Covid-19 Natna Dozia Nengneng ~ Nicholas Pau
Covid-19 natna pen, gilo mahmah in, a hau, a zawng, a cithei, a cimawh, a pil, a mawl, a sang, a niam, numei, pasal, a khangham, a khangmui, ulian, nautang, a thahat, a thanem, cihdan in, kuamah ong deidan hetlo mawk hi. Gam khangto aa i om aa, a khangtolo gamte ah i om zongin, a zatui a zaha ding omlo ahih manin, i dodan ding, i nanzia ding ong kibang pian hi. Tua ahih manin, tukum 2021 February kha sung aa, ka tuah uh thute siksan in, kikhoi kikepzia ding tawmno, lainatna tawh ong hawmsawn nuam ingh. Khat le nih aa ding a phattuam khaak dingleh cih ngaihsutna tawh ahi bek hi.
COVID-19 natna pen a lamdang khat hi-in, i lungsim ngaihsutna ong simthei “khuak”, AI( Artificial Intelligence) neileh kilawm kasa phial hi. I pumpi thagui sigui sungah mun ong lakkhit zawh ciangin, i lungsim mahmah zong ong zo nuamlua in, ong sattuk nuam hi. Thanem kha leng, a mah ong hat tektek in, ki thakhauhsak tektek leng a mah ong dualkik hi. Hih natna tawh i nuntakna ong bei ding pen baih mahmah veve hi. Denmah mah aa, a pauzo kim lai, min 1 sung bek huih kham ngahzawhlo’ tawh a kibei ziau thei ahi hi. Tua hi-in, i pumpi i zawm phial zongin, i lungsim i khauhsak teitei ding kisam lua hi. Lungtang phat mahmah a kuldan ahi mai hi.
Hih natna pan damna ding zatui a om hilo ahih manin, hih natna tawh i kinahvawh khak zenzen leh, i lungtang phatna tawh galdo i kipan ding hi. I natna danpen a tuamtuam hi-in, i puaklah i thuaklah dan zong kibang kimlo ding hi. Tua ahih manin, i pumpi thuakzawhna ong zawmsak phadeuh zatui tuamtuam nek zong i kidawp mahmah ding hoih kasa hi. I lungsim a khauhzawh nang, Topa tawh i kalsuan khop ong kul ahi zel hi. Laisiangtho sungah Sawltak Paul in, hihdan in naci hi. “Kei ka thaneem mahmah laitakin a thahat mahmah suak ka hih manin Khrih hangin ka thaneemna, simmawh ka thuakna, haksatna, bawlsiatna le lungkhamna ka thuaknate tawh ka lung a kim mahmah hi.” — 2 KORIN NIHNA 12:10
Natna i do laitak, i lungsim nih taitai in, na lungsim khat in, “ nang a si ding hita cei; kuamah suakta lo hi, a si ding nahi lel hi” ong cici kha ding aa, na lungsim a dang khat leuleu in, “kei ka dam teitei ding hi. Topa’n ong damsak ding hi” ong cizel ding hi. Lungsim nihna ii ong hopihna thanem pian ahih manin, tua i thahatsak zawh nading, Topa kiangah i khutte lam aa, “Topa aw, nong piakkhit ahi, damna thupha keitung ong tun madeuh in, hih ka natna ka vangikte ong puakpih in”, ci-aa thu i ngen ding hi. “Pasian in note hong kem ahih manin na lungkhamnate khempeuh uh ama kiang tunpih un.” — 1 PETER MASA 5:7
I pumpite zawmta leh, lumlum lo ding, tangtang ding i hi hi. I dingzel ding aa, lam i siauh zawh leh, kal khat kal nih bek ahi zong lamsiauh zel ding ahi hi.
Tuisa dawn le tuihu diik pen ahih leh ka zatuipi uh ahi zaw hi. Tawlna, a na phadeuh ten, ciltui na leng zong a valh theilo himah tase leh, tak khat tak nih bek ahi phial zong, tuisa i dawn hamtang ding hi. Tuihu diikzia ding leuleu pen, tuiso pen hai sung khat ah sung ding hang aa, puanza tawh kikhuh suk aa, tuihu i diikzel ding hi. Hihte pen i nat maa le i zawmluat maa in, nisim phialin, kipan khol leng ahoih zaw hi. I zawmluat khit leuleu ciang, tuisa suang ding aa, i gamtat ding zong, i tat zawhlo’ hun ong om tamawk ahih manin, ong baih nawnlo hi.
Kuapawl kuapawl nahi zong, nang ngiat le Pasian na kizopna(connection) a bit ding a kisam ahi hi. Na lungsim ah, lungsim thunget neih tawntung ding hoih kasa hi. Ko innkuan ka nat lai un, lungsim kitamkham ahih manin, hih ci bangin thu na ngen ngei ingh. “Topa aw, kei pen, thu zong, kammal kician zang aa, ong ngen theipa hi keng. Damna nong piakzawh ding lamtak bel thei ingh. Um sinsen ingh.
Ni khat teitei ciang, nang maa kiang ong ciah ding khat kahih manin, hih leitung natna pan damna nong piak ding le nong piaklo’ ding bel ken theilo hingh. Ka tate neu lai hi. Ka it ka Zi, ka Ta, ka Nu, ka Pa, ka U, ka Nau a diakdiak ka tung aa ong kingam ka innkuanpih teng, kei itna sangin, nang maa itna lianzaw thamtham ahih manin, ka vangik, ka gimna, kei bek in, puazolo ding kahih manin, ong puakpih in, ka Topa aw. Dam bel dam nuam ingh. Ahi zongin, nang maa deihna bang hizaw tahen”, kana ci ngei hi.
Kal nih zawh ciang ka innkuan un ka damkik uh hi. Ka pumpi gihna 30 lbs ka kiam hi. Damna ong pia pen, Topa hi cih ka kitel sinsen uh hi. Damna ong pia, a nungta tawntung Topa min thangta hen.
More: Kei maa Moral Politics ~ Nicholas Pau
Topa mai ah, nang sang ahoih zawtuan ahilo, ko innkuan tung, i Topa’n damna ong pia ahih manin, ko sang aa a hoih zawtham no mimal khatciat Topa’n damna ong piapia khin ahi ta hi. Tua i Topa thuphate, vadawh in, valak sawm ciatni. Genkhialh, gelhkhialh a om leh, ngaihdam bawm ah, nong na khiatsak na ding un, kong thuum hi. Topa kiangpan damna, vekpi tung ong tung tahen. Nicholas Pau
Comment piaknop aomleh...