Interview with Kap Thawn Tuang (E-Tuang)

Interview with Kap Thawn Tuang (E-Tuang)

Tutung in Zomi guitar siam Kap Thawn Tuang, E-Tuang chih a ki thei zaw i houlimpih thei nawn hi. Amah, E-Tuang pen 2004 a Myamnar a khangou guitar kidemna, Jolly Bird Music , Gita Alinkar Magazine organize a Best Guitarist Award ngah ahi hi. Delhi based metal band Yagya ah lead guitarist in leng ana pang ngei a, a website uah ama tuntang hichi’n kigelh hi: E-Tuang (Lead guitars) a new member is from Burma joined the band in the rise of 2008.

The energy bomb is like animal on guitar & is classicaly trained. One of the best guitar player from Burma. He derives his influence from Paul Gilbert to Nuno Beterncourt, Marty Friedman to Zakk Wylde. Tu in Altanla a omin a lawmte toh a bawl uh GIP band ah guitars and arrangements lam enkol lel hi.

ZOL: ZogamOnline, ET: E-Tuang

ZOL: Pu Tuang, ZogamOnline toh houlim le chi hi ung ei. ZogamOnline na veh ngei hia?

ET: Topa thupha! Lungdam ingh ei. ZogamOnline zong nasim zeelzeel mah ing. Thupi leh taangzai sa mahmah ingh.

ZOL: Chipah le. Abang chidan a na min Etuang hi mawk ahia?

ET: Aw. Etuang pen kaneu’ lawmte tawh min ki phuahsakna pan aa ong paito suak hi veh aw.

ZOL: OK. Nangma tanchin tomkim nong kigen masa thei diam?

ET: Tedim tualpiang hi’ngh. Pa pen Anlangh khua pan hi-in Naulak beh hi. Nu pen Gamlai khua pan hi-in Lethel beh hi. Unau sagih – pasal thum (1 rip) leh numei 4 (2 rip) u’pa lampan a thumna hi ing. Leitung sinna lamah Maj. Bachelor of Rel (Minor. Home Science), Diploma of Audio Engineering (S.A.E) zo khin ingh.

ZOL: Na hobbies?

ET: Ka hunawngte ah Aksite thu sim, electronic van khat peuhpeuh phel ding thuah kik ding, movie et, thu khat peuhpeuh ah debate bawl, laibu sim, taangthu phuah tawm gen cih dan peuh uk ing ei.

ZOL: Kum bangzah na phak a music lunglut?

ET: Kum 5 kiim pawl hi kha ning.

ZOL: Music Theory leh Guitar sinna na nei hia?

ET: Nei mah ingh. Ong hilh masa penpen ka u hi. High School ah zong Music Theory Sia Gin Lian Pau khut nuai ah, tua khit ciang in Cinpi (Lazy Club) kiang ah, tua khit teh www.gitameit.org ah kum 3 vaal tan bang sin leh hilh thuah kawm in tuaiteng ing.

ZOL: Mipi ma a guitar na tum masakna pen, kum bangzah pha?

ET: Mipi’ mai ah kum 6 kiim hi ning. Biakinn sung hi.

ZOL: Bang chidan a guitar tumsiam khat hithei na hia?

ET: Hanciamna pen ka bulphuh hi. Tua kawmin music ngaisiamte lak ah tumkha ka hihman zong hi zaw hi ci-ingh.

ZOL: Kua in hong influence deuh a, guitar siamna dinga na lampai tot a sau hia?

ET: Influence pen kei aa ding pen tam peuhmah hi. Banghang hiam cihleh ke’n music nam nih bek thei hing – 1. Zaaknop ( ngaih nop) 2. Zaaknop lo (ngaih nop lo) ci-in, a genre tung ah hi zaw lo in, ka deih tawh ngai leh deih ka hih manin ong influence pen tam peuhmah hi.

ZOL: Lead Guitar hi maw na specialize na?

ET: Himah ei. Lead Guitar pen specialize zaw mah ingh.

ZOL: Guitar lou instrument dang bangbang na tum a?

ET: Gawsem (Cingkhup leh Ngambawm la) siam mahmah ingh ei. Bass Guitar, Double Bass, Blues harp…cih teng tum thei ing.

ZOL: Bangbang band ah na kihel ngei a?

ET: Sang kah lai-in college band te ah, Audio Sang ah bel Rap Metal a kici ngiat khat ah,

Los Guapos cih Jazz band tawh gitameit ah, Gataam Band, leh Yagya band leh tulaitak GIP Band (Atlanta,GA) cih khat tawh Band thak khat ka ki pat lai tak hi ah.

ZOL: Aw. Thupi mahmah ei. Delhi ah vaite toh band khat bawl ngei na hih a kiza ngei a..

ET: Tua pen ka gang, Kam Sing in ong zon sak ngiat hi. Yagya Band hi.

ZOL: Delhi a bang hih a om, bangtan om?

ET: Delhi lian ah pen, bangmah sepluat nei thei keng. Kum khat vaal deuh om ingh.

ZOL: Bang chik a US pai, US a bang sem?

ET: 2009 kum kipat lam in US lam na zin phei-in, hihlam mite i’ nunzia khat pen lamdang peuh mah sa ing. Eilam tawh ki bang kei. Nnasep pen tamlua in, professional taktak ding hun ngaklai ding hi phot. Eastern leh western kibatlohna khat hikha mai in teh.

ZOL: A’ihleh guitar compettition ah na tel ngei hia?

ET: Yangon ah ah na kihel ngei mah ingh. Mi a siam hihzahta lai ah Pasian hehpihna tawh Best Guitarist ngah in angtang peuh mah ingh.

ZOL: Hi maw. Congrats! Concert na kihel khakna koi nuamsa pen?

ET: Pu Zenlian tawh Tulsa a Cope Jubilee fund zonna a ka tum pen mah nuam sa ing. Zo mipi, eima kampaute mai ah, ki angtang sak mahmah ing. Lead guitarist nih minpu-a ka tum masak pen hi pah hi.

ZOL: Zomi sung ah kua guitar siam nasa pen?

ET: Siamna kibang kim het kei. Pu Go Hau bang a rhythmic sectionte pen a tawntung aa ka deih ngiat hi. Pu Zenlian ii licks/ riffste pen all time favorites, tampi tak om lai.Lamka lam pan ong khangkhia thak bandte zong alter lamsang ah hoihsa thei mahmah ing. Siam kasak tam peuh mah hi. Amau style tek leh mun tek ah hoihsa thei mahmah ingh.

ZOL: Kawlgam sung leh kawlgam pua ah la?

ET: A siam tam peuhmah. Khat leh khat ka deihdan siam ka sakdan kibang lo a hih man, ka gen zawk ding thei keng.

ZOL: Zomi music siam khat a dingin koi ah bangbang opportunity om in na thei a?

ET: Tu hun khua hun paizia tawh kizui in bel tampi tak khuangaih huai leh ngaihtuah ding om sa ingh. Ahizong a uk tak pi/ hanciam takpi khat aa ding in opportunity cih pen bei ngei lo hi.

ZOL: Nang muhna ah international music scene a Zomite kilat phak ding a baih diam?

ET: Tu tadih commercial ding in baih ke’n teh. Ahizong a haksaatna ding zong mu tuan ke’ng. Khangthak te ii khut sung ah om hi.

ZOL: Kawlgam music industry na muhdan.

ET: Kawlgam music maw, a gam kiukna in huzaap sa peuh mah ing. Tua ciang in, kawlgam pen i theihsa dan in copy pen ultung mahmah lai hi. Kawl traditional album bawl te bek mah in mun kip ngah den sa pen ingh.

ZOL: Indian music (vai music) bang chi nasa?

ET: Indian music in pen leitung music scene ah mun tampi tak laak na neita hi. A diakdiak bang in Modern Composer te ai zong Dance Floor music te ah zong mi mu thei sa ingh. World Music genre te ah zong tampi tak in munla ta hi.

ZOL: Western classical music na muhdan?

ET: A lo theilo sinding a hi hi. Tu hun aa music khempeuh pen Western Classical pan aa ong pai khia ki ci thei hi. A hizong in music production aa ding in bel Only western classical tawh annek na ding baih lo ding hi. Musician hoih khat i suahnop leh Western Classical music sin hamtang ding hi zaw hi ci-in mu ingh.

ZOL: Ei Zomite’n opera khong hih tuak nasa hia?

ET: Ei Zomi te ei zo tradition music pen koici bang in tuhun music aa ding in kizang thei ding hiam cih, kan masak huai sa phot ing. Ei Zola te hoihtak in composition i bawl theih khit ciang in, Opera te Music genre dangte pan in koici bang in adapt bawl ding cihpen ong ki zom toto zaw ding in mu ingh.

ZOL: Guitar bang brand a hoih pen dia?

ET: Tu laitak ka zat pen Ibanez Jem 7VWH hi. Hoih sa mahmah ing. A dangte zong nop thei mahmah ding hi. Hithei hileh i zat khat bek pen technical failure a om lo ding in siam tak in zangh thei leng. Guitar brandte in ong piak theih loh siamna hi zaw hi. Cihnopna ah guitar brand tawh buai lo zaw in i zat khat pen hoihtak zat theih ding ka cihnopna hi zaw hi. Guitar Brand hoih pen tel ding maw, nungak meelhoih teel ding tawh kibang sa ing. Avek pi-in hoih hi: Ei tawh kituak ding zon siam ngai ka sa zaw zeel …ha ha

ZOL: Kawlgam a na music vanzatte le tua na vanzatte uh a kikhai hia?

ET: Kibang lel. Khat veivei kawlgam aa vanzatte hoh nuam ka sak zawk hun tam…

ZOL: India gam koikoi ah na zinta a?

ET: Manipur, Mizoram, Guwahati, Pune, Bombay, New Delhi, Gurgoan, Ghaziabad leh Aligarh cih khuate pai ngei ingh.

ZOL: Kawlgam leh India a kibawl Zomi albumte na muhdan tangpi?

ET: A beisa hunte ah India lam aa i la-te pen lamalte hoih thei sa ingh. Kawlgam lam i la-te pen musical lam tampi tak organize bawl huai sa ingh…

ZOL: Zosuante lak ah kuate music lam a sangpen in na mu?

ET: Hmm, Zosuante lak ah maw… competition khat bang bawl in, aihkei leh album bang zah ki zuak cih tungtawh in ki gen thei ding hi. Kawlgam lamte bel a kawllak na dong ah na tampi tak na sem mawk ve uh in, gam khat tawh kituak ding in…Huzaap nei zaw sa ingh.

ZOL: La sak lam ah la?

ET: Tua pen, kei bang India vocalistte ka na ngaih ciang in a kap dekdek hingh. Siam sa mahmah ingh.

ZOL: Music siam khat na hihteh lasak leh aphuah lam le na siam thou ding maw?

ET: Ha ha ha. Ong um na hia? Upmawh ong bang kei leh bang nong ci tam maw…In, Choir Conductor pen kum3 bang www.gitameit.org ah sem ngei ingh.

ZOL: Nungakte’n thei nuam ding hiven, na awnglai hia?

ET: Tu laitak in ka innkuan pihte Australia ah om hi. Lungdam ingh.

ZOL: Zomi khangthak music ukte bang na advice nuam a?

ET: Music ukte aa ding in hanciamna leh cihtakna i neih ding, tua kawm in lai lam, zilna khat peuhpeuh nei thuah thei ding. Khang tawh kizui in technical lam mahmah zong hanciamhuai sa ingh. Mite in banghih hiam? Ke’n bang hih ka hiam? Cih dotna kawm in ah…

ZOL: Kawlgam political dinmun na muhdan?

ET: Kawlgam pen a buaihuai mahmah khat hi. Dictatorship pen ong khah suah nuam lo ding uh hi. Nop a ki salo mah aa hih bang ciang dinmun ah ki om hi zaw hi.

ZOL: Zomite, a diakin kawlgam lamte gamdang a pai souhsouh uh hoih nasa hia?

ET: Hoih lo mahmah hi. Nam khat panin, ong zang thei le uh hoih mahmah ding hi. Khangthakte manthan huai i sak hun tam mahmah hi. Ngeina leh biakna tawh koikoi i om zong i ki pelh kei naak leh lah, koikoi i om zong in, i Zo hihna mangthang tuan lo zel ding hi. Individual in thu gen mahmah ka sa.

ZOL: Dotkhak louh gennop na nei hia?

ET: Aw,..Nong phawk khak na hang in kipaak mahmah ingh. Kong gen khak loh teng nong dotloh ci zaw ni. Ahoih thei pen ding in ong dawng aa ki nei hi’ngh, ZogamOnline pute tung leh a sim ding laizom mipihte tung ah lungdamna thu ong pulaak nuam ingh. Tua ciang in, GIP Band min tawh band thak khat ki pan ingh, thunget na leh thapiak na tawh ong panpih un ci-in ong ngen nuam sawnsawn ingh.

ZOL: Na hun manpha nong piak man ka lungdam mahmah uhi. Mailam ah lohchinna leh khansauna kong deihsak uhi.

ET: Topa thu pha hi. I vek tan kim ciat ding Pasian in thupha ong piata hen.

ZOL: Lungdam mahmah ung.

ET: Kei zong lungdam mahmah ing. Mailam ah hih bangin thuhoih lahoihte nong zop/sep tohtoh theih na ding un thu ong nget sak ingh. Lungdam.