Libya tunglam panin kikap, mi 6 sihna tuak

Libya tunglam panin kikap, mi 6 sihna tuak

Nov. 17, 2016: Zan zingsang in tung lam panin Libya leitaw-nitumna a om Sabha khuapi kikap a, gamnuaimi dinga upmawh guk kikaplum a, thau tawi ten zato inn panin tua mi gukte luang va laksak uh hi. Zato uliante kuante lak hiam cih gen ngam lo uh hi.

Zan zingsang a tung lam panin a kikapna ah Sabha khuapi leilu lam-a Gardah kha a, inn nih kapsia dimdem a, inn thumna bel kisia hi ci-in ulian ten gen uh hi. Libya gam uk- nisuahna lam leh nitumna lam kumpi ten gamnuaimite a kap uh ciangin tung lam panin kap zel uh a, ahih hangin ko kap hi a ci kuamah om lo hi.

US ten zong Libya tung lam panin Libya kap zel uh a, ahih hangin US defense ten ko kap hilo hi ci uh hi. A kikaplumte pen ahihna uh a kigen dan tuam tek a, tua gamnuaimite bel Libya leitaw lam-a om al-Qaeda ahih kei leh ISte tawh kipawlte hi kici hi.

Libyan news website Press Solidarity in bel tua gamnuaimi kikapte pen Abdulrahman Belhaj Hesnawi (Abu Talha al-Libi zong a kici)-te ngimna tawh a kikap hi ci-in gen a, ahih hangin a site lakah hih gamnuaimite kihel kha lo hi. Gardah khua-a ulian khat in bel sihna tuakte gamdang mi vive hi a, tuate lakah Abdulrahman Belhaj Hesnawi kici kihel kha hiam cih bel kitel lo a, a luangte uh naikal 1 ahih kei leh naikal nih khit zawh in Gardah panin km.45 gamla a om local hospital panin thau tawi ten va laksak uh hi ci hi.

US in bel Aug.1 panin Gardah panin km. 500 gamla a om ISte hatna Sirte khuapi tung lam panin kap mun mahmah ta uh a, France ten zong Libya ah gamnuaimite etsimna dingin flying intelligence leh surveillance flights kici vanleng lengsak mun mahmah hi. Source: Al Arabiya/ Thang Khan Lian