Zangkong Nungakte’ Zia Pawlkhat

Zangkong Nungakte’ Zia Pawlkhat

Zangkong pen mi namkim omna khuapi mahmah khat ahihna tawh kizui in Zangkong Nungakte’ pimuh mite kuate hiam cih tawm suut ni e maw.( Zomi nungakte bel hih lak ah kihello hi.)

1. Na phone handset, na khedap, na nai leh na puansilhte hong en masa ding uh hi.

– Na handset pen atawmpen Iphone bang hileh hong maitai pah uh hi. A zenzen in na handset pen Vertu khawng ahih mawk leh bel adang bangmah etkul lo-in lai a ongpah na hi hi. (Zomite bel Vertu nangawn a tawizo omnai khang e maw)

– Na nai, na khedap, na puante zong a et phet un “Hihpa bang ciang hiam” cih pen hem theih pah lel uh hi.

2. Na mawtaw hong en ding uh hi

– Japan mawtaw khawng Korea mawtaw khawng ahih leh “Hih pa hau lua nai ken cei” cipah uh hi. German mawtaw khawng American mawtaw khawng ahih leh bel nang tawh ki meltheih nading ong vaihawm pah ding uh hi. A zenzen in na mawtaw pen mawtaw tai kidemna a kizangte (ျပိဳင္ကား) ahih khak leh bel na gei a tunuam kituh ding uh hi.

3. Night club (tuhun teh Bar cizaw ta uh) ah na lut leh na zunek nam hong en masa ding uh hi. A tamman pawl ahih kei leh bel hong neh hetlo ding uh hi. Zu gina na nezo kei zong in music tawh kituak in na lam theih lian leh bel hong pimuh mahmah ding uh hi. Gtn in Foxtrot music ong kihon leh foxtrot lam a lam pah ding. Cha Cha ong kihon leh Cha Cha lam a lampah lian ding. Tua hileh bel adang teng ah mat bem nangah zong in hong pimuh mahmah ding uh hi.

4. Na gimnam hong diik ding uh hi. A tung a khempeuh na ong zong in na gimnam hoihtak hong diik lai ding uh hi. Na tui namtui (perfume) zat pen agim azak phet un atam mante maw atawm mante cih thei mahmah uh hi.

Hih thute pen tuma kum 10 val lai pek pan ka kan tohtoh ka tuahkhak, ka muhkhak leh ka zakkhakte sung pan tawm kong suut hi.

Zomite hi kisa baih lua ih hih man a tawm ih kiphawk tuam khak leh cihna tawh kong gelh hi. Zangkong ah leitung nopsakna lam tawh kisai a omlo omlo hi. Tua khempeuh ataisan zo ding in Pasian in tha hong guan khin ahih man a genkik ngam ka hi hi. Gen khialh a om leh ngai dam.

Deihsakna bek tawh

Kiukhat pan

(Mung Laan Thang)
Zangkong