Interview with Tg. T.E. Pau

Interview with Tg. T.E. Pau

Christian lai lam nasepna ah Kawllai tawh Pasian nasem khat ahi Zomi vontawi Tg. Thawng En Pau @T.E. Pau pen Chin World Media te in Kawllai tawh holimpihna (Interview) pen Zomite’ theihkim ding deihna tawh Tongsan Media Group in Zolai tawh letkhia kik in hong kisuaksak hi. Tg. T.E. Pau laigelhte’ sungah ” Jesu tawh holimna ” cih pen Kawlgam ah akideih mahmah laibu minthang khat suakin, asim nuamte in ama Website : www.tepau.infor zongah kihawh thei ding hi.

CW : Siapa…na minpi, nu le pa min le na pianna khua le tui cihte nong gen thei diam?
T.E.Pau: Hih bang a holimpih theihna nong neih manun lungdamna hong gen masa nuam ing. Kei pen Pa Hau Lian Khai le Nu Ciin Do Niangte’ tapa hi in, Tedim khuapi ah suak ing. Christian laigelh minthang C.S.Lewis in ama minpi ahi Clive Staples Lewis zang nawn loin, C.S Lewis azat ziau pen dik kasa peu maha, ken zong laigelh min dingin T.E.Pau ka nei hi.

CW : Pilna zonna tawh kisai na tuahkhak thute tawm nong pulak thei diam?

T.E.Pau : Tedim pan Tansawm ka zawh ciangin Yangon ah ka om suk a, 1999 kumin Myanmar Institute of Christian Theology, Yangon ah Bachelor of Theology sinin, 2003 kumin B. Th degree ka zo a, tua khit akipan lai lam ka lunglut pah a, tuni ciang dong mah lai nasepna tawh Pasian nasem khat ka suak hi. Secular education lamah bel University of Monywa pan ( 3yrs- Law) ka sin laitak zo man lo deuhin haksatna tuamtuam tawh khawl suak mai ing.

CW : Na laigelhna tawh kisai-in, nang le nang kimuhna le kisinna cihte nong gen thei diam?

T.E.Pau : Laigelhna tawh kisai bel a lamdang lua ka gen ding om tuan kei. A hangin a tamzaw pen lai let khiat (Translate) tam zaw ahih manin, laisimte lungsim a sukhak thei kammal zattheih ding thupi ngaihsut pen ing.

CW : Na laisim ding mite bangci nam hi ding ngaihsutna nei na hia ?
T. E. Pau : Tuni ciangciang ka laibu lekna le gelhnate pen Christian laibu ahih manin,a tamzaw Khristian khangnote sim theih ding mah ngaihsutpi in nei ing.

CW: Laigelh siam khat na hihna ah nang ngaihsut le deihna bulpi taktak bang pen hisak na hia ?
T. E. Pau : Ka gelhsa/ ka leksa lai khat pen kei mahmah ka simna tungtawn in ka lungkim ngiat in, ka khialhnate kiphawk in, puahpha kik ding cih pen tupi kasak khat ahi hi.

CW : Siapa nang nisim in laigelh/ tei maw le?
T. E. Pau : Laidang tuamtuam gelhnopna tawh laibu suak taktak ding nisim gelh zo nai lo hing. Laigelhna dingin lungsim sungah phawnna ( Inspiration) om kei le haksa mahmah hi. A hi zongin lungsim ah suahhun (Inspiration) ngah denna tawh laigelh siam khat kisuak zo lo ding hi zel hi. Tua manin lungsim ah a suahna pen 10% bek hi-in, hanciamna pen 90% bang i neih kei le laigelh siam minthang kisuak thei lo ding ahi hi. Tua hi in nisim a laigelh zawhna ding hanciam sawm mahmah ing.

CW : laigelh minthangte’ sungah kua pen in nang hong tawsawn penpen ahia Siapa?
T.E.Pau : laigelh siam ka etteh bel tam mahmah ven..a diakdiak in lailek siam U Kyaw Hlaing Oo mah hi pen mai. A ma laileh (translate) khat ahi ” Uncle Tom’s Cabin ” kici laibu pen ka neulai pek a kasim ahih manin, tua laibu mahin hong tawsawn penpen khat hi dingin um ing.

CW : Nang nuntakna le na tuahkhak thu tungtawn a na gelh khiat laibu om hia Siapa?T. E. Pau : Laisiang tho sang kah lai-in ka tuah khak tungtawn a, ka gelh pawl khat om mah. Tua hun a ka gelhte Writing Style pen Allegory tam pianin, asawt loin ka Website ah koih sawm ing.

CW : Bang hun, bang kum akipan laigelh kipan na hia Siapa ?
T. E. Pau : Abeisa 2000 kum pawl akipan hi mai. Zomi Laisiangtho sang pawlkhatte bawl magazine le kawmtung asuan ding Laisiangtho kammal hoihnono cihte tawh laigelh kipan hi mai ing.

C W: Hih bang a Khristian laigelh dingin hong makaih le hong genpih om hia ?
T. E. Pau: Khristian lai lamah lut ding hong genpih ngei pen ka pa neu Rev. Thawng Khan Sing (Yan Win) hi-in, amah zong lailet lam mah asem khat hi. Tulaitak Myanmar Baptist Convention,( Director of Evangelism and Mission Department) ah sem hi. A ma laigelhte ka neu lai akipan ka simsim a, tua tungtawn in lai ukna tampi ka neih lawh hi. Tua banah ka sangkahpih ahia Tg. Thangno le Aung Aung te’ laigelh ahi (Mang mat thak) kici laibu ka simna pan zong hi. A thupi khatah laigelh siamte tawh hong kimusak Salai Ram Ling Hmung hangin tampi ka lungdam hi.

CW : Laigelh khat hihna ah a lungkim huai le angtan huai nasak thute nong gen thei diam?
T. E. Pau : I laigelhte mi tampi in asimna tungtawn in, thathak ngahna, lungkimna, muhna man neih lawh in Pasian mizat asuahna hangin, laigelhpa/ nu ading lungkim huai le angtan huai penpen sa ing.C W: Laigelh sia khat hihna sungah bangin nang hong to pen ahia le Siapa?
T. E. Pau : Laigelh khat ading haksa le hong to denpi pen ah laigelh ding kipat ciangin a thu akipan a sum le pai mahmah tawh tha hong kipia ngei lo hi. A diakdiak in ei Zomite sungah laigelh khat ading haksa phadiak sa ing. Laibu hong kileisak cih sangin, na laigelh hoih mah ven,,, bukhat bek hong letsong mah ve hong kisan ziau mah haksa penpen hi. Tua banah Christian laibu diakidak suakta tak kithoh thei lo lailai hi. Biakna sungah sum tampipi bei-in, pawi tuamtuam kibawl zo na pi, laibu bukhat leina ding haksa kisa mahmah hi.

C W: Laibu bu bangzah na teikhia (Translate) khia khin zo a le Siapa?
T.E.Pau : Ka laibu gelh le ka letkhiat (Translate) sa teng bel (1) Love and Marriage, By- Bruce and Carol Britten, (2) Answers for Your Marriage, By- Bruce and Carol Britten, (3) Love is a Fellings to be Learned, By- Walter Trobisch, (4) A reporters Interview with Jesus, By- Benton Rain Patterson. (5) Answers to Life’s Toughest Questions, By- Rick Warren, (6) The Purpose of Christmas, By- Rick Warren.

C W : Tua banah na letkik sawm adang om lai hia.. Tuate zong nong gen thei lai diam?
T. E. Pau: Ka let laitak le ka letsawmte anuai bangin hong gen thei mah ning e.
(1) Just Like Jesus , By- Max Lucado
(2) Your Best Life Now, By- Joel Osteen
(3) Before You Get Engaged, By- David Gudgel
(4) The Hole In Our Gospel, By- Richard Stearn
(5) The Power of Changed Your Life, By- Rick Warren
Hih Laibute bawl khiat zawhna dingin hong huh ding mi kisam ing. Tua banah hih No.4, The Hole In Our Gospel pen 2010 kum biakna laibute sungah Medal Award ngah a kiteel laibu minthang ahi hi. A gelhpa zong World Vision tulaitak President Dr. Richard Stearn hi-in, Christian Mission naspna ah Social Service zong athupit zia limgen mahmah hi.

C W: Tangthu tom le Thupil, lapau cihte akipan thului bangzah na gelh khin a le Siapa?
T.E.Pau : Tua lamsang ah bel ka laigelh khutmee kikuai zo lai in teh.. tam gelh zo nai kei mai ing.

C W: Tuhun Kawlgam sungah Christian lai lam tawh kisai na muhna le ngaihsutna nong gen khia thei dia Siapa?
T.E. Pau: Kei muhna ah Christian lai gelhsiamte in a mau hih theih zahzah in hanciam ciat sa ing. A hi zongin lai lam nasepna a khantohna dingin, sum bawlnate mahmah a hoih masak ding zong kisam hi. Tua banin a munmun pan laibu kilet (translate) ciat mah a, ahi zongin laigelhpa, a letkhia pa akipan alei ding cihte dong ah kilekkim ding kisam hi.Laibu kibawl bawlin a manphatna kithei mel nai taktak loin mu ing.

C W: Christian laibu lam nasepna ah nang sim loh asem Zomi kua bangbang om ahia…nong gen thei diam?
T.E. Pau: Zomi sungah Christian laigelh ka thei pak ko lawmta sungah… Aung Aung, Thangno, Mungpi( City) leh Salai Aung Aung ( Am Baptist Church), Tual Khen Mang, Mya Kabya cihte thei ing. A dang zong om lai in cian lian keng.

C W: Na laiteite’ sungah, ” Answers to Lifes Tougest Question ” kici sung pan na thangah diak pawlkhat nong hopsawn theih om diam? Tawm hong pulak sawn dih ve le?
T.E.Pau : Hih laibu gelhpa pen leitungah laigelh siam minthang Rick Warren hi-in, thangah huai thu tampi tak om hi. A mau laigelhte’ sungah hih laibu mah deih penpen mai hi. Nu le pate tawh kikhenin, gamlapi munah lungkia in kei kia ka om hun laitak in hih laibu ka sim khakna tungtawn in thathak hong guan lian ahih manin, Kawllai tawh letkhiat ding ka khensat pah hi. Kei thangah mah bangin ka laibu tei asim kha tampi in zong a thangahna uh lai hong khak kik om uh hi. Ka laiteikhiat hoih kasak khat leuleu ah ” Answers for Your Marriage ” kici hi -in, nupa kiteng thakte kitenkhit ading laibu hoih mahmah khat ahih zah khop in, asimkha nupa thakte in a nupa kikal kilemna le nopsakna ngah lawh tampi mah om uh cih a mau mahmah hong genna tampi om khin hi.

C W: Lai lam tawh kisai mipi lakah thugenna/ thusinsakna cihte bangzah vei ah na kihel ngei a le Siapa?
T.E.Pau : Lai lam tawh kisai thusinsakna bel pawlpi sung khangnote lak le , apua lam khauneu tuamtuam ah thusinna tamveipi kihel ngei mah ing.

C W: Kawlgam sung laigelh siam minthangte’ sungah siam nasak pen le na deih deuh cihte nong gen thei dia Siapa?
T. E.Pau : Ka deih le siam kasak diak laigelhte’ sung pan a diakdiak in laitei siam pawl khat siam sa mahmah ing. Tuate bel a hih le hong nusia khinsa tam zaw mai uh hi.

CW : Na nuntakna sungah bang laibu in na lungsim hong sukha pen le nuntakpih pen laibu nong gen thei dia?
T. E. Pau : Ka gensa mah bangin ka lungsim hong sukha pha diak laibute sungah ka neu lai pek a, kasim ahi U Kyaw Hlaing teikhiat ( Uncle Tom’s Cabin)laibu tungtawn in, ka lungsim tawngah teeng suakin, laigelh/ tei nopna lungsim hong guan laibu khat ahi hi. Tua zomah Lybanon minam US a teeng ahi Kahlil Gibran i gelh ” Ask not what your country can do for you but what can you do for your country? ” kici laimal in tha hong pia mahmah hi. Tua banah ka lungsim sukha khat ah ka lawmit khat i lakam tawh a laigelh ” Coffee dawn siam in ” cih zong ka lungsim ah giak den khat hi.

C W: Lapau (Poem) tawh kisai bangzah na gelh ngei a, bangci danin muhna nei na hia?
T.E. Pau: Lapau (Poem) tawh kisai lam bel ahih le genluat ding thei keng. A hang in Lapau lam pen thanem le siam lua lo hi mai ing. Laisiang tho sangkah lai-in Mikang (English) tawh ka gelh khat thei ingin, man maw manlo zong cian nawn keng.

C W: 21 Century sungah Zomite dinmun na muhna tawm nong gen thei diam?

T.E. Pau : Hih tawh kisai a pulak thei dinmun dingin kingap nai kei mai ing. Zomite sungah tulaitak gamdang pai ding Imgration hoih loh bekbek kigen cih bel thei ing. Ka laigelhna sung khatah ” Va-ak te lengna le a ciahna ” ka gelhna pen kei lungsim puak hipah lian lel hi. Pasian nasem khat ka hihna pan ka etciang in i pawlpi sungah Khangno om nawn lo cih ka muh ciangin, ka dah mahmah hi. US a teng Russia mi laigelh minthang khat tungah Media lamte in a thudotna khatah, ” Na gualzawhna thusim nong gen thei diam a cih ciangin, a ma dawnna ah, Russia Tuipi kantan zo a, hih USA gam sung kong luttheihna pen ka gualzawhna lian pen hi ci mawk hi. Ken zong ka pawlpi sung pan gamdang a pai ding Khangnote hih thu mah tawh kam vaikhakna ka nei ngei hi.

C W: Laigelh siam khat suahna ding tulaitak khangnote tungah bang thute vaikhak nuam pen na hia le Siapa?
T.E.Pau : Laigelh siam khat suahna dingin nakpi tak mah a kan/ sin ding mah kisam sa penpen ing. Kawlgam ah laigelh nasepna tawh nuntakna piang zo lo ding khat ahih manin, limtak ngaihsut phat huai mahmah dingin mu ing. Laigelh siam khat hihna dingin ukna le veiina taktak kisam a,ukna om peuh le haksatna tampi kikantan zo veve in nuam kisa zo mahmah lel cih vaikhak nuam ing.

C W: Nang tawh kithuzakna ding Adddress kician nong gen thei diam Siapa?
T.E.Pau: Thawng En Pau @T E Pau, 633, KhawaiChan 1st street, West Gyogone, Insein, Yangon 11011, Myanmar
Phone: 01641983
Website : www.tepau.info
Email: [email protected]