Biakna leh Minam Minpua Kipawlna ~ Pu Zokhai

Biakna leh Minam Minpua Kipawlna ~ Pu Zokhai

Zomite-in biakna kalsuanna leh minam kalsuanna akigaal (tui leh sathau) bang-in angaihsun kawmkawm a-om kawmkaal-ah, biakna pawlzing (denomination)-ah makaai-a mapang khenkhat-in minam kamkaih let nading-in amau’ panmun azangh tampi-in minam susia mahmah-hi.

Athu-in, “Ko biakna lampawl minam vaái-ah hong kigolhdah nung-e” ci kankan pong-in minam kipawlna tha-tawh ameet apung adiak-in panmun leh min lunggulhna ciang-tawh minam kipawlna omsa khatpeuh-tawh aki-el theitheiding geelgeel, phuangphuang, phutphut se uhhi. Hihbang mite “khavaái or khami (spiritual)” hetlo ahihlam khangthakte-in muhcian theihding (lehdo gawpding cihna hilo) kisam-hi.

Leitung-pen khang tuihual-tawh aluang hi-a, minam itna, ngeina thupi sakna, paukam (language) thupi sakna cihte anei hetlo, zong atheilo, (ahihang thei akisa mahmah) cihdaante-in mun leh min hongdeih takciang-in minam kitamkham-a, ki-elna lianpi lawhden ahihman-in khangthak gualbaan siamzil peuhmah-in phallohding, khaaktanding akisam mahmah dinmun-ah Zomite ki-om ta-hi.

Itna leh deihsakna maan aneilote’ khuaknimna (brainwashing)-pen khangthakte-in dawhdawh diahduah niloh lehang SPDC – BSPP I-cihcih Kawlgam thuneihnaleencip (dictators) te’ kalsuanzia hi-a, tuabang kalsuanna-pen tuhun-tawh akilangdo mahmah, akilehbulh mahmah ahihman-a “Kawlgam Democracy maantak” aki gengen, aki-awngawng, aki-taangkoko ahihi.

Adiak-in Leitung Gam Khatna (First World Countries) te-ah ateeng khinsa Zomite beek-in Kawlgam Zomite’ thuakna akizom toto ding-in tha piakpiak thuahding akilawmlo ahihlam phawk-huai mahmah-hi. Panmun bangmahpi hilo khat-tawh lungkim-a Kawlgam Dictators te’ kalsuanzia zat kankanding mawk-pen haivaái lua mahmah-hi (pil akisa tata hizawlaai saam naven).

Zomi minpua deuhdeuh biakna pawlzing sung-a omte diakdiak-in pawlzing dangte-bang el mahmah, Zomi kipawlna-khawng langbawl kankan cihpen innsung-a tutphah dawhkaante athal lam-a kikoih-tawh kisuun-hi. Alum alet lungsim puakzia ahihman-in Pasian-tawh kizom loding theihsa hilel-hi.

Minam-pen minam hi-a, biakna-pen nangmah mimal leh Pasian na’ kizopna (your personal relationship with GOD) hi-in, pawlzing (denomination)-pen na’ Sahkhua Pawl (Social Group) hilel-hi. Na’ pawl-in Pasian-tawh hong leptuah lo-in midang pawlkhat-tawh hong suktuahleh tua pawl-pen Social Group hi nawnlo-in Anti-Social Group cihna ahihi. Pawl-in Vaan Kumpigam hongtun loding-a, na’ nopna na’ dahna-ah hong tanu ding cih khengvaal bangmah hongpia theilo-hi (huhna sumlehpaai bel omsaam vencin).

Tua ahihman-in, mihing maan khat na’ hihleh:

• Pasian thupipen ahihi
• Nulehpa anihna (Naupangte leh khangnote’ ading)
• Nangmah leh na’ zii/pasal (khangcing)
• Na’ minam
• Na’ minam paukam (language)
• Na’ pupate’ ngeina hoihte
• Na’ Christian pihte (pawlzing ….)

Zomite diakdiak-in Pasian’ mi or Vaantungmi bang-a aseh-uh Englishte-pen minam leh paukam athupisak penpente ahihman-in Pasian-in amau’ paukam leitung buppi phial-ah akizangh zahdong ding-in taangzai sak lel-hi. English te-in:

• Amau’ paukam it-in Pasian-in thupha pia-hi
• Amau’ ngeina it-in vawhzo-uh ahihman-in English te’ ngeina-pen Hebrews or Israel Nampi sung-a Judah Minam sung-ah hongsuak Pasian’ Ngeina akisa zahdong-in leitung buppi-in ciing uhhi.

Zomite-in Pasian it ci-a pulaakna lam-ah kam-tawh kituhteh napi-in amau’ paukam leh ngeina thupisimlo ahihman-in minam it nading zia kitheilo-in kipawlna omsa khatpeuh amimal en-a langbawlding, gaalbawlding ciang-tawh kitaaklah mahmah-uh ahihman-in biakna leh minam akizopzia abungbu lam-in kikoih-a, tua-in minam susia-in khalam upna leh kalsuanna-zong susia-hi.

Minam cidamlo-a khalam cidam cihbang om ngeilo-a, khalam cidam lo-a minam cidam cihbang om ngeilo-hi.

Kamsaang Samuel bang-in Pasian-in minam makaih ziading ani, anai, ahunhun-a ahopih tawntung khami na’ hihkei naakleh na’ pawlzing leh na’ minam makaih ding-in kipankei lecin na’ taangthu leh na’ kha nunna bitzaw, namtui zawding cihthu khangthakte-in theihding, zuihding deihsakna-tawh,

Zokhai

Christmas = Christ (Messiah or Messhac) leh mipi kituahkhawm: Sathau Kinilhpa leh leimi zatam dawnbang tuahna acihna ahihi. Nang-tawh na-kituahkhawm naai-uhhiam?