Ka Thelnah (2) ~ Zam Thuam

Ka Thelnah (2) ~ Zam Thuam

Lawm le gualte sungah amah pen mite telsiam in thungaihsut dan manlang hi. Amuhna zai in, mailam ding gelna tampi tak nei hi. Minam le gam cih pen vei in nei ngiat hi. Amah ka cih tua nu pen amin Sanlek ci-in lawmlegualte in ka sam uh hi. Hoih mahmah ci-in mite lakah a kigen vangvang lo hang a ngaihbang hieuhiau amah tawh thulela kikup khop pen ka lung a kim mahmah mawk hi. Amah ngai ning ka cih ngei loh hang ngaih kei ning cih peuhmah zong ka ngaihsun tuan kei hi. Amah tawh kisai ka ngaihsut thu in ama kiangah om dennopna bek ahi hi. Ama thugente ngai in ama kisapna le a sepnopte ka huh ciang nuam ka sa hi.

Ama lunggulhna le gamtatna hoih ka saklote zong bangmah gentuanlo in ka huh theih zah hanciam in ka huh hi. Kei lunggulh thu-in ama deihnate ka dip theihzah in ka dim ding hi cih ahi hi. Thu khat peuhpeuh ka kinial uh ciangin zong ama cih tawh a kituak kei leh a lungkim theilo amah pen ka manna ahih hang ka kilelh bawl, ka kikhialh bawl den mai hi. A mai tang nopmawh ding ka lungnuamlo hi. Hi bang ka cihciang ka kimuhna zia uh bang dan cih hong tellote in bang dan hiam a cihnop pawl khat om ding hi. Kei le amah pen University ah kum kibang in a lutkhawm ka hi uh a, Major khat ka hi khawm sawnsawn uh hi.

Ei mi lawmlegualte tawh kithuahna pan laigelh le laisim a uk ahi kei le thulela thei in minam le gam a vei amah pen lawmlegual lakah ka thu uh hong kituak phadeuh hi. Lawmte thulela gente sangin ko uktuak ka kikum uh hi. Kuama lunglut khollohthute tam kikum lua hi ding ka hi uh hiam, damdam in lawmte tawh kithuah sangin ko tengel ka kilim thuah semsem uh hi. Tua bang hi lel in midangte dan in kimuvat, hoih kisa tuak, kithuah kingai cih bang dan in a lamdang kimuhna, kituakna cihte om tuanlo hi. Lawmlegual mah tawh a khang khawm sungpan a kithuahthuah suak kha ka hi bek uh hi.

A ngaih bang mahmah lel ahi amah pen hun hong bei tohtoh tawh kituak in mitam tawh hong kithei semsem hi. Lawmlegualte in ahih leh kei tawh a kingai hong sa in hong ciamnuih thei uh hi. Lungsim picing mawhlo amah in ahih leh heh ding ngaihsun lo in tua dan hi kei cih ciang bel telgel mualmual zel sam hi. Kimuhna le kithuahna hong tamtoh tawh kizui in ken ka hih leh telgen ding cihthadah ka lung bang khat veivei hong kisim hemham thei ta hi.

Ka hamtoh tawh kizui in laigelh, la gelh (poetry) cihte ah lunglut semsem le ka nuam ka semsem hi. Sunmang manman in tuate kawm ah ka hunte ka beisak pen nasep bangin ka nei thei phial ta hi. Thungaihsut vai tawh a lungkimlo sepkhiat bulphuhna lamah amah zong hong thahat semsem hi. Zalmang sungkhia nuam mihing khat le sepkhiat a bulphuh nuam mihing khat kikal ah bangmah kigamlatna a om dingin ka ngaihsun khol kei hi. Aihhang tua pen a lau huai mahmah time bomb ahih lam ka phawk khak ciangin in ka ziakaita hi. Ziakai cih sangin thangpaihna le khasiatna tawh ka ma a zial bawl ding ka hihlam a thei kha lo ka hi mawk hi.

A kipatna pen Lawm Lianpi hang ahi hi. Lianpi pen kipawlnate ah makaihna le nasepna lam pen kiva mahmah hi. Lungsim siangtho in man a sakna mun ah dingkip hi. Man a sak kei leh deihtak nial in a kisap lethatang zang ding zongin a kiging nam ahi hi. Sepkhiat dingin a piang thei thute tung a ngaihsutna kinga hi. Khat veivei ama cihloh thu sa lo hi. Ama genthute sungah khantohna, minam itna le gualzawhna ding thute kihel hi.

Khatvei lawm Lianpi in kei kiangah “Sanlek tawh bang ciang tungta naw hiam?” hong ci hi. Kei zong ka cihna ding ka thei kei hi. Ka lawmnu lah hilo, ka lawm bek lah ahilo Sanlek tawh kisai in a gol mahmah khialna khat ka bawlna hong kipatna zong hong hi pah hi. Ka dawnna ah “ A kingai cihdan hi sam kei ung e. Kithutuak thu kikum khawm, lawm hoih gual hoih khat dan hi lel ung. Kawlte cihdan hi leh “tangechin”ciang hi” ka ci miaimuai mawk hi.

Aman zong “ Sanlek pen a manpha mahmah Zolia khat in ngaihsun ing. Mailam ah ngaihpih tulpih ding khawngin na ngaihsun kha na?” ci-in hong dong beh hi. Kei zong lungsim siangtho tak leh bangmah mailam ding ngaihsunlo tak mah in, “Tua bangin ngaihsun kei kikholhpih lawmhoih, zawl hoih khatin ngaihsun ing.”ka ci hi. Lianpi in zong “ Tua dan ahih leh ken Sanlek pen ka kingaihpih ding le ka tulpih ding kicing ka sak mahmah khat hi in, nang tawh tua ciang ahih leh kei kipan nuam ing. Nang zong panpih o maw” hong cih ciang ka khialhna mun ka theihloh khialna khat a om lam ka kiphawk lak hi. Kei pau tawh keia awk khin ahi ken ahih leh lunglutlo takin “aive” ka ci nuang sam hi. Muanna lianpi tak tawh ka khut hong len in ka khawlna uh ahi niangtuisai pan a ciah lawm Lianpi en in bang dan hiam cih gen theihloh khat ka awm sung thuakhak tak in hong lut mawk hi. A kician khat in ka lungsim sung khasiatna tawh a kigawm dipkuatna khat hong lut hi.

Hih bang teng tawh Sanlek maitang ka muh ding hamsa ka sa ta hi. Kipaupih nang khat peuhpeuh om leh paulap zongin amah tawh kigamlatna mun ah ka tai thapai ta hi. Ka zia ka tong manloh cih pen Sanlek in zong hong tel kha ding hi. Ahih hang kei omzia tawh kisai bangmah mah hong cihlo in ka gen khempeuh ama lampan a um bangin hong om tawntung hi. A um takpi hi ding hiam cih ahih leh ken ka tel tuan kei hi. Ahih hang kei genthute a um takpi ahih lam ka theihna ding thu khat hong om mawk hi.

Laisin na khan pan ciah dingin ka kithawi leh ka nungpan a thungkuah khau khat in hong letsak hi. Ka etleh Sanlek na hi mawk hi. Mai gum lua lah hilo, lungsim nawngkai mel pau pian sa in “ Tuni bel na man kei zong nong zuih loh phamawh diai maw? Kong kikuppih nop a thupi mahmah khat om. Ka mailam buppi ding tawh kisai ai maw” damtak le aw siangtak in hong ci hi. Ama cih ahih nak leh a nial ngam ngeilo ken ka hih leh tutung taktak ciang nial ning cih ngaihsun thei nai tuanlo in ama cihna ka va zui ta hi.

Niang tui sai sungah tu-in kipaupihlo in themvei ka om ngenga uh hi. A dipkuat huai gamtatna pen Sanlek in pankhia in hong puakkhamsak hi.

• “Tu sung teng kong muhnop hang nang man thei ngei mahmah lo in kimu thei ngei khang ei mate”
• “…….”
• “Kei pen numei khat ka hih banah sepkhiatna lambek ngaihsun khaden in mailam ading ngaihsut kholna lam ah thanem pian ka hiam kici thapai thei ing. Tua aih ciang a tuni nang hong zawn kai ve. Nang pen kei tawh kisai thu khempeuh kuppih thei pen ding, tua ciang zong tel pen ding naih ciang a a ci e”
• “Bang thu om dihdih ai hia”
• “Bang ci na hia leh, niangnuang nang pen khat veivei pasal vai kei mai ve the aw. Lawm ngaih khawng nei ta na hia? Hong huh ning ei. Aih hang pasal vai tak a na om sitset kei leh kuaman ngailo ding ai maw?”
• “Tua te koih phot oo… hehehe… Nong gen sawm pen bang ai hia?”

Kei tungah hong muhna le kei bang ci in hong ngaihsun cih hong ka thei ta mawk hi. Khawl nawnlo in ama thu ka dong suak pah hi. Bang dan bang dan ahi zong hihsang na sa zaw nawnkei ning a ci thei khin sa, a thuakzo dingin kigingsa in hong gen ding thute a ngai dingin a kiging ka hi ta hi. Amah zong a sam hong veito nuang in hong gen takpi ta hi.

• “Lawm Lianpi in propose hong bawl hi ven. Tua ka bang cih tam a ci hi veng aw.”
• “Nang e amah bang ci muhna hia”
• “Citak. Lungsim khauh. Sepkhiatna uk. Hangsan. Pasal picing vai sa ing. Hehehe.. Nang bang hilo”
• “Ama tung na hawmthawhna bang om ai hia?”
• “Ka gen nang om kei.”

“Imm…. Kei theihna ciang ah zong numei tawh buailua lo khat hi. Na gen ding hawmthawhna na muh kei leh nang ading ahoih pen hi pah ei. Aih hang mi dangte in kei bangin lungduaitak hong thuak hithiat ding ci-in ngaihsun kha kei o maw” “Aive… ken bel nang bang a lungsim siangtho tak a kakithuahpih lawm taktak dan a kong ngaihsut nang bek om mai. Lawmnu khawng zong ngaihsun vetlo a na om zong thupi sa mahmah ing ei. Nang tu dong ngaih khat zong nei nai lo maw?”

“Hi thute i genloh hoih zaw in teh. A taktak bel Sanlek aw, pasal vai nong saklohna, kician nong sak lohnate lawmhoih khat na hihna tawh nong hilh ding nong theihsak ding kisam sa ing. Oi… huah Lianpi pai ei. Hoih tak hopih o maw. Kei ka pai nang khat om in na pai ning. Lianpi! Hei Lianpi.. Hiah tu ung ei. Hiah na tu vo kei vai khat om in na pai khol ning ei”

Lianpi ko kiang hong pai hi. Nui seisai in hong paupih lam ka bil ah ka za kha hi. Bang gen cih ahih leh ka telzo nawn kei hi. Nui siaisuai pongin tua mun pan ka tai khia hi. Tua laitak ka theihkhak thu in Sanlek pen kiptak leh khotak in ka theihloh kal in ka lungtang sungah hong lut cih thu ahi hi. Tua ka theih ni in mi khat khut sungah amah ka ap ni ahi hi.

Lungleng khuangai tak in innlam zuatna lampi ah kal khat khit kal khat a suan ka hih lam kua man hong thei khalo hi. Ataktak in kuama hong bawl hilo kei le kei a kibawl ka hih lam kei le kei zong ka kithei hi.Bang hanghiam cihleh ama kiang pan hibang kammal te a zakha dingin ka kilamen kei hi. Ahih hang ka ciahna lampi pen ka kilehkik nawnloh nading lampi hi hilo ci-in ka lungsim sung ka pom tinten hi. Khat vei ka nung leh-et lai hi. Hih pen a tawpna taktak hi ta ding hi ci-in ka leh-et ahi hi. Ka kalsuan sim in lunglenna le khasiatna tumgingte a ging hong bang hi. (aban omlai) Zam Thuam