Jesuh ki tuiphumna kuamsungteng Mine siansuah nading Israel in sumbei piaksawmlo

Jesuh ki tuiphumna kuamsungteng Mine siansuah nading Israel in sumbei piaksawmlo

Israel in Jesuh kituiphumna mundinga ki upmawhna mun siangtho panin Mine siansuahna dinga sumbeite kipia loding hi ci. Feb. 6, 2017: Jericho khua panin kilometres tam lo kigamla a om kum sim in khualzinnmi million lang bang a hawh denna Jordan lui kiim-a om mun siangtho (holy site) Qasr al-Yahud (hih pen Arabic pau hi a, Castle of the Jews a cihna ahi hi) kiim pen mine tam kiphum lua ahih manin sikdai in mun nih in ki-umcih hi.

Hih Jesuh kituiphumna mun dinga ki-ummawhna mun Jordan lui kiim-a om Qasr al-Yahud kicihna pen 1967 in Israel kiim-a Arab gamte – Egypt (tua hunin United Arab Republic a kici), Jordan leh Syria pang khawm ten Israel June 5-June 10 na do uh a, hih kidona pen 1967 Arab–Israeli War ahih kei leh Third Arab–Israeli War (Six-Day War zong a kici) kici hi. Hih gal-ah Israel ten a leitang uh a humbitna dingun mine (lei sunga bomb kiphum) tampi na kam uh a, tu dong kisiansuah nai lo hi.

Nung kumin hih kiim-a mine kiphum khempeuh siansuahna dingin de-mining charity Halo Trust group ten Israel uliante, Palestinian Authority (PA) leh a mun neite Qasr al-Yahud local churches ten kihona leh thukimna nei uh a, a siansuahna dingin $4million project na pan khia uh hi. Tua bangin thukimna a neih khit nungun Halo Trust ten Qasr al-Yahud kiim-a mine kiphumte siansuah ding kipan uh hi.

Tu lianin hih kiim siansuahna dingin Israel kumpi in sum hong pia nai lo a, hih a kisiansuahna kiim pen Israel in a uk khumna West Bank sunga om ahih manin nasepna a kizop toh theih zelna dingin Israel kumpi in zong Hala Trust tungah huhna sum hong piak ding uh kilamen hi ci-in Halo Trust makaipipa Ronen Shimoni in ci hi. Hih kiim panin mine kiphum khempeuh kisuansuah leh biakinnte zong kizang kik thei ding hi.

A mun pen sikdai kikaihna nung hi a, nisim in mite lauh ding liang bel hi sam lo a, ahih hangin Jericho bek hilo in Jerusalem bitna ding ahih banah local economy in zong nakpi takin phattuampih ding hi ci hi. Mine siansuahna dingin nung kumin $80,000 sanga tawmzaw bek kingah zo a, nasepna a kizawhsiang theihna dingin $500,000 bang kisam lai hi ci-in Shimoni in gen beh hi.

Qasr al-Yahud kiim bekah mine kiphum lo a, West Bank sunga mine kiphumna “minefields” kici adang 16 om lai hi. Hih mine kiphumte pen 1960s in Jordan galkap ten a panmun poimawhte a humbit theihna ding uh leh Israel galkapte a mainawt ding uh dalna dingin mine a phum uh ahi hi. Halo Trust leh PA kipawl in Qalqilya, Bethlehem leh Hebron kiim ah minefields li ah mine siansuahna ding nasem uh a, US, UK, Netherlands leh New Zealand in project huhna sum hong pia uh hi ci-in Palestinian Mine Action Centre-te a makaih Brigadier Juma Abdel Jabbar in ci hi.

Qasr al-Yahud kiim pen Christiante ading mun siantho pen a thumna in kiciamteh a, biakin sagih – Franciscan, Greek, Coptic, Ethiopian, Romanian, Russian leh Syriac Orthodox churches om a, a tamzawte 1930s kiim-a kibawl hi a, mine 3,800 kiim a om banah 1967 kidona hangin biakinnte thautang in kapna mun vang tam mahmah a, tawlette a tamzaw kisia hi. Mine siansuahna dingin Georgia panin sappers team 35-40 in nasem uh a, sum a muh beh kei uh leh nasepna uh mainawt thei lo ding uh hi. Hih kiim golna pen football ground 138 tawh kikim hi. Tu hunin siampi/priest ten hih munah mi tui a phum ding ciangun gunkuang neu zangin pai uh hi. Source: Al Jazeera/ Thang Khan Lian