Japan, Hokkaido ah khuasung Bus te ahawl omlo in zatsawmta

Japan, Hokkaido ah khuasung Bus te ahawl omlo in zatsawmta

Japan, Hokkaido, Kamishihoro khuasung ah mipi zatding in akitaisak Public Bus tepen ahawl omlo in sinna kineita cih Japan Times pan kiza hi. Tua asincilna pen zanni Saturday ni in akipan uh hi a, “Driverless Bus Service” kici hi.

Kamishihoro Municipal Government te makaihna tawh ahawl omlo khuasung Bus Service sinna anei uh ahihi. Hihbang in sinna aneihna ah khuasung adiakdiak in mualsangdawn kahtohna, lamto cihte ah buaina aomhiam, Technical Issues bangteng omthei cih sitcianna anei uh ahihi.

Kamishihoro Mayor Mitsugi Takenaka in agenkhiatna ah hih “Driverless Bus Service” tepen ki zangsuakthei tading in ki lamen hi. Khuasung mipi te’nzong phattuamna tampi ngahding in ki lamen hi ci’n genkhia hi.

Hih “Driverless Bus Service” ah akizang Bus tepen French-made Navya Arma autonomous bus kici a, SoftBank Group Corp unit panin SB Drive Corp. te bawlkhiat kici hi.

Hih ahawl omlo Bus te tungah GPS leh Sensor akigawm in 8 kithuah a, akisin hunsung in mawtaw pen ahatna 10 kph tawh kitaisak cihi.

Khuasung aom Municipal Government Office geiteng ah Meter 600 bang asau lamzikpi tungah akisinsak cihi.

Hihbang in “Driverless Bus Service” pen ni 3 sungbang kisinding, Test Run in ki taisakding ci a, tua hunsung in khuasungmi 120 bang atawmpen tuangkhading in ki lamen hi.

Akhangto gamte ah khuasung kikawmna Public Transportation te nangawn ahawl omlo, Driverless in kipanta uhhi. Khuasung mawtaw adim mitmet, ataiziahziah lakahzong ahawl omlo “Driverless Bus Service” te zattheih sawmta uhhi.

Hihbangdan ahawl omlo Driverless Service azangpen Japan gamsung khuadang tuamtuam bekthamlo, adang gamkhangto pawlkhat ahzong akizangzang khinta ahihi.

More: Tonzang ah tualvak habot te kiang habotna hangin mikhat in sihlawh

Myanmar, Chin State, Zogam ahbel hakgega mahin mihing in ahawl mawtaw tezong tuahsiatna, Accident kiza pahpah hi. Lampi mahmah ginalo, lamkhang kendangkhawng leisai vukziauziau hihtuakmawk ahih manin, tua leisai tungah anawkkha mawtaw te akiatdingmah himawk hi. Gamdang te khantohzia tawh ih tehkak ciangin Zogam lampi tepen khasiat huai mahmahmawk hi. Sawltak #zomidaily