Zomi Kipawlna leh SMART Goals ~ Carey Suante
Kipawlna, kithutuahna leh, tupna leh ngimna tawh khantohna om ding hi leh Zomite kikhangto mahmahta ding in ka um hi. Kipawlna tampi kineita a, kithutuak tak in tua kipawlnate kum tampi sung puah in i zuun uhi. Tup leh ngim zong nei tek in zong thupi kisa tek hi.
Ahizongin khantohna i cih nam tampi om a, i tupna leh ngimnate SMART ding kisam hi. I kipawlnate uh hih ciang tungta, hizah sam lai cih theih tamlo mawk hi.
Tupna-ngimna SMART/SMART goals bang hiam? SMART pen acronym hi a, a nuai a bang in khiatna kineisak hi.
- S – Specific – kician
- M – Measurable – teh theih
- A – Achievable – lawhcin zawh ding
- R – Realistic/Relevant – kipawlna tawh kituak/sep zawh bawl zawh ding, piang thei ding
- T – Time-Framed – hunciam nei
Zomi kipawlna khat hihte khempeuh a nei dektak khat om ngei hi. Tua in CCOC (Chins for Christ in One Century) ahihi.
S – CCOC in tup leh ngim kician nei hi. Zomi/Chin khempeuh Christian suahsak ding.
M – A tupna-ngimna teh theih hi. Zomi phazah teh theih a, tua pan Christian a suakzo/a suak nailo sim theih hi. A haksat a baih pen thutuam hiphot hi.
A – Hih lai lian in khial in ka tuat hi. A tupna a deihna uh a hoih mahmah hang in, a lawhcing theilo ding, a picing theilo ding tupna nei kha in ka tuat hi. Zomi nisimin a piang/a suak kiom den ding a, mihing kikhang semsem ding hi. Sihna in zong i tupna i tun ma in hong khak thei lai hi.
R – A tung a thu hang in a piang zo ding thu hilo hi.
T – Hih bel ciantak in nei hi. Kum 100 sung in, hi lian lel hi.
Tua dan mah in i kipawlna dangte na en sin ve.
Zomi sung khantohna leh kithutuahna khanna ding, cih bang zong kipawlna khat ngimna hoih tak hi thei hi. Ahizongin, khantohna bang lam, bang ciang kician kisam lai hi. Kithutuahna pen Achievable leh Realistic lo hi, minam khat a ding hi. Innkuan khat ngimna hi leh hi thei, piang thei hi. Lawmta thum leh li ngimna leh deihna hi leh piang thei hi. Tua mah bang in, committee sung, mi tawm khat sung, ahih leh bel kithutuak thei hi. Aihhang tua nangawn Zomi tampi committee member-te mah in i society hong khenkhen na hi zaw hi.
Kipawlna SMART
Kipawlna SMART ka cih ciang in a tupna leh ngimna SMART ding ka cihna ahihi. Gentehna in, kum 50 sung in Ivy League Universities te khat peuh ah Zomi sangnaupang 100 post-doctorate ciang sinsak ding, cih bang ngimna kician khat hi. A sangkah na ding uh University hoih penpente cihna hi a, kum khat in sangnaupang 2 ngah ding haklo leh piangzo lel leh kilawm hi.
Tedim khua sung ah lampi 10 km blacktop leh street lights tawh bawl ding tukum sung, cih bang e. Zogam sung khua inn 50 pan a tung lam omna khua peuhmah ah high school khat beek om ding, cih bang e. Kum 10 sung in kha mangthang 500 Topa’ kiang tun ding, cih bang e.
Nang hong gen dih ve! Zomite‘n kipawlna SMART bangzah i nei hiam? Bangbang kipawlnate in SMART goals/tupna-ngimna nei na sa hiam? Carey Suante
Comment piaknop aomleh...