Tonzang ah tualvak habot te kiang habotna hangin mikhat in sihlawh
A beisa July kha bei kuan (July nitawpna lam le Sept kha kipat lam) lai in Tonzang township sung khuano khat panin a tualvak habot mawk mite kiangah a ha bawhsak na hangin gulut in a sih lawh khat om hi cih kiza hi.
A gulut a thuak lah ciangin Tedim zato zuan in pai uh hi. Ahi zongin Tedim panin Kawlpi paisuak ding kisawl aa Kawlpi a tun zawh asawt lo in si hi cih thu kiza hi.
Hih vai tawh kisai in misi pen Tonzang Township pan ahihna dung zui in Tonzang khua, Tonzang zato pan a sasa, tua bang danin a gen ki om hi. Tua bek hilo in Tonzang zato Dental ward panin a habot dan in thu theilo pi in a mawk gengen ki om hi.
Hih vai tawh kisai in Tonzang Zato Kivelna (Medical OPD ah ahizong, Ha le kamsung kivelna lam ahizong bangmah theihpihna omlo hi. Tonzang zato panin sawlsawnna ahi zong bawlna ahi zong bangmah kinei lo, bangmah kitheilo hi.
Tonzang zato ah kilahna hong nei kiuhkeuh lo hi.
Tua hi aa, Khua khat, Zato khat daisak nopna tawh hi bang danin thumanlo pi a mawk gengen a omlai leh thukhun om bangin thu hong kibawl ding hi cih ih kizasak hi.
Tonzang zato, Dental ward ah nisim in vante meitha/meiset zangin van-uii na set autoclave tawh a ki uii in lungno a kithat siangsitset/sterilization kibawl den hi. A ki uii theilo vante zong zatui diahna tawh kidiah in disinfection kibawl den hi. Siavuan Siamah icih te pen a mawk om meimai hisam lo a, amau treatment piakna khat tungah mawhpuak a nei te uh ahi hi.
Tua mah bangin a mau hong bawlna tungtawn in asia te koi cih leng hoih ding, a hoih te koi cih leh hoih zaw lai ding cih a theite ahi hi. Tualsuak zatui mawk theih mite tawh genkakna ding mahmah omlo hi.
Ahih theih leh ha bot thei tah, suan thei tah ci’n a mawksiam mite kiang kilak loh limlim ding ih ki hanthawn hi.
Related: US, Iowa State ah Pa Stephen Pau Suan Kim (Tonzang, Naulak) thautawh kikaplum
Deihsakna leh Zahtakna tawh,
Dr. Thang Sian Khai, TMO, Tonzang Zato
Dr. Nang Khan Lian, Dental Surgeon, Tonzang Zato
Comment piaknop aomleh...