Iraq gam muntuamtuam ah Suicide Bomb kipuaksak

Iraq gam muntuamtuam ah Suicide Bomb kipuaksak

Nov. 7, 2016: Iraq galkapte leh a pawl ten Mosul khuapi lak kik ding khuai bangin a buai vengvung lai un Iraq leilu lam-a om Tikrit leh Samarra khuapi sihpih bomb tawh kisuam kik leuleu uh a, mi 21 kiim in sihna tuak hi.

Iraq khuapi Baghdad panin km. 95 gamla a om Samarra ah sihpih bomb nih kipuaksak a, Tikrit khuapi ah sihpih bomb kipuaksak hi. A site lakah Iran gammi 4 kihel a, Samarra khuapi a kisuamna mun pen Shia Muslim biak piakna pia dinga khualzinmite omna mun ahi hi. IS ten ko gamtatna hi ci-in tangko uh hi.

Samarra khuapi ulian ten Samarra khuapi ah mawtaw kingaksakna mun (parking lot) kianga Shia biakna pia dinga khualzinmite omna munah ambulance zangin sihpih bomb kipuaksak a, tua khit in sihpih bomb puaksak nihna pen in a kawng-a a khih sim sihpih bomb puaksak hi ci uh a, hih munah mi 11 a sih (Iran mi 4 kihel hi) banah mi 100 in liamna tuak hi ci-in gen beh uh hi. Tikrit khuapi pua a pen car zangin sihpih bomb puaksak khatin mi tamna checkpoint ah a bomb puaksak hi.

Baghdad khuapi ah bomb neu nono mun tuamtuam-ah kipuaksak a, mi 10 a sih banah mi 21 in liamna tuak hi ci-in zato ulian min gen loh (a min uh a gen ding uh kiphal lo hi) ten AP news agencyte kiangah gen uh hi. Mosul pen Baghdad panin km. 400 kigam la hi. October kha panin tu dong mun tuamtuam a kisuamna hangin mi 100 val in sihna na tuak ta uh a, ISte a thanem pian hangun dual tuan lo uh cih kilang hi. Source: Agencies Thang Khan Lian