Japan gamah kumpi thak le hunthak kipanding

Japan gamah kumpi thak le hunthak kipanding

Hong tung ding May 1 ni akipan in Japan Kumpi (Emperor) thak kah ding a, ma kumpimang hun sung teng pen “Reiwa” Hun kici ding in tutung April 1, 2019 ni in hong tangko uh hi.

Tulaitak Kumpipa Emperor Akihito pen kumpi ahihna pan pan April 30 ni in tual ding a, a tapa Naruhito in a za luah ding hi. “Reiwa” cih in “order & harmony” cih a khiatna hi.

Hih min piak ding in huntampi tak asimtham takin akikup khit uh ciang in hong tangko uh hi. Japan minam te pen a gam uh a, a uk Kumpi te tawh kizui in abeisa kum 1200 lai pek akipan in HUN min piak ngeina khat nei uh hi.

Hibang in Kumpi (Emperor) thak a kah ciang in KIKHELNA lianpi vaihawm thei uh a, a mau gam bek tham lo veng le pam gam te leh leitung tangthu sung ah a sia a pha tampi a piang sak zo Japan minam te ahi uh hi.

Tulaitak a Kumpipa Akihito pen 1989 kum in a pa Hirohito a sih akipan Kumpi a sem ahi hi. Ama hun sung in a pa Kumpi Hirohito hang in apiang Galpi Nihna lai in Japan te hang in haksatna athuak kha gam te huhna le kilemkikna thupitak in bawl khin ta hi. By Zingsol tanu