Ka pa pen Khristian khat ahih hangin a kum 60 ciangciang pen zu tawh sa tawh kidiahin a gualnuam thei mahmah khat ahi hi.
Nopna dahna ah zu ne in, tua khit ciangin singtawng tat in zolapi awi pah ngiaingiai hi. Zolapi dawng khat a kihil sim in kah cihtakin kap den hi. Kapsa a melhoih omlo ahih mah bangin amai san neinai, a nap tolh zaizai pi in la sa nainai hi. Khitui taak datdat sa in lam pahpah hi. Alam kawm in la a eu in sa valval lai hi.
Ama kap en in a lawmte nui zaizai uh hi. Thangah semsem uh hi.
Kei bel ka maizum mahmah mai hi. Ka pa zong kahneh ka sa mahmah hi. Ka hawmthawh mahmah hi. Pasal pipi kahneh phadeuh teh ka ci thei zel hi.
Khua ( Tuithang ) ka ciah uh ciangin papi nupite kiho leh khitui luang pahpah hi. Innlam pite pute in “Khaino aw na khitui luangluang sak nawn ken” ci uh a, tua hun ciangin “ hi mah ei mataw” ci in kap semsem thei hi.
Tua hun ciangin naupang vai ciding hiam kei om muan in ka zum mahmah hi.
Kumpi nasep tawh nuntak zongin ka om khit ciangin zong innlam ka ciah ciangin ka pa mah tawh u sung nausung nopna dahna ah ka kikhawl thei zel hi. Ka neulai dan mah in kap thei zel a, tua hun ciangin bel bangmah ka pau nawn kei hi. Ka pa a kap pen a mawk kah hi kei. A thu khat om hi ci in ka sangsiam ta hi. Maizum dingin ka ngaihsun nawn kei hi.
Ka phawkkhak velval thu bang gen pong leng, Pu Pau Khan Khup te innkuan ( Singapore ) innlam ong ciah khat a thupiang ahi hi. Tua ma ni nithum ni li lai pawl in ka pa tawh cycle ka kibung uh a, kapa kheme thum a guh a kitan ahi hi. Inn ah om leh a kang lingliang ahi hi.
Pu Khupte nitak kitutpih ngeingai hi. Ka pa ut tentan ahih manin ka pai uh hi. A khe leisik theilo ahih man in ka tawi hi. Zolapite kisa ziahziah hi. Ka pa bel a ngei a ngei hi ta, nuam sa lua hi mai hi.
La khat a man ciangin khat in ka pi Ciin Lam Cing ( Capt Mang Tung Nung’ nau, Col. Khen Za Mung’ ni ) late ong hil deldel hi. Tua tak ciang bel ka pa kah cihtak ong kap hi. A dangteng pen lasak nuam sa semsem in kihuang ngiaingaih uh hi. Kap kawm, la a eu a sa kawm, lungkim zo nailo ahih manin lam dingin ong kipan hi. Ding thei vetlo ahih manin ong sam a “ ka tutphah tawh ong dom in la a laizangah ong koih in” ong ci a kei zong ka tuahpah hi. A tut sa in lamlam in kapkap a nuam sa mahmah hi. Adangteng bel thangah lua a kinui ziahziah hi mai hi. Ka pa zukham man a kap hi kei. A thu khat om hi ding hi ci in ka sangsiam lel a maizum huai in ka ngaihsun nawn kei hi.
2014- 2015 kum nih sungin ka nu le pa, ka nau neu pen leh ka makpa ( ka nau pasal) te in a ban takin ong nusia damdam hi.
Innkuan sung le nisim nuntak dan thakhat thu in ong kikhel lian hi.
Thu kigen la kisa khat peuh I galzak bek zong khat veivei ka kahlawh hun ong om hi. U sung nau sung nopna dahna ah ka pai ciangin nidang bang loin upmawh lohpi in khitui tolh zatzat thei hi.
Khatvei khualzin inn ka ciah khat, inn ka tun ciangin ka tanu u zaw ( Mangleuh ) in kuama sawlloh pi in tuivot ong suah saisai hi. Ka lungdam hiam, ka ngaihsut tam hiam theilo,tuivot hai ka san kawmin ka khitui ong tak daudau hi.
Ka tanu in a nu kiangah “ Ka pa tui ka piakleh kap ei nu, ka pa kahneh lua ei” ci in gen hi.
Tua hun laitakin ka bil ong puak leklak a, ka neu lai a ka pa kahneh ka sak pen banghang hiam cih ka tel thei pan hi. Khitui tampi ka bei khit ciangin ka pa kahnehna thute a tel thei pan ka hi hi.
Lian Tuang
Comment piaknop aomleh...