Itna icih in banghiam ~ Dal Sen

Itna icih in banghiam ~ Dal Sen

Leitungah mi tampite in itna zongin tai uh a, ki tai kik zel lai ding hi. Hih leitung hun tomno sungin lungnopna dingbek zongin a tai mi tampi om uh a, ahi zongin tua bang mite in, lung khamna tui hualpi a phut khak uh ciangin ki leh kik theihna dingin hatna nei nawnlo thei uh hi. Tua bangmi ii hi kha ding hiam?

Nungak leh tangval ki ngai in, ki it mahmah uh a,ahi zongin a inn kuanpihte un,lung kimpih hetlo uh ahih manin a tawpna ah kikhen nading zingni hongsuak hi. Nungaknu pen a inn kuanpihte in,a ut loh pipi in, tangval dang khat tawh ki teeng dingin sawt uh a, tangval pa a lungsim na mahmah in, nungaknu in zong zawltai ding phamawhsa lo hi.

Ahi zongin tangvalpa in limtakin a ngaihsut khit ciangin haksa sa-pipi in, khitui nul kawmin a it mahmah a lawmnu in, a nu leh a pate maipha mu a, thupha a san theihna ding a ngaihsutsak ciangin kikhen nading thu na genkhia hi. Tua pen a it man hi a,itna hi kei ii ci thei ding hiam?

Nungak in ngai thei het loin, tangvalpa in ngai mahmah in,ken hongngai ing mi aa dingin hongphal thei keng, kei nong ngaih kei leh tua bangin ka omding, ahi kei leh kong tua cih ding hi, ci-a, a phinna pen itna hilo hi, ii ci thei ding hiam?

Mi pawlkhatte in ki ngaihna leh itna pen kibang hi ci thei uh a,hilo hi. Pawl khatte ki it lo napi in,ki ngai thei hilo ii hi hiam? ki ngaihna pen ki itna hilo a, ki ngaihna panin ki itna piang thei zaw hi.

Mel hoih man a, ki ngaihna in,sawtvei khom lo a, mel hoihna a kiam ciangin ngaihna zong kiam thei hi. Na ngaihnu na ngaihpa Accident na hangin ahih kei leh dam lohna khatpeuh hangin a mel ngeina bang nawn loin et ngam loh zahding dongin om hi leh na ngai zo dending hiam?

Mi hingte ii nuntakna sungah tuahphat hun om a, tuahsiat hun zong om hi. Leitung nuntakna pen ki lumlet den a, ei deihna bangin piang thei den lo hi. Tua ahih manin sum leh paai a neih man a, na ngaih ahih leh tuahsiatna khatpeuh nei in, sum teng bei in, anhuan ding om loin meikuang bek en in,om leh na ngai den zoding hiam? Sum neih man a, na ngaih ahih leh sumteng a bei hunhun in ki ngaihna zong bei thei hi.

A mi zia, a dinmun,lungsim ki thei a, a ki ngai te zong ki nin hun nei in, sawtvei ki khom lo thei uhhi. Tua ahih manin,a hang omla a, it man a, itna in, ahih leh a tawntungin kip hi. Dal Sen