Zomi sungah Australia gammi hihna ngah ki behlap

Zomi sungah Australia gammi hihna ngah ki behlap

Queensland Brisbane aom UPa. Khaitawng(Thang Thawn Khai) te Innkuan in Australia gam mi hihna tuni in hong ngahta uh cih thu kiza ahih manin I lungdampih mahmah hi. Gam mi hihna ngahtheih na dingin thukhun tampi om-a, mipil khempeuh, mihau khempeuh, kumsawtpi omkhempeuh ngahkhit hi tuanlo ahihlam I theihtek kawmkal ah Zomi innkuan bucing khat-in hici bang hong ngahtheih manin I lungdampih diak hi.

A beisa, a nasepna Pawlpi sung leh a tuamtuamte ah citak in eimi honkhat zong nasep guan ahih manin Topa’n nusia hetlo in a thaman piamahmah cih hong phawksak a, nungdeuh a hong paisan anu in zong aom na thangvan sangnuam panin na lungdampih mahmah ding hi.

Laphuaksiam pa in kathum katau nateng lamna tawh hong heisak zo acih I phawk a, nungkum pen nu hong nusiat kum hita leh tukum 2015 kumin amau innkuan bangkua adingin a lungdam kum uh, a beisa sangin Pasian thupha tampi asan zawk kum uh leh mi tampite ading in thupha a hilai ding in Topa’n thupha hong piaksaklai hen. Lungdampih mahmah hang.

A lawm-it,
Rev. Do Khan Khai