ZYA News: Kawlpi Tazin & Tat Oo vengsung ah migilo tam & thutuamtuam

ZYA News (September 08): Kawlpi Tazin & Tat Oo vengsung ah migilo tam & thutuamtuam

ZYA ZUM INN PIAKKHIAT NA : ZYA Zum inn thak lamna ding tukal sung ngahna thak te:
No. Min Kyats
446. K B Z, Kalay 2 Ks. 50000/-
447. Pa Hang Ngaih Thang, SingzungKs. 15000/-

ZYA DVD KIKHAWM KHIA TA : ZYA in cimawh dongtuakte huh zawh nading lunggulhna tawh i bawl ZYA Series Vol-II pen tu in muntuam gamtuam ah kihawm khia ta a, USA leh Australia gamsungte pen ZYA panin Committee te paisawm ngiat i hih manin kihawm nailo hi. Tua lo tengah kihawmhawm ta ahih manin Zomi a kua mapeuh in tha i piak ciat nading leh Youtube leh Copy bawl loh dingin kithum hi hang. Original DVD khat Ks. 2500/- tawh ong leisak khempeuh ZYA nasepna ah lamkhat panin mapang khawm i hi hi.

KHUADO VAI ZAKSAKNA : Zomite ngeina thupi mahmah ahi Khuado pen a ni kibangin bawl ding ZYA in lungulhna kinei a, kumcin khawmpi thukhensatna ah GZA panin ani kician Kumpi theihpihna ingah masiah October (Khuado kha) khalikni ni pen Khuado a pi ni-in zat dingin thukimna nei khin hi hang. Tua ahih manin ZYA omna khua khempeuh in Khuado kha khalikni ahi Oct 5, 2017 ni-in Khuado pi ni-in zatciat dingin ZYA Zumpi panin kong tangko uh hi.

ZYA AH CLERK KIDEIH : ZYA Zum ah hunbit Clerk sem ding nungak khat kideih mahmah hi. Computer ah laigelh thei, sum sazian lam (Accountant) zong asiam mi hi ding hi. A lunglutte in ZYA Secretary Pa Mungpu 09400311770 leh ZYA Zum ah nongkan nadingun kong zasak uh hi.

BAPTIST LEADERS SUMMIT 2017 : Zomi Tuiphum Teltuam makaipite kimuh khopna Baptist Leaders Summit 2017 pen Oct 30, 2017 ni zintun Oct 31, 2017 thu kikup khopna Majesty Hotel ah kinei ding hi. Hih hun ah kihel dingin sapna angah makaite in nong kihel theih ding leh kihel theihloh ding tawh kisai-in zaksatna dingte ah Sept 15, 2017 ni lapin nong zaksak kimciat nading un zahtakna lianpi tawh kong zasak uh hi. Hotel Booking kholnuam i hih manin Hotel tung dingte peuhmah in a diak in hunlap a nong zaksak dingun lunggulh hihang.

ZOFA – CUP 2017 ZAKSAK NA : A 12 veina ZOFA – Cup 2017 a kimel ding Team 16 te in CV Formte Sept 23, 2017 lapin nong puak kimciat nadingun kong zasak uh hi. Kum leh mimal tawh kisai limtak in hongkisit ding ahih manin khemna hong kimuh, hong kitheih leh na team bup un hong kizahlo ding ahih manin ZOFA Committee te khemsawm selo in aman adik tawh nong kihel ciatna dingun zong kong zasak khol uh hi.

THE GLOBAL LEADERSHIP SUMMIT 2017 : Kalaymyo bulphuhin kum simin a kibawl makai thusinna (The Global Leadership Summit, G.L.S) pen Sept 20-21, 2017 sungteng Zion Baptist Church (CBA) Tat Oo Thida veng ah thupi tak in kibawl ding ahih manin sapna ngahte banah sapna ngahlo a lunglut i om leh makaite tungah kidawp thei hi. Sia Ngaih Thang 09400310025, Sia Ka Thawn 09259194255, Sia Langura 0925600248.

MIGILO TAM KIDAWMNI : Kalaymyo, Tazin leh Tat Oo veng sungte ah zansawtlam ciangin migilo om ahih manin numei khangno, u hamte vak sukvak tohvakna ah kidop huai mahmah hi cih i kithei sak a, a tang zang thahat i om leh zan 12:00 am nunglam vengsung ah vak in migilote nawt mang huai mahmah dinghi cih zong kiphawksak nuam hi hang.

ASEAN U-18 BAWLUNG KIDEMNA : Sept 4-17, 2017 sungteng Yangon Thuwana leh Aung San tualpite a kibawl ding Asia gam sunga kum 18 nuaisiah (U-18) bawlung kidemna om ding a, Kawlgam in inntek sem ding hi. Hih Asian U-18 kimawlna ah Brunei, Indonesia, Singapore, Philippines, Cambodia, Lao, East Timor, Thai leh Vietnam gamte kihel uh hi.

ASIA NISUAHNA KHANGLAM ADING LEI SAUPEN : Vietnam gam leh Asia gam nisuahna khanglam adingin leisaupen ding ahi Haifon khuapi a om Tanfulatchhuran lei pen Sept 2, 2017 ni-in lei honna nei uh a, Motor lampi 6 ah tai thei ding a, leipen Km 5.4 sau in Vietnam Sum Daung 11849 Billion bei a kibawl lei hi ci-in Vietnam Kumpi pa in gen hi. Nidangin tembaw tawh nai tampi kipai hi atu in Leitung tawnin nai tawmno tawh kipai theita ci hi.

THUKAN (MEDIA) KIMANTE VAI : Kawlgam galkapte in Kawlgam sung thukan (Media) lam nasem pawl khat Media thukhun om bangin manin thong a khum uh Media lam nasemte tawh gam leh minam phattuam nading nasep khop ding lunggulhna tawh maisak in a thu ven sakna nei-in Sept 1, 2017 ni-in anuai abang khah khiata uh hi.

• 1. U Wai Phyo Chief Editor The Daily Eleven News.
• 2. U Kyaw Min Swe Chief Editor The Voice Daily.
• 3. U Ko Ko Maung
• 4. DVB thukan U Aung Naing, U Pyae Phone Aung.
• 5. Aeyawady News pan U Thein Zaw.
• 6. U Kyaw Thin
• 7. Auo Vice-President We Zan Hein/Victor.

U SOE WE LUNGGULHNA PULAK : Tan twe myo ateng U Soe We kum 55 in Aug 7, 2017 ni pan kipanin Kawlgam sungah daihna leh kilemna a om nading vaihawmna ahi kum zalom 21 pilong khawmpi lawhcinna ding lunggulh pulakna in khat guak lampi zuihna nei-in Aug 31, 2017 ni-in Yangon tungin tua pan Karen, Mon, Tanintary, Nyi Pyi Taw, Mandalay leh adang State tuamtuamte dong pha in lampi zuiin lunggulh pulakna nei hi.

ARSA BENGALI MINGONG TATTE : Rakhine State sunga , tu laitak Kawlgam leh Leitungin a buaipihmahmah ARSA kici Bengali miglote pen Maungtaw Towship sung ah ngong tatna adeihlo khuamite kipawl in migilo a upmawh mi 7 man khia in palikte tugnah ap uh hi.

NLD THUDOTPI U TIN OO ZATO TUAK : NLD Party thudotpi leh galkap lianpen asem ngei Bogyoke gyi Thura U Tin Oo kum 92 pan May 17, 2017 ni-in tuk in khuaphawklo in Yangon zatopi ah kipuak in, kibawl a, tu in tampi hoih tuamta ahih manin Sept 1, 2017 ni-in zato tuak ta in inn ah Exercise bawlbawl kullai ding ci uh hi. A dam zonawn dingin kilamen mello hi a, tu in damin zato tuak cihpen thulamdangpi khat ahi hi.

PHA-AN PAKHUAN : Karen State Pha-an khuapi sung a om Chit Tuh Myaing pakhuan ah mipi et theih ding Air Pagan te vanleng Foka-100 namte khat Yangon vanlengtual panin Pha-an lamah Motor golpite tawh pua khia uh hi.Hih vanleng pen Htoo Company panin mipi ettheih dingin apiak khiat ahi hi.

GERMANY GAMBUP KITELNA : Germany gam ah Sept 24, 2017 ni ciangin gambuppi ah kitelna nei ding uh a, tu lai tak a Kumpi a sem Angela Marcel in term 3 kizom kum 11 sung sem khinin tutung kitelna ah zong ngah lai dingin lamen zaw uh hi. Gamdang gambel (Refugee) te tam lutsak lua ahih manin mipi tampi-in telkhia in alangpang Partyte thahatsak tuam ci uh hi. Angela Marcel in gambelmi 890000, 2015 kum in sangin mipi tel khialhna om ahih maninm 2016 ciangin gambel 280000 ah khiam suk hi.

MEILENG LAM VUANZI KITAWP : India gam sung ah tu sawng tengin Meileng kiphukha (Train Accident) nasia mahmah 2 vei omna hangin Meileng lama Vuanzi a sem Suraj Brabo a Vuanzi panin amah leh a mah kitawp in ama mun ah Electric, suang mehol leh leisung sumpiang lama State Vuanzi a sem Pirats Goel koih uh hi. Kumpi Narenda Modi Kumpi sep sungin Meileng lam Vuanzi 3 vei kilaihna hi ta hi.

BRAZIL AH MOTOR KIPHUKHA : Brazil gam Sanpolo State sungah Aug 31, 2017 ni-in meikhu hangin lampi limtak in kimu theihlo ahih manin Highway tungah Motor khat khit khat abanban in kiphukha a, Motor 36 ciang kiphukha in mi 2 si-in mi 20 val in liamlawh ci uh hi.

IRAQ GAM TALAFAR KHUAPI THU : Iraq gam Tal Afar khuapi pen IS migilote uk cipna nuai ah om uh hi a, Aug 31, 2017 ni-in Iraq galkapte in hih khuapi pen ISte khut sung panin lazo siangta hi ung ci-in tangkona nei uh hi. Mailam ah zong Iraq gam sunga om IS migilo kici khempeuh a zung dongah kalkhia in ka do mang ding uh hi ci-in pulakna nei lai uh hi.

Related: Kalaymyo thuthang pawlkhat & dahna nopna

DAHPIHNA : Pa Thang Lian Nang leh Nu Kham Lian Cingte tapa Tg. Thang Khan Hang Kum (27) in Sept 2, 2017 ni-in Pasian kiang hong ciahsat manin Zomi khangno thukhual, midik kikholhpih nuam khat a sum i hih banah ZYA in Sisan tawh nasepna ah a si ding mite nuntakna hot nadingin Sisan thawl 11 a hawm khia pa Emmanuel Baptist Church sungpanin atam hawmkhia lam hi a, khangno pammaihmahmah khat ahih manin dahpihna ZYA Weekly News panin kongpulak khia hi.