau in a khaptawn” cih a gen zel uh i limzak mahmah aa, i thei mahmah hi. Zuau na gen manin zuau khekhap a tawn na hi takpi mah hi. Zuau lo tawh mite ki khem ngeilo aa, thuman taktawh mi akhem ki om lo hi. Zuau mah in muibun zaw hi aci liang om hi. Zuau in phat tuamna hong pia thei nengneng te;

Zuaugen manin Zi hoih pipi amu zong om thei lai hi.
Zuaugen manin lawm hoih pawl khat ki ngah thei lai hi,
Zuaugen manin gilvahna neng khat ki ngahbeh zaw lai thei hi.
Zuaugen manin gam thupi ki tung ngekngek hi.
Zuaugen manin mite gamdang tungsak zo lai hi.
Zuaugen manin mite pilna guan theilai hi.

Zomite’ zuautawh gamdang i tun ngeingai manin thuman tawh gamdang atung tawmkhat te, phattuamna tampi pia hi. Bangteng? Amau tengbek om uhleh naupangten Zomite cih phawk khalo in, ei kam thei nawnlo/zanawnlo ding uh aa, Zolai hilhding om lo in, Zokam tawh a paupih manding hun uh om lo ding uh a, Zomiten biakinn ki neihlo ding aa, ki khawm sunsun uhleh mang biakinn khawng peuh ah ki khawm lelding uh hi. Zokam azak dinguh phavang mahmah ding aa, Zomi Video te na lengzong en nuamlo in, en mah uhleh zong cimtak baih mahmah ding uha, a sawtna ciangin haivai sa zaw lai ding uh hi, ki cihi. Zuau in Zomite hong lemtuah kawikawi na hi mai thei hi. Ih ki but suah khakleh bel baihkei in cin maw.

Numei pawlkhat bang zuaubel ka gen theikei, gamdang bang cih ka tundia aci te peuh, suuk zaw lai thei uh hiei, a ki pat loh man bek uh hiven cin in. Ki pan vanglak leh gamdang tunbaih theihtheih nang lampi mu thei zawlai uh hi. Pasalte zong zuau gen lo ding bangin tu gega pong na pi mikhat zuaugen hawmthawhsak lailai uhhi. Ki dongleh zuau dingin a ki lawmlo peuh behlap to thei lai uh hi. Ngengei song aw…,

A tawpna ah; Zuau na genlam na ki theih aa gamdang tung takpi na hihleh zong khatvei zuau nagen pen na piltang mah ahih sam hangin zuau na gen kikkik ding pen amun le ahun in cin nawnlo ahih manin, zuau in tampi siatlawh in, nuntakna gimnam teng beisak thei hi cih na phawkkei hamtangin. Phawk khalo in zuau gen vanglak lecin nuamsa mahmah ding cin aa, an duh tui duh in zuau gen ding duh ki ci lai hi.

Na zuaupi teng khempeuh na tunna ding gam na sik a kipan na nung lamteng bek ah koih inla tonpih dingin sawm kei-in. Zuau bekbek tawh na hun hoihte beisak kha kei in.

Zuau siangtho panin thumanna siangtho ah Zomite a ki gal kahto ki hipan hi. Thupha asang ding ki hi pan bek zen hi. Thupha ngah minam asuak nuam ki hipan hi.

Hih ka gelh thupen kei ngaihsutleh ka muh thu ahih manin Pasian muhna ding lampan ka en kei aa, ei leh ei, kei leh kei kamuhna hi lel hi. Pasian deihna lamtawh gen ni cileng hihthu ki lehngat mahmah hi.

Vei luat manin a ki song solawi teng ahoih lamin na gawm tuah sak un. Zuau Siangtho tawh…ee.

Thawn Tuang
Zomi Angvaan