Trump in Putin gum, US in ahih khialhna hangin mi tampimah sihlawh ci

Trump in Putin gum, US in ahih khialhna hangin mi tampimah sihlawh ci

Feb. 6, 2017: Fox News ten Trump a interview na-ah Trump in ISte dona ah Russia tawh ka kipawl ding hi ci hi. Russia kumpi kigolhna hangin mi tampi in sih lawh ahih manin Putin pen mi thatpa hiam cih dotna a dawnna ah Trump in Putin’ gamtatna pen US kumpi’ gamtatkhialhna hangin mi tampi mah in a sih lawh tawh kibang a, US kumpi’ gamtatkhialh manin leitung mun tuamtuam ah mi tampi takin na sih lawh khin zo hi ci-in dawng hi. Trump in, “Ei gamtatna zong ki-enpha kik dih ni. Na hihkhiah tampi i nei hi. Iraq sim ding a kipat cil panin ka na langpang a, i hihkhialhna hangin mi tampi takin na sih lawh khin zo hi,” ci hi.

Fox News ten a dotna ah Putin pen mi thatpa (Putin in a killer) cih dotna a dawn’na ah Trump in mi that tam mahmah a, en zong mithat tam kinei mahmah hi. I gam (US) pen mawhnei lo leh mawhbaang lo bangin ngaihsun na hi hiam? I gam pen mawhbaang vet loin ngaihsun na hi hiam? ci-in leh dot hi. Trump in ISte dona Russiate tawh ka kipawl ding hi. Russia tawh kipawl ding ka cih ciangin Putin tawh na khempeuh ah thukimna nei hi ung, ton khawm hi ung ka cihna hilo hi. Mi zahtak tampi ka nei mah hi.

Ahih hangin ka zahtak khempeuh tawh ton khawm den ding hi’ng ka cihna hilo hi. Putin pen a gam ua dingin makaipi ahi hi. Russiate tawh kipawl loh sangin kipawl leng hoihzaw ding hi ka ci hi. Russia in IS leh Islamic terrorism dona ah hong hong kipawlpih a, hong huh ding leh ka kipawlpih ding hi. Putin tawh ton khawm ding ka hi hiam cih bel ngaihsutna ka nei kei hi (Will i get along with him? I have no idea) ci-in dawng hi.

Trump in hih bangin a kampau khiat manin Trump’ politics lamsang-a a langpang ten Trump in US leh Russia a kikim bangin gen in kampau hi hi ci-in gensia pah ngeingai uh hi. “Upadi leh zuih dinga kibawlte zuih teitei ding cih a um mi/thuneihna tawh ngeina kibawlte zuih ding cih deihmi (authoritarian) leh tualthahna tawh kumpi’ ukna (murderous regime) pen kihtakhuai mahmah hi. US gam-a mipi teelcing ulian khempeuh in President Trump in mi up theih dinga thu kihtakhuai a thugen pen i langpan’na dingin mawhpuakna kinei tek hi,” ci-in Senate Foreign Relations Committee-a high ranking member Senator Ben Cardin in ci hi.

Cardin in Trump in America pen a tuam lieuliauna um lo hi cih a thugenna panin kitel a, mi tampi a that Putin’ ukna leh US a kikim bangin tehkak hi ci hi. Hih bangin Trump a kampau khiat manin White House ah US geelna masa sak lo hih signal khak a, Russia First Policy amasa sak banah American mipite, galkap pensionte, a hangsan galkap ten USte’ manphatna, suahtakna leh nuntak zia ding humbitna dingun nisim in a kipiakkhiatnate uh simmawhbawl sak hi ci hi. Putin’ ukna nuai-ah Russia gam-a Political langpangte (opponents/opposition) leh independent journalists-te kisuam in, thong ah kikhum in, kithat hi ci-in gen thuah lai hi.

US House a Democratic Leader Nancy Pelosi in Trump pen Russia tungah nem lua hi ci-in ngawh a, Russian ten Donald Trump tung panin bang hamphatna neihpih in ngah uh hiam cih ka thei nuam hi ci-in Ms. Pelosi in NBC News ten a interview na-ah gen hi. Tua ahih manin Trump in ama’ mimal, sum leh paai lamsang leh politics lamsang ah Russia tawh bang kizopna nei uh hiam hiam cih leh bang hanga Putin hih banga thupi ngaihsut hiam cih FBI in thu lim takin a kan dingin ngaihsutna ka nei hi ci hi.

#Behlapna: Trump in presidential election hunah a cin’ theihna dingin Russian intelligence ten DNCte computer system hack sak in, Trump gum hi ci-in US intelligence agencies ten ci uh hi. Hih thu hangin Trump in Putin zahtak bawl hi kici a, hih bangin US intelligence agencies-te thu pholakkhiatna pen Trump in um loin Iraq gam uk Sadam in WMD galvan a neih lohpi nei hi cihna tawh US kumpi Iraq gam simsakte hi na cihsan a, hih thu hangin a kitelsiam lohna uh dam siang nai lo hi. Source: The Hindu/ Thang Khan Lian