(Count Your Blessings)
Hih la, mite deih zia Gipsy Smith in a genna ah, “Pasal te’n la in sa in, naupang te’n muktum in sa a, numei te’n luai a naukhimna in sa uh hi” ci hi. Hih la in, a dah, a lungkia leh genthei a kisa mi tampite, Pasian’ hoihna a thaka muhna leh thathak ngahna piangsak hi. Tua bek tham loin hih la pen biakpiak kikhopna mun khempeuh phial ah a kisa la minthang mahmah khat zong ahi hi.
Taang khatna ah, mihing nuntakna pen, tuihual lian pipite nawk suk nawk toh tuipi bang hi-in lametna om lo, lungkiatna tawh kidim nuntakna hi, ci hi. Ahi zongin, na ngahsa thuphate khat khatin sim lecin, Topa in nang adinga hong sepsak thupha tampi na mu dinga lamdang na sa ding hi, ci hi.
Taang nihna ah, mihing nuntakna ah gentheihna, lungkhamna vangikte puak-hak kisa-in kilungmang thei hi, ci hi. Ahi zongin, tua lungkhamnate kizo sak kei-in; na ngahsa thuphate sim toto lecin, na lungkhamnate hong bei-in, lungnuam sa-in la na sa ding hi, ci hi.
Taang thumna ah, mite neihsa deihgawhna tawh kipawl kidop ding thu gen hi. Leitung sum leh paai’ lei theih loh, a kip tawntung Zeisu hong ciamsa vantung hauhna ah na lungsim leh na ngaihsutnate koih in, ci hi.
Taang lina ah, mihing nuntakna pen galdona bang hi-in, tua galdona khat veivei lian thei, khat veivei neu thei hi. Bangbang ahi zongin “lungkia kei in!” Pasian in na khempeuh thei-in uk a, na nuntakna a tawp dong, hong hehnem ding leh hong huh dingin a vantungmite hong sawl hi, ci hi.
“Thupha Na Ngahsa Ngaihsun Pha In” cih la a phuak pa, Johnson Oatman, Jr. nuntakna tawh kisai kitam gen lo hi. Amah pen New Jersey, Medford khua gei, khua neu khat ah, April 21, 1856 in suak hi. A pa pen sumbawlna tawh nungta in, lasak siam thu-um mi khat zong ahi hi. A pa’ aw, ngaihsa mahmahin, a neu lai-in kikhopna khat peuhpeuh ah a pa’ aw a zak nop manin a pa kiangah tu den hi.
Oatman a gol ciangin a pa nasepna huh hi. Ahi zongin nasep tam lua sa-in, Pasian ading hun pia zo kisa lo hi. Hun khat ciangin a pa tawh a nasepkhopna pan khawlin Pasian’ nasem dingin kipiakhia hi. Methodist Episcopal Church in ordination pia-in, New Jersey Conference pawlpi khatah sia sem hi. Tua a sia sepna ah suakta kisa lo ahih manin, pawlpi khat khit khat ah pai kawikawi-in gospel thu gen dingin khensat hi. Thugen siamin a minthan loh hangin kha mangthang tampi man hi. Kum 36 a phak ciangin Pasian nasepna ah a lungkimnapen nasep lianpi khat mukhia hi. Tua in, la tungtawnin mi tampite tungah Pasian thu genna ahi hi.
Tua zah khatin Oatman in Pasian phatna la dawng 5000 val phuak hi. A la phuahte ah Zeisu Khazih thupipen sakin, Ama liatna leh Ama gupkhiatna ah thahatnate a tam penin gen hi. Thu-um mite nuntakna ah thu-um lote sangin a sangzaw a nuntak ding, a late tungtawnin hanthawn hi. A la phuah man sum a kipiak ciangin dawng khat tungah dollar khat bek sang hi. Oatman la phuah minthangte lakah “Higher Ground” (1892) leh “No, Not One” (1895) te zong kihel hi.
September 25, 1922 in Oatman in Oklahoma, Norman khua ah, “A Sangna Lam” ahi vantung gamah, a kihonkhiasa mi siangthote tawh vantung late sakhawm dingin a Topa kiang zuan hi.
“Thupha Na Ngahsa Ngaihsun Pha In” cih la aw pen, laphuak siam leh la aw bulh siam, Edwin O. Excell in a bulh ahi hi.
1. Huihpi nawk gawpgawp bangin na hingim hiam?
Lametna bei ta, ci-in na lungkia hiam?
Na ngahsa thupha khat khatin sim lecin,
Topa ong huhna na ngah tampi hi khin.
2. Lungkhamna vangik bangin na lel ngei hiam?
Ong puaksak singlamteh gik lua na sa hiam?
Ong piaksa thuphate zong tam veve hi,
Sim lecin lungnuamin la na sa ding hi.
3. Midangte a sum a paai na et ciangin,
Jesu in ong ciamsa hauhna ngaihsun in;
Na ngahsa, na ngah lai ding Van inn le lo,
Leitung hauhna sum le paai’ lei zawh hi lo.
4. Tua hi a, pumpi le lungsim galdona,
Ze-et, bawlsiat, haksa na thuak hang in-ah,
Lung si ke’n Pasian in uk khin, thei khin hi,
Vantung mite ong kha sak mualsuak ding hi.
Sakkik:
Thupha na ngahsa ngaihsun pha in,
Pasian’ ong piaksa teng ngaihsun in;
Thupha sansa sim toto lecin,
Ong huhna sa tam lamdang na sa ding hi.
Editor
EBC Myanmar
Comment piaknop aomleh...