Kammal kilawm pawlkhat (azom 26 March)

Kammal kilawm pawlkhat (azom 26 March)

Ahi pen, ahi banga gen ngamna zumhuai lo a, ahi lo pen ahi banga genkhiatna pen, a zumhuai hizaw hi.

Ka deih khempeuh anei ka hi kei a, ka kisapnate hun lap takin, Topa’n hong sikh hizaw hi.

Khaicite zong a po khiat ma-in, muat phot sam hiven, nopsakna a om ma-in haksatna a om mah ding hi e.

I nuntakna sungah lungkham haksatna leh buaina tuamtuamte hong omom lel ding hi. Topa tawh i tonkhop a, ama makaihna sungah i nuntak nak leh a piang bangbang tungah lungkim thei-in, thuak dan i siam dinga, Topa tawh tonkhawm loin ama makaihna sungah i nuntak kei leh bel i vangik mahmah ding hi.

I van manphate limtakin i kepcingh mah bangin, Pasian in ama adingin a manpha mahmah eite, limtakin hong kemcingh hi.

Pasian tawh akop lo pilna, siamna leh hauhna neite in, midangte’ buai nading leh lungkham nading piangsak lel uh hi.

Ka taksa pumpi’ adinga kisamte thei mahmah napi-in, ka kha adinga kisamte ka theih hetkei leh bel, mi hehpihhuai mahmah khat ka hi gige hi.

Na sih ma-in, bang teng hih/sem cih a thupit mah bangin, na sih nung ciang koi-ah pai ding cih hong thupi mahmah ding hi.

Khazih sungah,
David Tuang