Kibuai lunglung ~ Lian Tuang
September kha bei kuanin nasepvai khat tawh Yangon ka zin suk pak hi. Khualzinvai lawmte gelna omsa bangin Hotel khat ah ka tung hi. Khual ka zinzel hangin Yangon khuapi sung ka tel zo mahmah kei hi.
Hotel le mandat
Vanlengtual pan Hotel paina pen lawmte tawh ka hih manin amau nung zui lel in bangmah buaina om lo hi. Ka Hotel mai lian ah kawl biaknapawi khat om in mandat lian mahmah khat zong kilam hi. Ka lungsim sungah Hotel le mandat a kimaingat hi ci in ka ciamteh hi.
Azingciang nitaklam meeting man ciangin khua sungah ka naute kiang ka giak phei hi. Khuasung tello kahih manin ka pai nading address le ka Hotel address te hoih tak ciamteh in ka lotngah zezen hi. Ka naute kiang pan zingsang meeting lap in Hotel ah Taxi sap in ka zing ciah leuleu hi.
Mandat muzolo
Taxi hawlpa in ka Hotel omna mun tel lianlo hi. Ahih hangin a Mun le lampite kagen ciangin ong sang thei in a sap ka hi hi. Nai lang khit khawng ciangin Hotel mai a lampi tung ka tungta uh hi. Nai mahmah ta ahihlam theitei ka hih manin lampi gei kawl biaknapawi mandat ka zong kawmkawm pah hi. Ahi zongin mandat dan ding ong om thei mahmah lo hi.
Minute 15 bang khit ciangin Taxi hawlpa kiangah kilehkik ni Hotel khengkhin limlim hang, hi tantan hi kei ci in tua lampi mah tawnin ka kileh leuleu uh hi. Ka kileh lam mah in zong kawl biaknapawi mandat mah ka zongzong hi. Tua bangin paipai in Bagaya lampi ka tung leuleu uh hi.
Hoihtak khuadak
Khengkhin leuleu hang ei kileh ni ka ci leuleu hi. Amah zong lungduai bilbel in nui himhiam sa in ong kilehpih leuleu hi. Tua kawm mah in mandat ka zong kawmkawm leuleu hi. Mandat le Hotel a kimaingat in ka ciapteh ahi hi.
Cimawh
Tu a na taktak bel khahsuah nawn buanglo e, ci kawm in hoih takin mandat ka zongzong kawmkawm hi. Ahih hangin ka mu zo mahmah tuan kei hi. Tua ciang mawtaw khawlsak in ka lawmte Phone tawh hopih in I Hotel koi lian ah om hiam cih ka dong pha kik san hi.
Ka lawmpa ong genna ah “ Paisuk taklam, paitoh veilam ah kumpi zatopi khat om in tua gal hi pah hi” ong ci hi. Ka khuadak leh ka khawlna uh pen tua zatopi mai tektek na hi citciat hi. Tua pan ka gal et kawikawi leh a pam mahmah ah ka Hotel na om leltak hi. Kei le kei ka maizum suak in ka thangpai mahmah hi. Hotel mai ah mandat na om nawnlo hi. Pawi manta ahih manin a kiphel khin na hi hi.
Kei le kei
A kikhelthei nate le a muanhuailo thute siksan lenkip in thu khentat kha ka hih manin hih bangin a zingbuai ka hi leltak ve maw ci in kei le kei ka kiphawk hi.
Tua mah bangin gam le minam vai, innkuansung le mimal vai, biakna le upna, kipawlna le vai tuamtuamte ah zong I siksan le I dinpihthute a muanhuai le thumanthutak ahih ding thupi mahmah ding hi. Tua hi keileh a kullopi in a kibuai lunglung thei ding na hi mawk hi cih ka phawk kha hi. Lian Tuang
Comment piaknop aomleh...